Open top menu
Wednesday, April 30, 2014
ආණ්ඩුව ඇතුළේ ඉඳන් ගේම් ගහන කුරේ කවුද?

"ප්‍රේමදාස මැරුණාට පස්සේ තිබුණ විජේතුංග ආණ්ඩුව මතකද? ඒ වගේ තමයි දැන් මහින්දගේ ආණ්ඩුවත් දුවන්නේ..."

මේ ප්‍රේමදාසගේ ළඟ හිටපු සමීප උපදේශකයකු කී කතාවකි.
"විජේතුංග ආණ්ඩුව ඇතුළේ හිටියා ආණ්ඩුව ඇතුළෙන්ම ආණ්ඩුව වට්ටන කෙනෙක්. ඒ සිරිසේන කුරේ. මේ ආණ්ඩුව ඇතුළෙත් ඉන්නවා කුරේ කෙනෙක්...."
මේ ඔහු කී කතාවය.

විජේතුංග ආණ්ඩුව සම්බන්ධයෙන් ඔහු කී කතාව හරිය. ප්‍රේමදාස ඝාතනය වූයේ 1993 මැයි පළමුවැනි දිනය. ප්‍රේමදාස ඝාතනය වුණාට පසු
Read more
කුවේණි එදා අපේ රටට පළිගැහුව සාප නවය මෙන්න  ...........ඉබාගාතේ යන වල්මත් ජාතියක් බිහිවේවා!

වරිගෙන් පිටමං කළාට
විජය අතහැර දැමුවාට
හෙළ දිවයිනට-වරිගෙට
කුවේණි කළ සාපය

= හෙළ දිවයින හතර පැත්තෙන් විනාශ වේවා!
= හෙළයේ නායකයන් විනාශ වේවා!
= පිටස්තර ආක්‍රමණිකයන්ට යටත් වේවා!
= හෙළයාගේ ලේ බැඳීම-අපේකම නැතිවේවා!
= හෙළ දිවයින දෙකඩ වී මුහුදට බිලිවේවා!
= බුද්ධිය හීන වූ ජාතියක් බිහිවේවා!
= අව්, වැසි, සුළං, මුහුදු, ජල විපත් ඇතිවේවා!
= ලෙඩදුක් සැම කල වහ වහා පැතිරේවා!
= ඉබාගාතේ යන වල්මත් ජාතියක් බිහිවේවා!

රාවණා රජුගේ ලේ නෑයන් වන රවිශෛලාෂ පරපුරෙන් පැවැතෙන වර්තමාන
Read more
මගේ චිත‍්‍රපට ගිනි තබා විනාශකරන්නත් මට පුළුවන් – විමුක්ති ජයසුන්දර -

මා සිනමාකරුවකු බවට පත්වූයේ කෙනෙක් වෛද්‍යවරයෙක්, ඉංජිනේරුවරයෙක් වන්නාක් මෙන් කුඩා කල සිටම ජීවිතය කිසියම් සැලසුම් කිරීමක් කළ නිසායැ’යි කීමට පුළුවන්කමක් නැහැ. මගේ පියා විද්‍යා ගුරුවරයෙක්. ඔහු එකල කිසියම් වාමාංශික දේශපාලන ව්‍යාපාරයකටද සම්බන්ධව කටයුතු කළ බැව් මට මතකයි. මේ අනුව මගේ ජීවිතය හා දැක්ම හැඩගැස්වීම සඳහා ඔහුගේ ජීවිතය ඇසුරෙන් ද කිසියම් ආභාසයක් ලැබෙන්නට ඇති. එහෙත් ඒ කිසිවක් මා දැනුවත්ව සිදුවූ දේ නොවෙයි.

ගාල්ලේ මහින්ද විද්‍යාලයේ, විශ්වවිද්‍යාල ප‍්‍රවේශයේදී මා ඉගෙනුම ලැබුයේ කලා විෂයයන්. එහෙත් කිසිදිනෙක විශ්වවිද්‍යාලයට යෑමට හෝ එහිදී උපාධියක් ලබාගැනීමට හෝ
Read more
Tuesday, April 29, 2014
ආගම සහ පොලිසිය

දශක තුනක් මේ රට යුද උගුලක සිරවී තිබිණි. ජාතිවාදය මේ ගැටුමට හේතුව විය. දෙමළ ජාතිවාදීන් පරාජය කර මිලිටරි ජයග්‍රහණයන් ලබාගෙන මේ ගෙවීයන්නේ පස්වැනි අවුරුද්දය. යුද්ධය පැවැති තිස් අවුරුද්දේ නොපැවැති ආකාරයට ආගමික ගැටුම් ගෙවී ගිය කාලයේදී ඇතිවී තිබේ. තත්ත්වය කෙතරම් උග්‍ර වීද යත් මේ ආගමික ක්‍රියාකාරකම් සම්බන්ධයෙන් සොයා බලා විසඳුම් ලබාදීම සඳහා බව කියමින් ආගමික කටයුතු අමාත්‍යංශයේ අධීක්‍ෂණයෙන් 'පොලිස්' විශේෂ ඒකකයක් පිහිටුවීමට සිදුවී ඇත.
Read more
හම්බන්තොට ධර්මය --- උපුල් ජොසප් ප්‍රනාන්දු

ප්‍රේමදාස මහතා:

විශේෂයෙන්ම අගමැතිනියගේ කොට්ඨාසයේ කොළඹ - මහනුවර ප්‍රසිද්ධ මහාමාර්ගයක මෙවැනි තත්ත්වයක් ඇති වුණු විට ස්වදේශිකයන් තුළ පමණක් නොව විදේශිකයන් තුළද ඇතිවන හැඟීම ගැන අමුතුවෙන් විස්තර කරන්නට වුවමනා නැතැයි මා කල්පනා කරනවා. මෙය මහජන විරෝධයක් හැටියට පෙන්වා දෙන්න වෑයම් කරනවා නම් සාමය රැකීම සඳහා ක්‍රියා කිරීම පොලිසියේ යුතුකමක්. එහෙත් පුද්ගලයන්ට
Read more
Monday, April 28, 2014
"මිරිවැඩි සඟලක්‌ එල්ලා හැඬුවෙමි"

සපත්තු දෙකක්‌ මිලදී ගැනීමට මුදල් නොමැති නිසා සෙරෙප්පු දෙකක්‌ පැළඳ පාසල් ගිය සේරුනුවර පාසල් දැරියකට මුහුණ පෑමට සිදු වූ අමානුෂික දඬුවම පිළිබඳ පුවත කියවා මේ රටේ බොහෝ මිනිසුන් කම්පාවට පත් වූ බවට අපට සැකයක්‌ නැත.අසරණ ශිෂ්‍යාවක සපත්තු නැති නිසා සෙරෙප්පු දමාගෙන පැමිණීම, ඒවා ඇයගේ කරේ එල්ලා තැබීමට තරම් බරපතල වරදක්‌ ලෙස දකින අඥන සහ උන්මත්තක ගුරුවරිය පිළිබඳව හෝ මෙම ගුරුවරිය ආරක්‍ෂා කිරීම පිණිස, ඇය එසේ කර ඇත්තේ පාසලේ විනය රැකීමට යෑයි ප්‍රකාශ කරන මැටි මෝල් විදුහල්පතියා පිළිබඳව හෝ දිගින් දිගටම වචන නාස්‌ති කිරීමට අපට නොසිතෙන්නේ රටේ අති බහුතර ගුරු පරපුර එබඳු අමනයන් නොවන බව අප හොඳින් ම දන්නා නිසාය.

