Open top menu
Saturday, January 25, 2014

මට අපූරු නවකතාවක් කියවන්නට ලැබුණි. ප‍්‍රකාශකයෙකු මා වෙත එවා තිබූ පොතක් මාගේ කාර්යාල කාමරයේ මේසය මත තිබී මම එය උඩින් පල්ලෙන් පෙරළා බැලූවෙමි. පොත ගැන කුහුලක් ඇතිවීම නිසා එය අවසන් වන තෙක් එක හුස්මට කියවීමි. කර්තෘගේ නම පී.බී. ජයසේකරය. මා ඔහු පුද්ගලිකව දන්නා කෙනෙක් නොවේ. ‘මරියා සිලෝනිකා වස්තුව’ යන්න පොතේ නම විය. කතුවරයා පිළිබඳව පොතෙන් සොයාගත හැකි පසුබිම් තොරතුරු අනුව ඔහු පරිවර්තනය කරන ලද පොත් කිහිපයක් පළකර තිබෙනවා සේ ම කෙටිකතා පොත් දෙකක් ද පළකර තිබේ. මේ ඔහුගේ කුළුඳුල් නවකතාවය. මම නවකතා විචාරකයෙක් නොවෙමි. සාහිත්‍ය විචාරය සඳහා යොදා ගැනෙන විවිධ න්‍යාය ධර්ම හැදෑරූ කෙනෙක්ද නොවෙමි. මෙම සටහන ඒ පොත ගැන කරන හැඳින්වීමට සීමා කිරීමට අවශ්‍ය නැත. මට ඒ පොත ගැන හැඳින්වීමක් ලියන්නට අවශ්‍ය වී තිබෙනවා සේ ම ඒ සමග මහා සමාජ ප‍්‍රවාහයක් බවට පත්ව තිබෙන සමාජ පාදඩකරණය ගැනද ලියන්නට අවශ්‍ය වී තිබේ. මේ ලිපිය ඒ දෙකම ගැන කෙරෙන විවරණයක් ලෙස සැලකිය යුතුය.

නවකතාව හා පාදඩකරණය

රටේ ආණ්ඩුක‍්‍රමයේ මහා අවුලක් තිබෙනවා සේ ම සමාජය ගිලගනිමින් තිබෙන සමාජ පාදඩකරණය රටේ හැඩතල හා ගමන් මග කෙරෙහි තීරණාත්මක ලෙස බලපා තිබෙන සාධකයක් බවට පත්ව තිබේ. පාදඩකරණය නමැති ක‍්‍රියාවලියට හසුවී විකෘති නොවී ඉතිරි වී තිබෙන දෙයක් නැති තරමට අපේ රටේ හැම දෙයක්මත් විකෘති වී ඇතැ’යි කිව හැකිය. එය විසින් රාජ්‍ය පාලනයේ හා දේශපාලනයේ සිට ආගම ධර්මය හා කලාව, සාහිත්‍යය දක්වා වන හැම අංශයක්ම මහා විකෘතිකරණයකට ලක් කොට තිබෙන්නේයැ’යිද කිිව හැකිය. දේශපාලකයා හා පාදඩයා අතරද, නැවත පැවිද්දා හා පාදඩයා අතරද, වෘත්තීයවේදියා හා පාදඩයා අතර සේ ම කලාකාරයා හා පාදඩයා අතරද වෙනසක් හඳුනාගත නොහැකි තරමට ඒ සියලූදෙනා එකට මිශ‍්‍රවී ඇති බවක්ද පෙනෙන්නට තිබේ. පාදඩකරණය නමැති මෙම ක‍්‍රියාදාමය රටේ නවකතා ක්ෂේත‍්‍රය කෙරෙහි ඇති කර තිබෙන බලපෑමද සුළුපටු නැත. අපට බොහෝවිට කියවන්නට ලැබෙන්නේ පාදඩකරණය නමැති ක‍්‍රියාදාමයේ සියලූ ගති ලක්ෂණ අන්තර්ග‍්‍රහණය කරගත් නවකතාය. මේ ගණයට වැටෙන අවරගණයේ නවකතා නිල විචාරකයන්ගේ පැසසුමට ලක්වන අවස්ථාද දැකිය හැකිය. පවතින දේශපාලන යථාර්ථයෙන් මුළුමනින් පරිබාහිරවීම මේ ගණයට වැටෙන නවකතාවලට ආවේණික එක් වැදගත් ලක්ෂණයකි. රමණය, ලිංගිකත්වය හා අස්වාභාවික ලිංගික සබඳතා උත්කර්ෂවත් කිරීමක්ද ඒවා තුළ දැකිය හැකිය. එවැනි නවකතා කියවන්නාට ලබාදෙන අවබෝධය හා රසඥතාව පහත් මට්ටමක තිබීම පොදුවේ ඒවාට ආවේණික තවත් වැදගත් ලක්ෂණයක් ලෙසද සැලකිය හැකිය. ඒ ගණයේ නවකතා සමාජයේ ඇතිවී තිබෙන විකෘති මානසිකත්වය උග‍්‍රකිරීමට මිස සමනය කිරීමට හේතුවන නවකතා ලෙස සැලකිය නොහැකිය. මේ ගණයෙහිලා සැලකිය හැකි නවකතා ලියන නවකතාකරුවන් අතර නවකතාකරණයෙහිලා විශේෂ දක්ෂතා ඇති දක්ෂයන්ද සිටින බව කිව යුතුය.