රටේ අසරණ පාසල් දරු - දැරියනට තමා ලබන සොච්චම් වැටුපෙන් පාසල් පොත්, උපකරණ ලබාදෙන, ඔවුන්ගේ කෑම වේල තම ගෙදරින් ගෙනැවිත් දෙන ගුරුවරුන් - ගුරුවරියන් කොතෙකුත් මේ රටේ සිටින බව අපි දනිමු. එහෙත්, ඒ අතර ගුරු වෘත්තියට කිසිසේත් නොගැලපෙන, නුසුදුසු මෝල්ගස්‌ද, ඒ මෝල්ගස්‌ ආරක්‍ෂා කරන තක්‌කඩියෝ ද සිටිති. අපේ කතාව ඒ ගැන නොවේ, ඒ කතාව තුළින් විදාරණය වූ වෙනත් කතා කීපයක්‌ ය.

ඉන් එකක්‌ සේරුනුවර පොලිස්‌ ස්‌ථානාධිපතිවරයා පිළිබඳව වේ. අදාළ පාසලේ පුදුමාකාර විනය නීතියට අනුව අමානුෂික දඬුවමකට ලක්‌වූ දැරියගේ මවගේ පැමිණිල්ල විමසූ සේරුනුවර පොලිස්‌ ස්‌ථානාධිපතිතුමා සියල්ලට ම ප්‍රථම දැරියට සපත්තු දෙකක්‌ ලබාදුන් බව වාර්තා වෙයි. එම්. බී. වීරරත්න නමැති මේ විශිෂ්ට මිනිසා එසේ කිරීම මඟින් මනුෂ්‍යත්වයටත්, පොලිසියටත් එකවරම මහත් ගෞරවයක්‌ ලබාදෙන අතරම සමාජ සංවේදීත්වය පිළිබඳව රටට ම කදිම පාඩමක්‌ද කියා දෙන්නේ ය.

පොලිසිය බොහෝ විට මහජනතාව සමඟ සමීප ඇසුරක්‌ ගොඩනඟා ගැනීම සඳහා විවිධ දේ කරයි. අවුරුදු කාලයට අවුරුදු ක්‍රීඩාද, වෙසක්‌ සමයට දන්සල් ද ආදී වශයෙනි. එහෙත්, ටික දිනකදී ම මේ සියලු මිතුදම් අමතක වන ස්‌වභාවයක්‌ හිමි පොලිසිය අවුරුදු උත්සවය පැවැත්වූ අය ද අල්ලා පොලිසිය තුළ "ලිස්‌සන ගහේ" නැංවීම ද කරයි. දන්සල් දැමූ අය ද අල්ලා "බඩකට පිරෙන්නට ම පොලිස්‌ බත්" ද දෙයි. මිනිසුන් වරද කරනවුන් නම් ඔවුන් පොලිසිය සමඟ කෙතරම් මිත්‍රව සිටිය ද ඔවුන් අල්ලා සබ්බුව දීමේ වරදක්‌ අප දකින්නේ නැත. එහෙත්, ඇතැම්විට දේශපාලන මැර බලය හමුවේ පොලිසිය බබාලාවීමත්, නීති විරෝධී මහා ව්‍යාපාරිකයන් හමුවේ උක්‌කුං බබාලා වීමත්, අහිංසකයන් හමුවේ පමණක්‌ නීති ආරක්‍ෂක චණ්‌ඩීන් වීමත් ඉවසුම් නො දෙන්නකි. මේ පරස්‌පරයට හේතුව කුමක්‌ වුවත් පොලිසියට මහජන සබඳතාව පවත්වා ගැනීමට නොහැකි වන ප්‍රධාන හේතුව එය ය. අපරාධ මර්දනයෙහිලා වර්තමාන පොලිස්‌ සේවය දක්‌වන පැසසිය යුතු දක්‌ෂතා කොතෙකුත් තිබියදී වුවත් පොලිසියට මහජන සහයෝගය නොලැබී යැමේ හේතුව එය ය.

සේරුනුවර පොලිස්‌ ස්‌ථානාධිපති එම්. බී. වීරරත්න වැන්නන් මෙහිදී නිසැකවම පොලිස්‌ සේවය තුළ පවත්නා මේ හිදැස පුරවනු අපට දැනෙයි. ඊට හේතුව හැටියට අපට පෙනෙන්නේ මේ නිලධාරියා තුළ ඉතාම සංවේදී මනුෂ්‍යයකු ජීවත්වීමය. සංවේදී මනුෂ්‍යයකු තමා තුළ ජීවත් කරවන පොලිස්‌ නිලධාරියා රටට සම්පතකි. එවැන්නන් සපිරුණු පොලිස්‌ සේවය රටට සම්පතකි.

දැන් අපි අනෙක්‌ කතාවට පිවිසෙමු.

තවමත් මේ රටේ ගම්බද පාසල්වල (හෝ වෙනත් ඕනෑම පාසලක වේවා) පය ලා ගැනීමට සපත්තු නොමැති දරුවන් සිටිතිය යන්න ඒ පාසල්වල ගුරුවරුන් හෝ විදුහල්පතිවරුන් හෝ ලඡ්ජාවට පත්විය යුතු කරුණක්‌ නොව ඒ අදාළ පළාතේ දේශපාලනඥයන් ලඡ්ජාවට පත්විය යුතු කරුණකි. ඒ අදාළ පළාතේ ධනවතුන් හා ව්‍යාපාරිකයන් ලඡ්ජාවට පත්විය යුතු කරුණකි. ඒ අදාළ පළාතේ විපක්‍ෂ දේශපාලනඥයන් ලඡ්ජාවට පත්විය යුතු කරුණකි.

මේ රටේ දේශපාලනඥයන් මැතිවරණ ව්‍යාපාරයකදී එළියට දමන මුදල් ප්‍රමාණයෙන්, මිනිසුන් රැවටීම සඳහා බෙදාහරින භාණ්‌ඩවල ප්‍රමාණයෙන්, ඒ සියල්ලම පසෙක තිබේවා ශෝභනය සඳහා වැය කරන මුදල් කන්දරාවෙන් දාහෙන් එකක්‌ වැය කළත් මුළු රටේ සියලුම පාසල්වල දරුවන්ට සපත්තු ලබාදිය හැකිය.

අපගේ රටේ බොහෝ ව්‍යාපාරිකයන් දෙව් ලෝ සැප වෙනුවෙන් සිදු කරන ඇතැම් පුණ්‍යකර්මවලට අදාළ මුදලින් දාහෙන් එකක්‌ වැය කළත් මේ රටේ අසරණ පාසල් දරු දැරියනට අවශ්‍ය මූලික අවශ්‍යතා සපුරනු හැකිය. අවශ්‍ය වන්නේ ඒ පිළිබඳව මොහොතක්‌ සිතා බැලීම පමණය. මේ සිතිවිල්ල ගැන වැඩිදුරටත් දැනගැනීමට වුවමනා අයකු වේ නම් ඔහු සේරුනුවර පොලිස්‌ ස්‌ථානාධිපතිවරයා මුණ ගැසිය යුතුය.

ාසඩ්සබ් -
Read more
ගෝපි සහ ජයකුමාරි- එරාජ් සහ ඥානසාර --- සුනන්ද දේශප්‍රිය

ගෝපි මළවුන් අතර ය. බාලේන්ද්‍ර ජයකුමාරි බූස්ස සිර කඳවුරෙහි ය. එරාජ් ප්‍රනාන්දු හම්බන්තොට නගාරාධිපති ලෙස ම වැජඹෙයි. බොදු බල සේනා ප්‍රධානී ගලගොඩඅත්තේ ඥනසාර හිමි සිය අසපුවේ ය.

ගෝපි ඇතුළු තිදෙනෙකු සන්නද්ධ ගැටුමක දී මියගිය බව ආණ්ඩුව නිවේදනය කළේ පසුගිය අප්‍රේල් 11දා ය. ඊට දින තුනකට පෙර ගෝපි ඇතුළු තිදෙනෙකු අත් අඩංඟුවට ගෙන ඇති බව යාපනය හමුදා අඥාපති මේජර් ජෙනරල් උදය පෙරේරා යාපනයේ පළ වන උදයන් පුවත් පතට ප්‍රකාශ කර
Read more
Sunday, April 27, 2014
බොදු බල සේනාවට එරෙහිව නැගුණු  වම් ඉවුරේ අවලාදය...... සී. ඒ. චන්ද්‍රප්‍රේමට පිලිතුරු

බොදු බල සේනා අධ්‍යාපන හා පර්යේෂණ අංශ ප්‍රධානී
චමිල ලියනගේ

බක්‌ මස විසිඑක්‌ වන දා 'වම් ඉවුර'ට සී. ඒ. චන්ද්‍රප්‍රේම මහතා 'භික්‌ෂුව හා මැරකම' යනුවෙන් සපයා තිබූ ලියෑවිල්ල, බොදු බල සේනාවට එරෙහි පළමු හෝ අවසාන අවලාදය නොවන බව අපි දනිමු. ජාතික බල සේනා සව්දම විද්වංශනයෙන් පසුව උදාවන තත්ත්වය විසින්, බොදු බල සේනාව නිරන්තරයෙන් අවධාරණය කරන ජාතිය ඉදිරියේ ඇති අවදානම පිළිබඳ තවමත් හරිහැටි වටහා නොගත් සිංහල බෞද්ධයන්ද දහස්‌ ගණනින් අවදිකරවද්දී, බොදු බල සේනාවේ සතුරු පාර්ශවයද නව ජවයකින් කලඑළි බසිනු පෙනෙන්නට තිබිණි. බොදු බල සේනාව හෝ එහි නායකකාරකාදීන් සෘජුවම ඉලක්‌ක කරගනිමින්, විවිධ පාර්ශව පැවැත්වූ අදිසි පුවත්පත් සාකච්ඡා, සංවාද, පළ කරන ලද ලිපි, සංඛ්‍යාව ගණනින් කොතෙක්‌දැයි කිව නොහැක. ඒ අතරින් වම් ඉවුරේ අවලාදයට පිළිතුරක්‌ ගොනු කරන්නේ එය සාරගර්භ කාලීන සංවාදයකට ගෝචර ලියෑවිල්ලක්‌ නිසා නොවේ. මේ ලිපිය කියවූ පාඨකයින්ගෙන් කීයෙන් කී දෙනෙකු නම් එහි අන්තර්ගතය අනුමත කළාදැයි නොදනිමු. එහෙත් බොදු බල සේනාවට එරෙහි අතලොස්‌සක්‌ දෙනා සහ මේ ප්‍රවීණ දේශපාලන විචාරකයා (පසුගිය සති අන්ත පුවත්පතක ඔහුව එසේ හඳුන්වා තිබිණි) නම් කුඩා වින්දනයක්‌ ඉන් ලබන්නට ඇත. ඒ සා කුඩා පිරිසක්‌ වෙනුවෙන් පිළිතුරු ලිපියක්‌ ලිවීම අපේ කාලය කා දැමීමක්‌ බව පැහැදිලිය. එහෙත් මෙම අවිදූරදෘෂ්ටික විග්‍රහයෙන්ද, 'දිවයින' වැනි පුවත්පතක දැකීමට අපේක්‌ෂා නොකළ අවලාදයක්‌ දැකීමෙන්ද ව්‍යාකූලව, බොදු බල සේනාව ඊට පිළිතුරක්‌ දෙතැයි යන සාංකාවෙන් මඬනා ලද සිත් ඇතිව ළතැවෙන දේශමාමක සිංහල බෞද්ධයන්ගේ හිතසුව පිණිස යම් කෙටි ප්‍රතිචාරයක්‌ දැක්‌විය යුතුව තිබේ.

සමාරම්භයේදීම කිවයුතු දෙයක්‌ ඇත. එනම් චන්ද්‍රප්‍රේම මහතා විසින් මතුකර ඇත්තේ මේ පවතින සමාජ අර්බුදය සම්බන්ධයෙන් හෝ බොදු බල සේනාවේ භාවිතය සම්බන්ධයෙන් නව මානයක්‌ නොවේ. ඒ වෙනුවට ඔහු බොදු බල සේනාවට එරෙහි, කල් ඉකුත්වූ සාම්ප්‍රදායික සටන් පාඨ ටික අහුලාගෙන සිය වහරින්, පබැදුමෙන් ඒවා හුණු පිරියම් කොට නවීන සිතුවමක්‌ සේ සමාජය ඉදිරියට ගෙන ඒ මේ දුර්වල උත්සාහයක නිරත වෙයි. විවේචන සැම විටම
ස-දය වියයුතු යෑයි අපි නොකියමු. නිර්දය විවේචනද අගනේය. එහෙත් පදනම් විරහිත ද්වේශ සහගත පෞද්ගලික අදහස්‌ දැක්‌වීම් හා නිර්දය විවේචන අතර විශාල පරස්‌පරයක්‌ ඇත්තේය. චන්ද්‍රප්‍රේම මහතාට අවශ්‍යව ඇත්තේ (හෝ පැවරී ඇත්තේ) මොනවා හෝ බේගල් ටිකක්‌ ඇද බා, බොදු බල සේනාවට පහර ගැසීමටය. පසුගිය කාලයේත් දැනුත් විවිධ හේතු මත බොදු බල සේනාවේ ගමනට පහර ගසන්නට විවිධ පිරිස්‌ ඉදිරිපත් වූහ. ඒවාට විවිධ හේතු තිබිණි. ඇතැමුන්ට අවශ්‍ය වූයේ බොදු බල සේනාවට ගසා ප්‍රසිද්ධ වීමටය. එහෙත් ඔහුගේ අභිප්‍රාය අනෙකකි. අප සිතන්නේ චන්ද්‍රප්‍රේම මහතා උත්සහ දරන්නේ ප්‍රසිද්ධ වීමට නොවේ. ඔහුගේ කාර්යභාරය බොදු බලවේග නිසා අවදි වන ජන විඥානය වෙනත් දෙසකට හැරවීමට මොන මොනවා හෝ මත නිර්මාණය කිරීමය. ඒ සඳහා ඔහු දෙසා බාන බේගල් පිළිගැනීමට තරම් සමාජය මුග්ධ යෑයි ඔහු අතිශය වැරදි පුරෝකථනයක්‌ කරයි. අපි ඒ ගැන කනගාටු වෙමු. එහෙත් බොදු බල සේනාවේ අප සතුව ඊට හාත්පසින්ම වෙනස්‌ දියුණු සමාජ විග්‍රහයක්‌ ඇති බවද අවධාරණය කරනු කැමැත්තෙමු.