සමාජ පාදඩකරණය පිළිබඳව විග‍්‍රහයකට යන්නට ප‍්‍රථම ජයසේකරගේ කුළුඳුල් නවකතාව ගැන මා දරන අදහස් කෙටියෙන් පළකරන්නට කැමතිය. එය අවරට දුවන රැුල්ලට එකතුවීම සඳහා ලියන ලද්දක් නොව ඒ වෙනුවට උඩුගං බලා පීනන්නට දරන ලද ප‍්‍රබල හා ප‍්‍රශස්ත උත්සාහයක් ලෙස සැලකිය හැකිය. ඔහු රටේ පවතින සමාජ දේශපාලන යථාර්ථය හොඳින් ග‍්‍රහණය කොටගෙන තිබෙනවා පමණක් නොව තමන් විසින් නිර්මාණය කොට පෙළගස්වන මෙම කතාව ඔස්සේ එම සමාජ-දේශපාලන යථාර්ථය ඉතා ප‍්‍රබල හා කලාත්මක ලෙස ප‍්‍රතිනිර්මාණය කිරීමටද සමත් වී තිබෙන්නේයැ’යිද කිව හැකිය.

ජයසේකරගේ නවකතාව

නවකතාවට ඇතුළත් චරිත සංඛ්‍යාව විශාලය. ඒ අතර තිබෙන ප‍්‍රබලම චරිත වන්නේ උගතෙකු, නාට්‍යකරුවෙකු හා හැම දෙයක් දෙසම දේශපාලන කෝණයකින් බලන්නට උත්සාහ කරන ප‍්‍රතිපත්තිගරුක පුද්ගලයකු ලෙස සැලකිය හැකි කරුණාපාල, නැටුම් ගුරුවරියකගේ තත්ත්වයේ සිට සල්ලාල නියෝජ්‍ය ඇමතිවරයකු පිහිටෙන් පාසල් අධ්‍යාපනයේ කලාප අධ්‍යක්ෂවරියකගේ තත්ත්වය දක්වා ඉහළ නගින ඔහුගේ බිරිඳ, ඒ දෙදෙනාගේ දරු දෙදෙනා වන විමුක්ති හා සනූති, නියෝජ්‍ය ඇමතිවරයා යනාදීන්ය. නියෝජ්‍ය ඇමතිවරයාගේ චරිතය ඉතාමත් ප‍්‍රබලය. කරුණාපාලගේ පළමු දුව විමුක්ති ඇවිදීමට හෝ කතා කිරීමට බැරි හැමවිටම කටින් කෙළ බේරෙන මන්දමානසික දරුවෙකි. සංකේත වැදගත්කමක් ඇති එම අසරණ දරුවාගේ් චරිතයද ඉතාමත් ප‍්‍රබල ලෙස ගොඩනැගීමට නවකතාකරුවා සමත් වී තිබෙන්නේයැ’යි කිව හැකිය.

කරුණාපාලගේ පියා හේන් ගොවියෙකි. ඔහු මරණයට පත්වන්නේ අලියෙකු අතිනි. පියාගේ මරණයෙන් පසු පියාගේ භූමිකාව රඟපාන්නේ කරුණාපාලගේ අම්මාය. ඉතා කටුක ජීවිතයක් ගතකරමින් වුවත් පේරාදෙණිය විශ්වවිද්‍යාලයට තේරී පත්වීමට කරුණාපාල සමත් වේ. එහිදීද එදිනෙදා ජීවිතය ගැටගසා ගැනීම පිණිස කුලීවැඩ කරන්නට ඔහුට සිදුවේ. ජවිපෙ දෙවැනි කැරැුල්ලේදී කරුණාපාල එම කැරැුල්ලේ ආධාරකරුවකු බවට පත්වේ. ඒ සමග ඔහුට එම කැරැුල්ල ගැන කිසියම් විවේචනයක්ද තිබූ බව පෙනේ.