චන්ද්‍රප්‍රේම මහතාගේ අදහස අනුව නම්, ගාමිණි අභය එළාර හා සටනට පිටත්වෙද්දී ඒ චතුරංගනී සේනාවට පෙරව වඩිනා ලද සිය ගණනක්‌ වූ භික්‌ෂුන් වහන්සේලාගේ සිට, කුඩාපොල හිමි, මිගෙට්‌ටුවත්තේ හිමි, හික්‌කඩුවේ සුමංගල හිමි, වාරියපොළ සුමංගල හිමි, ඉහගම හිමි, ඉළුක්‌ගොඩ හිමි ඇතුළු සිංහලයේ පහළ වූ සියලු දේශමාමක කුළදේවතාවුන් වහන්සේලා 'වලිප්පුවක්‌' 'කුලප්පුවක්‌' වැළඳුන 'ප්‍රචණ්‌ඩ' 'මැරයින්' ය. ඔහුගේ වදනින්ම "දැන් මේ යුද්ධය අවසන් වී රටේ සාමයක්‌ තිබිය යුතු අවස්‌ථාවේදී ඒ පවතින සාමය බිඳ දමන්නේ බෞද්ධ භික්‌ෂුන් වහන්සේලා පිරිසකි". මේ රටේ යුද බියක්‌ නැති බව සැබෑවකි. අපි ගෞරවණීය ලෙස සාමය දිනාගත් බවද සැබෑවකි. එදා යුද්ධයෙන් සාමය දිනාගනිමුයි අධිෂ්ඨානශීලීව හඬ නැගූ සංඝරත්නයම, දැන් සිදුවෙමින් පවතින්නේ පවතින සාමයට මුවාවී මේ රටේ ජාතිය වූ සිංහලයා නිවට කිරීම බව සඵලව හා සබුද්ධිකව - විටෙක දැඩිව - පෙන්වාදීම සාමය බිඳ දැමීමක්‌ ලෙස දකින්නේ නම්, චන්ද්‍රප්‍රේම මහතා ගෙනහැර පාන සෙසු කරුණු පිළිබඳවද දෙවරක්‌ සිතිය යුතුවෙයි. ඒ බව තහවුරු වන ඔහුගේ විකල් විග්‍රහයේ අවස්‌ථා කිහිපයක්‌ විමසා බැලීම වටී.

මුලටම සිහිපත් වන්නේ අපට එතුමා ගැනද අනුකම්පා සිතෙන දුක්‌ගැනවිල්ලකි. බොදු බල සේනාවේ ගමන්ගම අඩාල කරන්නට "බොදු බල සේනාව යනු නෝර්වේ කේන්ද්‍රකරගත් ජාත්‍යන්තර කුමන්ත්‍රණයකි"යි එක්‌තරා දේශපාලනඥයෙකු කලකට ඉහතදී නිර්මාණය කළ, කල් ඉකුත් වුණු ප්‍රවාදයෙන් යෑපෙන චන්ද්‍රප්‍රේම මහතා එතුමාටද නෝර්වේ යැමට වීසා නොලැබීමෙන් කලකට ඉහතදී තම හිතේ අවරෝධනය වූ සිද්ධියක්‌ සිහිපත් කරයි. ඒ "මේ අරුම පුදුම තත්ත්වය ඇතිවූයේ භික්‌ෂුන් පිරිසක්‌ නෝර්වේවලට ගිය පසුවය. නෝර්වේ රාජ්‍යය තම රටට ඒමට වීසා ලබා දෙන්නේ ඔවුන්ට ප්‍රයෝජනයක්‌ ඇති අයට පමණි. 1990 දී මා ද අයිලන්ඩ් පුවත්පතට සම්බන්ධ වූ අලුත එවක ඔස්‌ලෝ විශ්වවිද්‍යාලයේ සේවය කරමින් සිටි ආචාර්ය කුමාර් රූපසිංහ එම විශ්වවිද්‍යාලයේ මාස තුනක වැඩසටහනකට ආරාධනා කළේය. නමුත් නෝර්වේ තානාපති කාර්යාලයෙන් මට එම වැඩසටහනට සහභාගි වීමට වීසා දුන්නේ නැත. ඔවුන් වීසා දෙන්නේ තමන්ට යම් ප්‍රයෝජනයක්‌ ඇති අයට පමණි"යි යනුවෙනි. නමුත් එතුමාම පුන පුනා කියන ආකාරයෙන් අපට පෙනී යන්නේ උක්‌ත "මාස තුනේ වැඩසටහනට" එතුමාගෙන් ප්‍රයෝජනයක්‌ නැති බව නෝර්වේ රජයට ඒත්තු යැමෙන් එතුමාට වීසා ලබා නොදුන් බවකි. ඒ අකරතැබ්බයට බොදු බල සේනාව වගකිව යුතුද?

යුද සමයේ භික්‌ෂුන් වහන්සේලා සිටියේ කොහේදැයි ප්‍රශ්න කරන තරමට විකල්වී ඇති මේ ප්‍රවීණ දේශපාලන විචාරකයාගේ ස්‌මෘතියෙන් ඊනියා යුද විරෝධී පෙරමුණු වල විජාතික වේදිකාවන්ට ජීවිත අවදානම නොතකා පූජ්‍ය ගලගොඩඅත්තේ ඤාණසාර හිමි සහ තවත් බොහෝ ස්‌වාමීන් වහන්සේලා වැඩම කළ මතකය මැකී ගොසිනි. නැතිනම්, ඔහුට 1990 දී ඔස්‌ලෝ එන්නට ආරාධනා කළ කුමාර් රූපසිංහ යුද විරෝධී වේදිකාවේ ප්‍රධාන නළුවා වූ නිසා ඒ කාලයේද ඔහුට රට ගැන සිතන භික්‌ෂුන් වහන්සේ පෙන්නන්න බැරිව සිටියා විය හැක. කුමාර් රූපසිංහලා ඇතුළු බර්ගෝµa නඩය ත්‍රිවිධ හමුදාවන්ගේ කොඳු බිඳිද්දී ත්‍රිවිධ හමුදාවේ කොල්ලන් දිරිමත් කරමින් බංකරයක්‌ බංකරයක්‌ පාසා පිරිත් පැන් කෙණ්‌ඩියත් පිරිත් හුයත් රැගෙන වැඩි භික්‌ෂූන් වහන්සේලා කවුරුන්දැයි සොයා බලන්නට අපි මේ ප්‍රවීණ දේශපාලන විචාරකයාට ඇරයුම් කරමු.

විල්පත්තු සිද්ධිය ඇතුළු වෙනත් ආන්දෝලනාත්මක සිද්ධීන් ගැන කථා කිරීමට ගිහියන් විශාල පිරිසක්‌ සිටින බව කියන චන්ද්‍රප්‍රේම මහතා දේශපාලනඥයන් හා එසේ නොවන කිහිප දෙනෙකුගේ නම්ද ඉදිරිපත් කරයි. කොටි සංවිධානය වෙඩි තබා පරලොව යෑව්වේ ද ගිහියන් බව හේ කියයි. මෙතැනදී මේ ප්‍රවීණ දේශපාලක විචාරකයා පත්වන්නේ ළදරුවකුගේ තත්ත්වයටය. හේ සිය අදහස්‌ දැක්‌වීම කරන්නේ සමකාලීන සංසිද්ධීන් පිළිබද ඇති සාමාන්‍ය දැනුමින්ද විනිර්මුක්‌තවය. එය නොදැනුවත්ව සිදු වන්නක්‌ නොවේ. ඔහු එසේ කරන්නේ ත්‍රස්‌තවාදය යුදමය වශයෙන් පරාජය "කළ හැකිය" හා "කළ යුතුය" යන ආත්ම විශ්වාසය හා යෝජනාව, දේශපාලන කොන්දේසිවලට නොවහල්ව කරමින් වත්මන් ජනාධිපතිවරයා බලයට ගෙන ආවේ අද චන්ද්‍රප්‍රේම මහතාය වහකදුරු වී ඇති "නිකායේ" භික්‌ෂුන් වහන්සේලා බව නොදැන නොවේ.