කරුණාපාල එම කැරැුල්ලේදී තරුණයන් තොග ගණනින් ඝාතනය කෙරෙන දේශපාලකයකු වෙඩි තබා මරා දැමීම සඳහා වන උත්සාහයකටද සම්බන්ධ වන්නේය. ඔහු ඊට සම්බන්ධ වන්නේ කැරැුල්ල මෙහෙයවන දේශපාලන ව්‍යාපාරයේ ප‍්‍රධාන පෙළේ නායකයකු ලෙස ක‍්‍රියාකරන වෛද්‍ය ශිෂ්‍යයකු සමග ඔහුගේ පෙළඹවීම හා මගපෙන්වීම යටතේය. දේශපාලකයාට වෙඩි තැබීමේ වගකීම පැවරෙන්නේ කරුණාපාලටය. වෙඩි තැබිය යුතු පුද්ගලයාගේ මුහුණට ටෝච් එළිය ඇල්ලීමේ වගකීම පැවරෙන්නේ එම වෛද්‍ය ශිෂ්‍යයාටය. එහිදී දේශපාලකයා මරා දැමීමට ඔවුන් සමත්වන්නේ නැතත් දේශපාලකයා ගමන් ගත් වාහනය පැදවූ රියදුරා එල්ල කළ වෙඩි පහරකින් වෛද්‍ය ශිෂ්‍යයා මරණයට පත්වේ.

නවකතාවේ ආරම්භයේ නොව අවසාන භාගයේදී හෙළිදරව් වන ආකාරයට කරුණාපාලගේ බිරිඳ බවට පත්වන්නේ එම වෛද්‍ය ශිෂ්‍යයාගේ පේ‍්‍රමවන්තියයි. වෛද්‍ය ශිෂ්‍යයා මැරෙන අවස්ථාව වන විට ඇය ඔහු නිසා ගැබ්ගෙන සිටියේය. වෛද්‍ය ශිෂ්‍යයා අවසන් හුස්ම හෙලන්නට පෙර ඇයගේ වගකීම භාරගන්නා ලෙස ඔහු කරුණාපාලගෙන් ඉල්ලා සිටියේය. කරුණාපාල එම යුතුකම ඉටු කළේය. මන්ද මානසික ‘විමුක්ති’ දරුවා ඒ සම්බන්ධයේ ප‍්‍රතිඵලයක් වූ බව පෙනේ.

ඇයද කැරැුල්ලට ක‍්‍රියාකාරී ලෙස සම්බන්ධ වී සිටි තරුණියක් වූවාය. ඇගේ පියා දුප්පත් කම්මල්කාරයෙක් විය. දරිද්‍රතාව සේ ම ඊටත් වඩා කුල පීඩනයද ඇය කෙරෙහි බලපා තිබුණි. නියෝජ්‍ය ඇමතිවරයාගේ අනියම් ලිංගික සහකාරියක වීම මගින් කරුණාපාලගේ බිරිඳ ප‍්‍රමාණවත් තරමින් අධ්‍යාපන සුදුසුකම් නැතිව පවා සාමාන්‍ය නැටුම් ගුරුවරියකගේ තත්ත්වයේ සිට කලාප අධ්‍යාපන අධ්‍යක්ෂවරියක දක්වා පිම්මේ ඉහළ නැගීමට සමත් වූවාය. ඇය අනියම් සම්බන්ධයක් ඇතිකරගන්නා නියෝජ්‍ය ඇමතිවරයා ඇගේ පළමු පෙම්වතා වන වෛද්‍ය ශිෂ්‍යයා හා කරුණාපාල විසින් කැරැුල්ලේදී මරා දමන්නට සැලසුම් කර තිබුණු දේශපාලකයාය.

සිය බිරිඳ නියෝජ්‍ය ඇමතිවරයා සමග අනියම් සම්බන්ධයක් ඇති බව දැනගන්නට ලැබීමෙන් පසු වුවද කරුණාපාල ඒ ගැන බිරිඳගෙන් කරුණු විමසන්නට හෝ ඇය සමග රණ්ඩු කරන්නට හෝ ගියේ නැත. ඊට පෙර සිටම දෙදෙනා එකිනෙකාට කතා නොකරන තත්ත්වයක් ගොඩනැගී තිබුණි. එහෙත් ඒ නිසා කරුණාපාල තමන් කරන නාට්‍ය වැඩකටයුතු හෝ පොදු යහපතට අදාළව කරන දේවල් කිරීම අත්හැරියේද නැත. විමුක්ති හා මව අතර යහපත් සම්බන්ධයක් නොතිබුණු අතර ඇය මවගේ පිළිකුලට හේතුවී තිබුණි. විමුක්තිද මව කෙරෙහි දක්වන ප‍්‍රතිචාර යහපත් නොවීය. විමුක්තිට අවශ්‍ය කරන ආදරය ලබා දුන්නේද ඇය රැුකබලා ගත්තේද කරුණාපාලය. සනූති මව හා පියා අතර දෝලනය වන චරිතයක් විය. පියා මවට වඩා උගත් බව ඇය දැන සිටියාය. එහෙත් ඔහු මව මෙන් ඉහළ නැගීමට උනන්දුවක් නොදැක්වීම ඇගේ සතුටට හේතු නොවීය.

අවසානයේ කරුණාපාලගේ බිරිඳගේ ඉහළ යන ගමන කෙළවරවන්නේ මහා ඛේදවාචකයකිනි. ඇගේ එම බිහිසුණු හා ඛේදජනක අවසානය ඉතා ප‍්‍රබල හා අනුවේදනීය ආකාරයකින් නිරූපණය කිරීමට නවකතාකරුවා සමත්ව තිබෙන්නේයැ’යි කිව හැකිය.

කරුණාපාල කෙරෙන් ප‍්‍රකාශ වන දේශපාලන අදහස් ජවිපෙ මතවාදයට වෙනස්ය. කරුණාපාල ජවිපෙ දේශපාලන අච්චුවෙන් මිදීමට සමත්ව ඇතත්, මාක්්ස්වාදී අච්චුවෙන් අත්මිදී ඇති බවක් පෙනෙන්නට නැත. කරුණාපාලට අනුව දුප්පත්කම සූරාකෑමේ ප‍්‍රතිඵලයකි. දෘෂ්ටිමය තලයේ එවැනි සීමාසහිතකම් තිබියදීත් ජයසේකරගේ කුළුඳුල් නවකතාව ඉතා ප‍්‍රබල හා ප‍්‍රශස්ත නවකතාවක් ලෙස සැලකිය හැකිය.

සමාජ පාදඩකරණය

දැන් මට සමාජ පාදඩකරණය පිළිබඳ මගේ අදහස විස්තර කරන තැනකට යා හැකිය. සමාජ පාදඩකරණය නමැති සංකල්පයෙන් අදහස් වන දේ නූතන නවකතා රැුල්ල තේරුම් ගැනීම සඳහා පමණක් නොව ශ‍්‍රී ලංකාව මුහුණදී තිබෙන අර්බුද හා ශ‍්‍රී ලංකාවේ වර්තමාන සමාජ- දේශපාලන යථාර්ථය නිවැරදි ලෙස තේරුම් ගැනීම සඳහාද ඉතා වැදගත්වන්නේය.

හැම සමාජයකමත් ලූම්පන් හෝ පාදඩ ගණයෙහිලා සැලකිය හැකි මිනිසුන් සිටින අතර ඔවුන්ට ආවේණික විශේෂ ස්වභාවය කාල් මාක්ස් විසින් සේ ම සමාජ විද්‍යාඥයන් විසින්ද විග‍්‍රහ කර තිබේ. යාචකයන්, අපරාධකරුවන්, කුලියට මිනීමරන්නන්, ගණිකා වෘත්තිය ආශ‍්‍රයෙන් ජීවත්වන්නන්, තැබෑරුම්වල හා ඔට්ටුපොළවල සේවය කරන්නන්, මං පහරන්නන් වැනි අය මෙම විශේෂ සමාජ ප‍්‍රභේදයට අයත්වන්නේයැ’යි කිව හැකිය. මේ ගණයට වැටෙන අය දේවල් දකින හා සිතන මතන ආකාරය සාමාන්‍ය ජනයාට වඩා වෙනස්ය. ඔවුන් නීති උල්ලංඝනයට බය නැත. ඔවුන් පොදුවේ අඩු උගත්කමක් ඇති පහත් රසඥතාවක් ඇති අය ලෙස සැලකිය හැකිය. ඔවුන් ආර්ථික වශයෙන් සාමාන්‍ය ආර්ථිකයට වඩා කළු ආර්ථිකයට සම්බන්ධ පිරිසක් ලෙසද සැලකිය හැකිය. කළු ආර්ථිකයක් හා එය ජීවන මාර්ගය කරගත් පිරිසක් 1977ට පෙර කාලයේදීද සිටියෝය. එහෙත් ඒ කාලයේ ආර්ථිකයේ එයට හිමිව තිබූ පංගුව සේ ම එවැනි ආර්ථික මාර්ගවලින් යැපෙන අයගේ ප‍්‍රමාණයද සුළු විය. කළු ආර්ථිකයේ සේ ම කළු ආර්ථිකයෙන් යැපෙන අයගේ ප‍්‍රමාණයේද ශීඝ‍්‍ර ප‍්‍රසාරණයක් ඇතිවීම ආරම්භවන්නේ 1977න් පසුවය.