වත්මන් පාර්ලිමේන්තුවේ ආසන 225 න් සිංහල මන්ත්‍රී වරුන්ගේ සංඛ්‍යාව 150 කට අධිකය. ආසන්නතම විල්පත්තු සිද්ධිය පමණක්‌ නොව සිද්ධීන් අතළොස්‌සක්‌ පමණක්‌ සළකා බලන්නේ නම් දෙවනගල, කුරගල, මහමෙවුනා උයන, දඹුල්ල පුදබිම මරක්‌කල අන්තවාදයේ ආක්‍රමණයට ලක්‌වීම වැනි සිද්ධීන්, මෙරට පාරිභෝගික භාණ්‌ඩ අයථා හලාල්කරණයට ලක්‌කිරීම වැනි සංසිද්ධීන්වලදී, සමාජයීය ප්‍රශ්න විසඳාගැනීමට පෙරමුණ ගනු ඇතැයි අපට යෝජනා කරන 'නායකයින්' 'මහජන නියෝජිතයින්' ධර්මපාලතුමාගේ වදනින් කියන්නේ නම් 'ඇටිකෙහෙල් කෑ උගුඩුවන්' සේ සිටි බවද චන්ද්‍රප්‍රේම මහතා වැනි විචාරක්‌ෂියක්‌ ඇත්තකු නොදන්නවා විය නොහැක.

අනවසර පදිංචිවීමක්‌ වැනි දෙයක්‌ විසඳා ගැනීමට 'ගිහියන්ට' පුවත්පත් සාකච්ඡාවකින් දෙකකින් පුළුවනැයි කියන චන්ද්‍රප්‍රේම මහතාණන්ට විල්පත්තුවේ අක්‌කර සිය ගණනක්‌ බිලිගෙන ස්‌ථිර නිවාස ඉදිකරන තුරු ඒ ගිහියෝ කොහේ සිටියේදැයි නොපෙනෙයි. හැටපස්‌ අමුණක කුඹුරු හිමිව තුබූ දෙවනගල රජමහා විහාරයේ විහාර ගම්, වී අමුණු දෙකකට අඩු වනතුරු මේ සර්ව බලධාරීන් සිටියේ කොහේදැයි ද නොපෙනේ. සිංහල හමුදාවන් 'අහිංසක දෙමළ වැසියන් සමුල ඝාතනයට රසායනික අවි භාවිත කළේය, සිංහල හමුදාවන් දෙමළ වැසියන් ඝාතනය කරනු ඇසින් දුටු සාක්‌ෂි ඇතැයි' තවත් 205 දෙනෙකුගේ අත්සන්ද සහිතව ජිනීවා වෙත ලියා යෑවූ මන්නාරම අග රදගුරු රායප්පු ජෝශප්ට එරෙහිව ඔය කියන කෙරුම්කාරයන් කටක්‌ ඇර නැති බව හේ හො¹කාරවම දනී. යටත් පිරිසෙයින් අර හොර බුදුවරු පහලවී 'සිවුර යනු උර හතරක්‌'යි ද 'ත්‍රිපිටකය යනු පිටු තුනකි'යිද කියද්දී මහජන මුදලින් නඩත්තු වන ඔය පංචස්‌කන්ධ සිටියේ කොහේද? නොබෝදා මල්වතු මහ නාහිමියන් නිවැරදිවම දුටු පරිදි, අමාත්‍යාංශවලින් අවශ්‍ය, සේවය ඉටු නොවන නිසා බෞද්ධ භික්‌ෂුන් වහන්සේට කෙවිට අතට ගැනීමට සිදුවූ බව චන්ද්‍රප්‍රේම මහතා නොදකින්නේ ඇයිදැයි අපට නොවැටහේ.

අප අද ජීවත් වන්නේ සිංහල බෞද්ධ භික්‌ෂුවගේ ඓතිහාසික කාර්යභාරය නොදත් සමාජ වටපිටාවකය. පශ්චාත් යටත් විජිත, නව්‍ය හා පශ්චාත් නව්‍ය, පශ්චාත් කාර්මීකරණ සමාජ අනන්‍යතා ප්‍රවාහයන්ගෙන් ඔද්දල් වූ නූතන සමාජයේ හැඩය, බටහිරීකරණයෙන්ද, වානිජකරණයෙන්ද, ජනප්‍රිය සංස්‌කෘතියේ ආභාසයෙන්ද ඔප දමනු ලැබ ඇත්තේය. සමාජය බේරා ගනු ඇතැයි චන්ද්‍රප්‍රේම මහතා පේන කියන 'නායකයන්ගේ' අනවරත නිදිවැදීම් අස්‌සේ අධ්‍යාපනය ආදී ක්‌ෂේත්‍රයන් තුළටද සිංහලයාට එරෙහි විවිධ සතුරු පාර්ශවයන්ගේ විඥාන දූෂකයෝ රිංගාගෙන ඇත. මේ සමාජය භික්‌ෂුවගේ ඓතිහාසික කාර්ය භාරය නොදන්නේය. නවීකෘත (මොඩ්) මිශ්‍රව සිංහලය දත් ඔවුනට අමිශ්‍රව සිංහලෙන් කතා කිරීම කෙනෙකු ඇමතීම අකැපයá 'නෝටිම නෝටි'ය. චන්ද්‍රප්‍රේම මහතා (හා තවත් අය) මේ ඓතිහාසික ශාසනික කාර්යභාරය නොදන්නා නූතන සමාජ (අ)විඥානයෙන් ප්‍රයෝජන ගන්නට මාන බලයි. ඒ සඳහා "භික්‌ෂුවගේ අවිනීත හැසිරීම කෙරෙහි අවධානය යොමුවී මුළු බෞද්ධ සංහතියටම මහත් අවමානයක්‌ සිදුවීම" යන යෙදුම උළුප්පා 'බෞද්ධයකු' ලෙස 'සමකාලීන ශාසනික සෝදාපාළුව' ගැන සිය අදිසි "කම්පාවීමද" විද්‍යමාන කර, එමගින් තම මතවාදයේ යුක්‌තියුක්‌තතාව මතුපිටින් ඉතා සූක්‌ෂමව තහවුරු කරගනිමින්, බොදු බල සේනාවට (හා සෙසු සංවිධානයන්ට) පහර ගසයි.