විධායක ජනාධිපති ආණ්ඩුක‍්‍රමයක් ඇතිකර ගැනීමෙන් පසු මැරවරයෝ රාජ්‍යයේ වැදගත් පංගුකාරයන් පිරිසක් බවට පත් කරගනු ලැබූහ. ශිෂ්‍ය හා කම්කරු අරගල මර්දනය කිරීම සඳහා යොදාගනු ලැබුවෝ ඒ ගණයට වැටෙන මැරවරයෝය. ඒ මගින් රාජ්‍යයේ අවශ්‍යතාවන් වෙනුවෙන් රාජ්‍ය අනුග‍්‍රහය ඇතිව මැරවරකම් කරන මැරවර ප‍්‍රභේදයක් ඇතිවූ අතර, ඒ නිසා ඔවුන් රාජ්‍යයේ අවශ්‍යතා සඳහා කරන මැරවරකම්ලදී පමණක් නොව තමන්ගේ පුද්ගලික අවශ්‍යතාවන් සඳහා කරන මැරවරකම්වලදීද රාජ්‍යයේ ආරක්ෂාව ලබන පිරිසක් බවට පත්වූහ.

විවෘත ආර්ථික ක‍්‍රමය ආර්ථිකයේ නිෂ්පාදන අංශයට තිබුණු ප‍්‍රමුඛත්වය අහෝසි කොට සේවා අංශයේ විශාල ප‍්‍රසාරණයක් ඇති කළේය. සංචාරක කර්මාන්තය ආර්ථිකයේ වැදගත් අංශයක් බවට පත්විය. සංචාරක මගපෙන්වීම වෙරළබඩ තීරයේ ජීවත් වන තරුණයන්ගේ ජනප‍්‍රිය රැුකියා මාර්ගයක් බවට පත්විය. ඔවුහු සංචාරකයන්ට අවශ්‍ය හොඳ නරක හැම දෙයක්මත් සපයා දෙන පිරිසක් බවට පත්වූහ. ඒ ආශ‍්‍රයෙන් ගණිකා වෘත්තියේද ශීඝ‍්‍ර ව්‍යාප්තියක් ඇතිවිය. මත්ද්‍රව්‍ය භාවිතයේද ශීඝ‍්‍ර වර්ධනයක් ඇතිවිය. පරණ බූරුපොළ වෙනුවට නවීන සූදුපොළ ඇතිවිය. ඒවා කිසියම් පිරිස් සිය ජීවන මාර්ග බවට පත්කර ගත්තෝය. ඇතිකරන ලද විධායක ජනාධිපති ක‍්‍රමය යටතේ පාලක පක්ෂයට සම්බන්ධ අයට පොදු වස්තුව කොල්ලකෑමට ඉඩ ලබාදෙන ප‍්‍රතිපත්තියක් තුළ රාජ්‍යයේ අනුග‍්‍රහය ඇතිව අයථා මාර්ගවලින් ධනවතුන් බවට පත්වූ නව පන්තියක ධනවතුන් පිරිසක් ඇතිවූ අතර ඔවුන්ගේ ක‍්‍රියාකාරකම් කළු ආර්ථිකයේ වේගවත් ප‍්‍රසාරණයක් ඇති කිරීමට හේතුවිය. ඊට පෙර පැවති ක‍්‍රමය තුළ මන්ත‍්‍රීවරුන්ට රජය සමග ව්‍යාපාර පවත්වාගෙන යෑමට ඉඩක් නොතිබුණු අතර එසේ කිරීම ඔවුන්ගේ මන්ත‍්‍රීකම් අහිමි කිරීමට හේතුවන බලවත් වරදක් ලෙස සලකන ලදි. මන්ත‍්‍රීවරුන්ට පනවා තිබුණු ඒ සියලූ තහංචි නව ක‍්‍රමය විසින් ඉවත් කරන ලද අතර මත්පැන් බලපත‍්‍ර, දැව ප‍්‍රවාහන බලපත‍්‍ර හා මගී ප‍්‍රවාහන බලපත‍්‍ර බෙදාහරිනු ලැබුවේ මන්ත‍්‍රීවරුන් මාර්ගයෙනි. ඒ නිසා මන්ත‍්‍රීවරු සැලකිය යුතු පිරිසක්ද තැබෑරුම්කරුවන් බවටත්, දැව කොන්ත‍්‍රාත්කරුවන් හා බස් මුදලාලිලා බවටත් පත්වූහ. ඒ ආකාරයට ඔවුන් හිමි කරගත් ආර්ථික බලය හැම මන්ත‍්‍රීවරයකුටම ගණන්කාරයන් කිසියම් පිරිසක් ආර්ථික වශයෙන් නඩත්තු කළ හැකි තත්ත්වයක් ලබා දුන්නේය.