විහාරස්‌ථානය විටෙක ලෝකෝත්තර විමුක්‌තිය උදෙසා ජනී ජනයා පෙළ ගස්‌වන පුහුණු කරවන ධර්මායතනයද, භාවනා ආශ්‍රමයද, තවත් විටෙක කලායතනයද, අධ්‍යාපන මධ්‍යස්‌ථානයද, සාහිත්‍ය උල්පතද, සමාජ ශාලාවද, පුස්‌තකාලයද, ඉලංගං මඩුවද, සේනා සංවිධානය වන කේන්ද්‍රස්‌ථානයද ප්‍රජාවේ කුදුමහත් සමාජ අවශ්‍යතාවන් ඉටු කරගන්නා මර්මස්‌ථානය වූ බව නොදන්නා චන්ද්‍රප්‍රේම මහතා ප්‍රසිද්ධියේ මේ යෝජනා කරන්නේ අනෙකක්‌ නොවේ. ගිහියන්ගෙන් ලැබෙන සිවුපසයෙන් යෑපෙමින් - කුඩාපොළ හිමියන් වරෙක වදාළ පරිදි, පිං බත් ගිලිමින්, පඩික්‌කම් පුරවමින් - බණක්‌ දහමක්‌ දෙසා, දනකට පාංශකූලයකට වැඩ තමන්ගේ පාඩුවේ සිටිනා ලෙසය. එහෙත් කොතරම් අඩුපාඩු මැද්දේ වුවද, සිංහල බෞද්ධයා තමා සතු ඉස්‌තරම්ම දෙය දනට පුදා ශාසනය රැක්‌කේත් රකින්නේත් දැයේ මුරදේවතාවුන් වහන්සේලාගෙන් තමන් බලාපොරොත්තු වන්නේ ලෝකෝත්තර විමුක්‌තියක්‌ පමණක්‌ නොවන නිසා බව සිංහල බෞද්ධයා දනී.

අන් තැනක, ඔහු සිය ක්‍රමවේදය බොදු බල සේනා ප්‍රධානී අතිපූජ්‍ය කිරම විමලජෝති නා හිමියන් සම්බන්ධයෙන් නව පන්නයකට අත්හදා බලන්නට උත්සහ කරයි. ඒ, උන්වහන්සේ අභිනන්දනය කොට උන්වහන්සේට මානසික අල්ලසක්‌ ලබාදීමට උත්සහ කිරීමෙනි. අනතුරුව කිරම නා හිමියන් වැනි සංඝපීතෘවරයාණන් වහන්සේ නමක්‌ බොදු බල සේනාව වැනි "පාපකර්මයකට" දායක වූයේ ඇයිදැයි තමාට නොවැටහෙන බව චන්ද්‍රප්‍රේම මහතා කියයි. එය නොවැටහෙන්නේ නම් එතුමා කළ යුත්තේ උන්වහන්සේ බොදු බල සේනාවට නායකත්වය දෙන්නට තීරණය කළේ මන්දැයි දැන ගැනීමට නා හිමියන් මුණ ගැසීමය.

"බොදු බල සේනාව, සිංහල රාවය යන සංවිධානවල භික්‌ෂුන් අතර අඩු ගණනේ බණ දේශනා කිරීමෙන් හෝ සමාජ සේවය කිරීමෙන් හෝ මායිම් ගම්මානවල සිංහලයන් සංවිධානය කිරීමෙන් හෝ ප්‍රසිද්ධියක්‌ ලබා ඇති එකදු භික්‌ෂුයවක්‌ වත් නැති" බව ඔහු කියයි. ඔහුට අනුකම්පා කරනු හැර අපිට කිරීමට වෙනත් කිසිදු දෙයක්‌ නැත. ගලගොඩඅත්තේ ඤාණසාර හිමියන්ගේ බුද්ධානුස්‌මෘතිය, තෙසැත්තෑ ඥාන පූජාව ආදිය ගැන චන්ද්‍රප්‍රේම මහතා නොදන්නා සෙයකි. බොදු බල සේනාව මෙන්ම සිංහල රාවයද පසුගිය සමයේ විපතට පත් සිංහල ගම්මාන, විහාරස්‌ථාන නගා සිටුවීම සඳහා ගත් උත්සාහයෙහි තරම දන්නේ ඒ සංවිධානවල ක්‍රියාකාරීන්ම පමණි. යාපනයේ නාවක්‌කුලි ඓතිහාසික සිංහල ගම්මානය නගා සිටුවීමේ කටයුතුවල ශ්‍රමය සැපයූයේ සිංහල රාවයේ භික්‌ෂූන් වහන්සේලාය. මේ ආගමික සමාජ මෙහෙවරයන්හි උන්වහන්සේලා නිරතවන්නේ ප්‍රසිද්ධිය පිණිස ගුවන් කාලය, පත්තර කොළම් මිලට නොගනිමිනි. ඒ, ප්‍රසිද්ධියට වඩා සේවය අවශ්‍ය නිසාය. ගමක පාරකට කොන්ක්‍රීට්‌ ඇබින්දක්‌ දමා පළමුව ගැමියන්ද, දෙවනුව රටද රවටන දේශපාලනඥයන් මෙන් උන්වහන්සේලාද ඩිජිටල් බැනර් වල විරාජමාන නොවන නිසා චන්ද්‍රප්‍රේම මහතා වැන්නවුන් ඒ සේවාවන් නොදනියි.

බොදු බල සේනාවට අවලාද යනු අලුත් අත්දැකීමක්‌ නොවේ. මෙතෙක්‌ ජාතික වශයෙන් අවලාද ඇසූ අපි මෑතකදී අටවාගත් "ට්‍රැක්‌" (TRAC) නම් වූ ආයතනයක්‌ විසින් "බොදු බල සේනාව ත්‍රස්‌ත සංවිධානයක්‌" ලෙස නම් කිරීමත් සමග ජාත්‍යන්තර මට්‌ටමට "උසස්‌වීමක්‌" ලැබීමු. පැමිණෙන ඕනෑම විපත්තියක්‌ සම්පත්තියක්‌ කරගැනීමේ දෘඪතර අධිෂ්ඨානයෙන් යුත් අපි මේ අවලාදකරුවන් දකින්නේ ජාතියට විහිළු සපයන්නන් ලෙසය. දැන් ජාත්‍යන්තර විහිළු ද සැපයෙමින් තිබේ. කෙසේ වෙතත් බොදු බල සේනාව පිළිබඳ චන්ද්‍රප්‍රේම මහතාගේ විග්‍රහය අප දකින්නේ වම් හෝ දකුණු ඉවුරක සිට කළ විග්‍රහයක්‌ ලෙස නොවේ. එයින් ස්‌ඵුට වන්නේ වන්දිභට්‌ට රිද්මයකි. ජාතික ජාත්‍යන්තර දේශපාලන කරුණු කාරණා උඩින් පල්ලෙන් අතපතගෑවද සාධනීය නිගමනවලට ළගාවීමේ පූර්ණ නොහැකියාව ඔහුගේ ලියෑවිල්ල තුළ ඉස්‌මතුවී පෙනේ. රට, ජාතිය, ආගම, ඓතිහාසික උරුමය ආදී කරුණු 'කරච්චල්' 'ගෝත කරුම' සේ දකින නුතන ජාතියක්‌ ජන්මයන් නැති (හෝ නොතකන) කල්ලතෝනි මධ්‍යම පංතික අනන්‍යතාව, ඉල්ලා සිටින සාටෝප ව්‍යාජ සමාජ වින්දනයට, දැහැනට බාධාවේ යෑයි බියෙන් ජාතියක ඉතිහාසය ප්‍රතික්‌ෂේප කිරීමට ඔහු ඉක්‌මන් වී තිබේ. මේ දින වල බොදු බල සේනාව පතුරු ගසන සෙසු අය සේම සිංහල බුද්ධාගමේ අසංගත බව සොයා යැම චන්ද්‍රප්‍රේම මහතාද උත්සහ දරයි. ඒ සඳහා ශාසනයේ මළගම නිවේදනය කරයි. පිහිටක්‌, සරණක්‌ අවශ්‍ය නම් නිදිවර්ජිතව සිටින වගකිවයුත්තන්ම පමණක්‌ විශ්වාස කරන්නැයිද, උන්ගේ අගුපිල්වල ලගින්නැයිද සමාජයට පණිවුඩයක්‌ දෙන හේ වක්‍රෝත්තියෙන් ජාතික මතවාදය වටා ගොනු වන පිරිස විසුරුවා හැරීමට මාන බලයි. එහෙයින් මේ වනාහී වම් හෝ දකුණු ඉවුරකට නොව නිකම්ම නිකං බෝක්‌කු ඇන්දකට හේත්තු වී කරන ලද නොහොබිනා කටමැත දෙඩවීමක්‌ පමණි. එයින් "ප්‍රවීණ දේශපාලන විචාරකයෙක්‌"ලෙස ඒ මහතා සතු පරිචය රටම තේරුම් ගත්තේ ය.