රට මස් මඩුවක් බවට පත්වීම

ජේවීපී දෙවැනි කැරැුල්ල දේශපාලකයන් හා අපරාධකරුවන් අතර පැවති සහසම්බන්ධය වඩා විශාල ප‍්‍රමාණයකින් පුළුල් කොට එය පහසුවෙන් වෙන් කළ නොහැකි ගල් ගැසුණු දෙයක් බවට පත් කළේය. දේශපාලකයන්ට එල්ල වී තිබූ මරණ තර්ජන ඉදිරියේ ඔවුන්ට අවශ්‍ය කරන ආරක්ෂාව පොලිසිය හා නිල ආරක්ෂක හමුදා මගින් ලබාදීමට නොහැකිවීම හේතු කොටගෙන ආරක්ෂාව සඳහා තමන්ගේම අතුරු හමුදා පවත්වාගෙන යෑමට දේශපාලකයන්ට ඉඩදෙන ලදි. එම අතුරු හමුදාවලට අවශ්‍ය අවි හා උණ්ඩ රජය මගින් ලබාදෙන ලද අතර අතුරු හමුදාවල සාමාජිකයන්ට අවශ්‍ය අවි පුහුණුව ලබාදෙන ලද්දේ ආරක්ෂක හමුදා මගිනි. දේශපාලකයන්ගේ මෙම අතුරු හමුදාවල සේවයට ආවේ සාමාන්‍ය මිනිසුන්ට වඩා ප‍්‍රදේශයේ නමගිය අපරාධකරුවන්ය. තමන් විමසිල්ලෙන් සිටින ප‍්‍රාදේශීය අපරාධකරුවන් ප‍්‍රදේශයේ දේශපාලන බලවතාගේ ආරක්ෂාව භාරව ක‍්‍රියාකරන පුද්ගල පිරිසක් බවට පත්වීමත් සමග ප‍්‍රාදේශීය මට්ටමේ පොලිසිවලටද ඔවුන් අතින් සිදුවන අපරාධ ක‍්‍රියා ගැන කරන සොයා බැලීම් අත්හැර ඔවුන් සමග සහයෝගයෙන් ක‍්‍රියාකරන තැනකට යන්නට සිදුවිය. ඒ මගින් පොලිසිය හා අපරාධකරුවන් අතර තිබුණු පරස්පර සම්බන්ධයේද අලූත් වෙනසක් ඇති කොට පොලිසිය හා අපරාධකරුවන් අන්‍යොන්‍ය සහයෝගයෙන් හා මිත‍්‍රත්වයෙන් ක‍්‍රියාකරන තත්ත්වයක් ඇති කළේය. ඉන්පසු පොලිසිය ඒ අපරාධකරුවන් කරන අපරාධ ඉදිරියේ ඇස් වසාගෙන සිටින ප‍්‍රතිපත්තියක් හෝ ඔවුන් කරන අපරාධවලට සහයෝගය හා රැුකවරණය ලබාදෙන ප‍්‍රතිපත්තියක් අනුගමනය කරන තත්ත්වයක් ඇතිවිය. ඒ සමග ඇතිවූ එක් භයානක දෙයක් වූයේ නිල පොලිසිය කෙරෙහි අපරාධකරුවන් තුළ බිය මුළුමනින් නැතිව යෑමය.