භික්‍ෂුව හා මැරකම -- සී. ඒ. චන්ද්‍රප්‍රේම

Read more
භික්‍ෂුව හා මැරකම -- සී. ඒ. චන්ද්‍රප්‍රේම

වම් ඉවුර
අපි සිංහල අවුරුද්දට පෙරත් පසුත් දේශපාලනික මැර ක්‍රියා දෙකක්‌ රූපවාහිනී නාලිකා ඔස්‌සේ දුටුවෙමු. මේ කාරණා දෙකම ගැන කතා කළ යුතු යෑයි සිතුවෙමි. ඉන් එක මැර ක්‍රියාවක්‌ වූයේ බොදුබල සේනාවේ භික්‍ෂූන් පිරිසක්‌ බෞද්ධ භික්‍ෂූන් හා වෙනත් ආගම්වල පූජකයන්ද හවුල් වී ජාතික බල සේනාව නමින් සංවිධානය කර තිබූ පුවත්පත් සාකච්ඡාවක්‌ රූපවාහිනී කැමරාවල සටහන් වන අයුරින්ම කඩාකප්පල් කිරීමයි. අවුරුද්දෙන් පසුව සිදුවූ මැර ක්‍රියාව වූයේ හම්බන්තොට වරාය හා ගුවන් තොටුපළ නිරීක්‍ෂණය කීරීමට ගිය එජාප මන්ත්‍රීවරුන් පස්‌ දෙනකුගේ සංචාරය දෙනෝදාහක්‌ බලා සිටියදී කඩාකප්පල් කිරීමයි. මේ අවස්‌ථා දෙකේදීම කඩාකප්පල්කාරීන්ට කීමට හේතු තිබිණි. බොදුබල සේනාව ප්‍රවෘත්ති සාකච්ඡාව කඩාකප්පල් කළේ එය විල්පත්තු වනයේ මුස්‌ලිම්වරුන් කරන අනවසර පදිංචිකිරීම් සාධාරණීකරණය කිරීමට පවත්වන ප්‍රවෘත්ති සාකච්ඡාවක්‌ය යන පදනම මතය. අනෙක්‌ අතට හම්බන්තොට සිද්ධියට මුල් වූ ආණ්‌ඩු පක්‍ෂයට අයත් පිරිස්‌ පවසනු ඇත්තේ හම්බන්තොට ව්‍යාපෘති නිරන්තරයෙන්ම විවේචනය කළ එජාපයේ මන්ත්‍රීවරුන් පස්‌ දෙනෙක්‌ මේ ආකාරයට එම ප්‍රදේශයට පැමිණ සංචාරයක්‌ කිරීම සිතාමතාම ඒ ප්‍රදේශයේ ආණ්‌ඩු පාක්‍ෂිකයන්ට එල්ල කරන ලද ප්‍රකෝප කිරීමක්‌ බවයි.

මේ සිද්ධීන් දෙකෙන් වඩාත්ම බරපතළ සිද්ධිය වන්නේ භික්‍ෂූන් පිරිසක්‌ තමන්ගේ විරුද්ධවාදීන්ගේ පුවත්පත් සාකච්ඡාවකට පැන කලහකාරී ලෙස හැසිරී බලහත්කාරයෙන්ම එය කඩාකප්පල් කිරීමයි. මෙය කිසිසේත්ම මේ රටේ සිංහල බෞද්ධ ජනතාව භික්‍ෂුවකගෙන් බලාපොරොත්තු වන හැසිරීම් විලාසයක්‌ නොවේ. භික්‍ෂුවකගේ බාහිර සංවරය, බෞද්ධ සභ්‍යත්වය සමග තදින්ම බැඳී තිබෙන කාරණයකි. පසුගිය වකවානුව පුරාම භික්‍ෂූන් ගිහියන් මෙන්ම සටන්පාඨ කියමින් පෙළපාලි යැම පොලිසිය සමග ගැටුම් ඇතිකර ගැනීම අපි දුටුවෙමු. පසුගියදා පුවත්පත් සාකච්ඡාවකට පැන මුළු ලෝකයටම පෙනෙන ආකාරයට තවත් භික්‍ෂුවකට තර්ජනය කොට බිය ගැන්වීම මේ පිරිහීමේ එක්‌තරා උච්ඡ අවස්‌ථාවක්‌ හැටියට අපට හැඳින්විය හැක. අතීතයේදී රටේ යම් අර්බුදකාරී අවස්‌ථාවක්‌ ඇතිවූ විට යුද්ධයට ගිය භික්‍ෂූන් ගැන අපි අසා ඇත්තෙමු. එසේ නමුත් ඔවුන් යුද්ධයට ගියේ කහ සිවුර ගලවා උපැවිදි වී ගිහියන් හැටියටය. සිවුර ඇඳගෙන යුද්ධයට යැමක්‌ ගැන අපි කොතැනකවත් අසා නැත්තෙමු. දැන් අපි වසර දෙක තුනක සිට දකින්නේ නොයෙක්‌ හේතු දක්‌වමින් සිවුර ඇඳගෙනම ගිහියන්ටත් වඩා කලබලකාරී ආකාරයට භික්‍ෂූන් හැසිරෙන දර්ශනයකි. මෙවැනි දෙයක්‌ සැබවින්ම අවශ්‍යද? මේ රටේ ඔය ආකාරයට කලබල කිරීමට සැබවින්ම හේතු තිබෙනවාද? ගිහියන්ට කරගත නොහැකි භික්‍ෂූන් වහන්සේලා මැරකමින් කළ යුතු කිසිම කර්තව්‍යයක්‌ අද තිබෙනවාද?

විල්පත්තු වනයේ මුස්‌ලිම්වරුන් අනවසර පදිංචි කරවීම් සිදුකරනවා නම් ඒවා ගැන කතා කිරීමට චම්පික රණවක, උදය ගම්මන්පිල, විමල් වීරවංශ, ගුණදාස අමරසේකර වැනි ගිහියන් විශාල පිරිසක්‌ සිටිති. මේ වනතෙක්‌ මේ රටේ සියලුම ප්‍රශ්න විසඳුවේ ගිහියන්ය. ප්‍රභාකරන් ඇතුළු කොටි සංවිධානයේ සියලුම නායකයන්ට වෙඩි තබා පරලොව යෑවුයේ ගිහියන්ය. මෑතකදී යළිත් දෙමළ ත්‍රස්‌තවාදයට මුල පිරීමට උත්සාහ ගත් "ගෝපි" නමැත්තා හා ඔහුගේ සගයන්ට වෙඩි තැබුවේත් ගිහියන්ය. මුළු ලෝකයම මවිත කළ ඒ යුද ජයග්‍රහණය ලැබුවේ ගිහි පිරිස්‌ පමණි. එම නිසා අනවසර පදිංචිකරවීමක්‌ වැනි දෙයක්‌ විස¹ ගැනීමට ගිහියන්ට හැකියාව ඇත. ඔය ප්‍රශ්නය විමල් වීරවංශ හෝ චම්පික රණවක කැබිනට්‌ මණ්‌ඩලයේදී පෙන්වා දීමෙන් හෝ පුවත්පත් සාකච්ඡාවකදී කීමෙන් පමණක්‌ විස¹ ගත හැකි දෙයකි.