තුන් පූට්ටුව

ඒ සමග මෙම අපරාධකරුවෝ දේශපාලන රැුකවරණය ඇතිව අපරාධ කරන අපරාධකරුවන් බවට පත්වූවෝය. නීතිය කෙරෙහි ඇතිකර ගන්නා බියකින් තොරව ඔවුහු මංකොල්ල කෑවෝය. කප්පම් ගත්තෝය. මත්ද්‍රව්‍ය වෙළෙඳාම කළහ. දේශපාලන හේතු මත පමණක් නොව කප්පම් ලබාගැනීම සඳහාද මිනිසුන් පැහැර ගත්තෝය. බොහෝවිට ඒ ක‍්‍රියාකාරකම් සඳහා පාවිච්චි කරනු ලැබුවේ දේශපාලකයාගේ නිල වාහන ය. මත්ද්‍රව්‍ය බෙදාහරිනු ලැබුවේද නිල වාහනවලිනි. නීතියට ඉහළින් සිටින ජනාධිපතිවරයකු ඇති කිරීම මගින් 1977 ආණ්ඩුක‍්‍රම ව්‍යවස්ථාව නීතියේ පාලනයේ බිඳවැටීමක් ඇති කළේ නම් දේශපාලකයන් අපරාධකරුවන් හා පොලිසිය එකට පූට්ටු වී ක‍්‍රියාකරන තත්ත්වයක් ඇතිවීම මගින් නීතියේ පාලනය බිඳවැටීම මහා පරිමාණයෙන් සිදුවන දෙයක් බවට පත්වූයේය.

ජේවීපී කැරැුල්ල පරාජය කිරීමෙන් පසුත් තවදුරටත් දේශපාලකයන්ට එල්ටීටීඊයෙන් මරණ තර්ජන එල්ලවන තත්ත්වයක් තිබීම නිසා ගොඩනැගී තිබුණු මෙම තුන් පූට්ටුවේ ක‍්‍රියාකාරීත්වය බාධාවකින් තොරව තවදුරටත් ඉදිරියට ගලා ගියේය. දීර්ඝ කාලයක් තිස්සේ රටේ පැවති මෙම විශේෂ සමාජ දේශපාලන වටාපිටාව තුළ දේශපාලකයන්ගේ සහචර අපරාධකරුවන්ගෙන් සමහරෙක් මහා ධනවතුන් බවට පත්වෙමින් සමාජයේ සැලකිලි ලබන වැදගත් පිරිසක් බවට පත්වූහ. දේශපාලකයන්ගේ සේ ම අපරාධකාරී පසුබිමක් ඇති එවැනි ධනවතුන්ගේද ජීවන රටාව බොහෝදුරට එක සමාන විය. ඔවුන් අඳින ඇඳුම් පැළඳුම් දේශපාලකයන් අඳින ඇඳුම් පැළඳුම්වලට සමාන විය. ඔවුන් පරිහරණය කළේද දේශපාලකයන් පරිහරණය කරන මිල අධික සුඛෝපභෝගී යානවාහනය. ඔවුන් පරිහරණය කරන මත්පැන්ද දේශපාලකයන් පරිහරණය කරන මිල අධික මත්පැන්වලට සමාන විය. මෙසේ මේ වර්ගයට අයත් පුද්ගලයන්ට තිබූ මැර බලයට අමතරව ධන බලය හා දේශපාලන බලය නිසා ඔවුහු ආගමික නායකයන්ගේද, විද්වතුන්ගේ හා ජනමාධ්‍ය වේදීන්ගේද, කලාකරුවන්ගේද ගරු සැලකිලි ලබන පිරිසක් බවට පත්වූහ.

රටේ ගොඩනැගී තිබුණු මෙම රස්තියාදුකාර වටාපිටාව ශක්තිමත් කරමින් සමාජ මනස විකෘති කිරීමට හේතුවූ තවත් සාධක කිහිපයක් මෙසේය. දකුණේත් උතුරේත් ඇතිවූ ප‍්‍රචණ්ඩ ව්‍යාපාර හා ඒවා මර්දනය කිරීම සඳහා ක‍්‍රියාත්මක වූ ප‍්‍රචණ්ඩ අරගල එක දිගට දශක තුනකට ආසන්න කාලයක් පැවතියේය. මිනිසුන්ට ජීවත්වන්නට සිදුවී තිබුණේ භීතියෙනි. මිනිසුන් මැරීම හා අතුරුදන්කිරීම දෛනික ජීවිතයේ සාමාන්‍ය දෙයක් බවට පත්ව තිබුණේය. මිනිසුන් මරා දැමීම පිණිස තුවක්කු අතට ගත්, එසේ කිරීම සිය ජීවන මාර්ගයක් බවට පත්කර ගත් නිල හා නිල නොවන ආරක්ෂක හමුදාවන්ට අයත් පුද්ගල සංඛ්‍යාවේ විශාල ප‍්‍රසාරණයක් ඇතිවිය. හමුදා සේවය ග‍්‍රාමීය දුප්පතුන් අතට ධනය ගලා එන වැදගත්ම මාර්ගයක් බවට පත්වූවේය. වර්තමානයේ දකුණු ආසියාවේ ජනගහනයට සාපේක්ෂව වැඩිම ආරක්ෂක හමුදාවක් සිටින රට ශ‍්‍රී ලංකාවය. ජනගහනයේ හැම 9 දෙනකුටම එක් ආරක්ෂක භටයෙක් සිටින්නේය. ඊට ප‍්‍රචණ්ඩ දේශපාලන ව්‍යාපාරවල අනුයුක්ත අයගේ සංඛ්‍යාවද එකතු කළ විට ලැබෙන චිත‍්‍රය ඊටත් බිහිසුණුය. නිල ආරක්ෂක හමුදාවන්ට හෝ ප‍්‍රචණ්ඩ දේශපාලන ව්‍යාපාරවලට එකතුවන්නන්ගෙන් කිසියම් පිරිසක් හමුදාවන්ගෙන් හෝ එම ව්‍යාපාරවලින් පළාවිත් නීති විරෝධී ජීවිත ගතකරන්නන් බවට පත්වීමද සිදුවිය. එවැනි අය අතුරින් කිසියම් පංගුවක් පාතාල ලෝකයට එකතු වූහ. එක්කෝ ඔවුහු අලූත් අපරාධ කල්ලි ඇතිකර ගත්තෝය. නැතිනම් තිබෙන අපරාධ කල්ලිවලට එකතු වූවෝය. ඒ තත්්ත්වයද අපරාධකරණයේ ඇතිවූ ශීඝ‍්‍ර වර්ධනයට බලපෑවේය. රාජ්‍යයද රටේ දේශපාලන පක්ෂද වැඩි වැඩියෙන් අපරාධකරුවන් මත හා අපරාධකාරී පසුබිමකින් පැවත එන ධනවතුන් මත යැපෙන තත්ත්වයක් ඇතිවිය. අද ප‍්‍රධාන සියලූ දේශපාලන පක්ෂ යැපෙන්නේ කළු සල්ලි කාරයන්ගෙන් ලැබෙන කළු සල්ලිවලිනි.

රට යන්නේ කොයිබටද?

එල්ටීටීඊය යුදමය වශයෙන් පරාජය කරනු ලැබුවද දශක තුනකට ආසන්න කාලයක් තිස්සේ ප‍්‍රචණ්ඩ අරගල පැවති වටාපිටාව තුළ ගොඩනැගී තිබුණු දූෂිත හා රස්තියාදුකාර වටාපිටාව සේ ම ආණ්ඩුක‍්‍රමයේ පැවති විකාරරූපී ස්වරූපයද ප‍්‍රතිසංවිධානයකට ලක්කිරීමක් සිදු නොවීය. ජනවර්ග ප‍්‍රතිසන්ධානයකට ලක්කිරීමක්ද සිදු නොවීය. විකෘති වී තිබූ සමාජ මනස ප‍්‍රකෘතිමත් කිරීමක්ද සිදු නොවීය. ඒ නිසා දැන් සිදුවී තිබෙන්නේ සමාජ ක‍්‍රමයේද දේශපාලන ක‍්‍රමයේද තිබූ අවුල් පාලනය කළ නොහැකි උග‍්‍ර තත්ත්වයකට පත්වීමය.

වෙනදා සාහසික අපරාධ ගැන අසන්නට ලැබෙන්නේ කලාතුරකිනි. අද ඒවා හැමදා අසන්නට ලැබෙන සාමාන්‍ය දේවල් බවට පත්වී තිබේ. ගුණධර්ම බුල්ඩෝසර් කරමින් ඒවා මත කාපට් කරන ලද නවීන මාර්ග ඉදිවෙමින් පවතී. වෙනදා රටට හෙරොයින් ආවේ සිරි සිරි බෑග්වලය. දැන් ඒවා එන්නේ කන්ටේනර්වලිනි. ලොකුම විදේශීය ආයෝජකයන් බවට පත්ව සිටිනුයේ කැසිනෝ කරුවන්ය. ඕස්ටේ‍්‍රලියානු සමීක්ෂණ කණ්ඩායමක් කර තිබෙන අධ්‍යයනයකට අනුව දැන් ශ‍්‍රී ලංකාවේ කළු ආර්ථිකයට හිමි පංගුව සමස්ත ආර්ථිකයෙන් 50%කි. මෙම විනාශකාරී පෙළගැස්ම ආපසු හරවන්නේ කෙසේද? ආණ්ඩුක‍්‍රමයේ ඇති කරන වෙනසකින් පමණක් එය කළ හැකිද?

සමාජ පාදඩකරණය ---  වික්ටර් අයිවන්
Different Themes
Written by lankateam

ඔබ අදහස් සහ අපට එවන්න.

0 comments

Popular Posts

Popular Posts