භික්‍ෂූන් වහන්සේ එවැනි දේ සම්බන්ධයෙන් සිවුරු කරට ගෙන ප්‍රසිද්ධියේ කලබල කිරීමක්‌ අවශ්‍ය නැත. එවැනි දේවල්වලින් සිදුවන්නේ ඔවුන් කතා කරන ප්‍රශ්නය ගැන අවධානය යොමු වනවාට වඩා භික්‍ෂුවගේ අවිනීත හැසිරීම කෙරෙහි අවධානය යොමුවී මුළු බෞද්ධ සංහතියටම මහත් අවමානයක්‌ සිදුවීමයි. මේ භික්‍ෂූන් තමන්ගේ හැසිරීමෙන් සිංහල බෞද්ධ ජනතාව තුළ මහත් කම්පනයක්‌ ඇතිකරන බව හො¹කාරවම දැන දැනම නොයෙක්‌ හේතු කියමින් මේ ආකාරයට හැසිරෙති. පසුගිය වකවානුව පුරාම බොදුබල සේනාව, සිහල රාවය, රාවණා බළකාය වැනි සංවිධානවල භික්‍ෂූන් මුළු ලෝකයටම පෙනෙන ආකාරයට ප්‍රසිද්ධියේ මැරයන් මෙන් අවිනීතව හැසිරුණේ නොයෙක්‌ හේතු කියමින් වුවත් මේ එක හේතුවක්‌වත් ඔවුන්ට විසඳීමට වුවමනාවක්‌ ඇති බව පෙනෙන්නට නැත. ඔවුන් මෙතෙක්‌ කර ඇත්තේ අද එක හේතුවක්‌ හෙට තවත් හේතුවක්‌ පෙන්වමින් පෙළපාලි පවත්වමින් පොලිසිය සමග ගැටෙමින් නොයෙක්‌ මැර ක්‍රියාකාරකම්වල යෙදෙමින් බුදු දහමට නිගා කිරීම පමණි. එම නිසා මේ ව්‍යාපෘතිවල මුඛ්‍ය පරමාර්ථය වන්නේ බෞද්ධ ශාසනයේ ප්‍රතිරූපය බිඳ දැමීම බව සිතීමට හේතු සාධක ඇත.

යුද්ධය පැවති සමයේ මේ බොදුබල සේනාව, සිංහල රාවය, රාවණා බළකාය වැනි සංවිධානවල එක භික්‍ෂුවකගේවත් නම් ජනතාව අතර ප්‍රසිද්ධව තිබුණේ නැත. මොවුන්ගෙන් එක්‌ අයෙක්‌ වත් අඩුම වශයෙන් බණ කීමෙන් හෝ තමාගේ පන්සල් අවට සමාජ සේවය කිරීමෙන්වත් ප්‍රසිද්ධියක්‌ ලබා තිබුණේ නැත. රට ජාතිය ගැන මෙතරම් කැක්‌කුමක්‌ තිsබේනම් යුද්ධය පැවති සමයේ මේ භික්‍ෂූන් මායිම් ගම්මානවලට ගොස්‌ සිංහල ජනතාව සංවිධානය කිරීම වැනි කටයුතු කළ යුතුව තිබිණි. නමුත් මොවුන්ගෙන් එක්‌ අයෙක්‌වත් එවැනි දෙයක්‌ වත් කර ඇති බවක්‌ පෙනෙන්නට නැත. මේ සංවිධාන තුනේම භික්‍ෂූන් ප්‍රසිද්ධ වී ඇත්තේ නොයෙක්‌ මැර ක්‍රියා කිරීම හා භික්‍ෂුවකට තබා මැර දේශපාලනඥයකුටවත් නොගැළපෙන ආකාරයට අවිනීතව හැසිරීමෙන් පමණි. මේ කරුණු කාරණා ගැන සියලුම සිංහල බෞද්ධයන් ඉතා බරපතළ ලෙස කල්පනා කළ යුතුය.

යුද්ධය ජයගත් පසු සිංහලයා සිටියේ ආත්ම ගරුත්වය නැවත ලබාගත් තැනකය. අපට ආත්ම අභිමානයක්‌ තිබිණි. නමුත් දැන් ඒ අභිමානයට කැළලක්‌ වී ඇත්තේ මේ භික්‍ෂූන්ගේ හැසිරීමය. මේ රටේ ගිහියන්ට කලබල වීමට හේතුවක්‌ නැති වුවත් භික්‍ෂූන්ට කලබල වීමට පමණක්‌ නොව මැර ක්‍රියාවල යෙදීමටද හේතු පෙනේ. මේ අරුම පුදුම තත්ත්වය ඇතිවූයේ භික්‍ෂූන් පිරිසක්‌ නෝර්වේවලට ගිය පසුවය. ඒ වන තෙක්‌ අද මේ කලබල කරන භික්‍ෂූන් ද සිටියේ බොහෝ දුරට සන්සුන්වය. නමුත් අර ගමනින් පසු හැමෝටම එකවර වලිප්පුවක්‌ සෑදෙන බවක්‌ පෙනෙන්නට තිබිණි. නෝර්වේ රාජ්‍යය තම රටට ඒමට වීසා ලබා දෙන්නේ ඔවුන්ට ප්‍රයෝජනයක්‌ ඇති අයට පමණි. 1990 දී මා ද අයිලන්ඩ් පුවත්පතට සම්බන්ධ වූ අලුත එවක ඔස්‌ලෝ විශ්වවිද්‍යාලයේ සේවය කරමින් සිටි ආචාර්ය කුමාර් රූපසිංහ එම විශ්වවිද්‍යාලයේ මාස තුනක වැඩසටහනකට ආරාධනා කළේය. මා එකල තරුණයකු වුවත් ජවිපෙ දෙවන කැරැල්ල ගැන ද අයිලන්ඩ් පුවත්පතට ලිපි පෙළක්‌ ලියා ඉංග්‍රීසි පාඨකයාගේ අවධානයට යොමුවී සිටි අයෙකි. ඔස්‌ලෝ විශ්වවිද්‍යාලයේ වැඩසටහන ද ත්‍රස්‌තවාදය ඇතුලු කාරණා සම්බන්ධව විය. නමුත් නෝර්වේ තානාපති කාර්යාලයෙන් මට එම වැඩසටහනට සහභාගි වීමට වීසා දුන්නේ නැත. ඔවුන් වීසා දෙන්නේ තමන්ට යම් ප්‍රයෝජනයක්‌ ඇති අයට පමණි. ඇමරිකා එක්‌සත් ජනපද තානාපති කාර්යාලයද එසේමය. සාමාන්‍යයෙන් යම් රටක ජාතිවාදී ගැටුම් ඇතිකරමින් කලබල කරන පිරිස්‌වලට ඇමරිකානු තානාපති කාර්යාලය වීසා ලබාදෙන්නේ නැත. නමුත් බොදුබල සේනාව පසුගිය වකවානුවේ ඇමරිකාවේත් සංචාරය කළ බව අපි දනිමු. ඇමරිකාවෙන් වීසා නොදී සිටීමට අපරාධයක්‌ කළ යුතුම නැත. ඔවුන් ඉන්දියාවේ නරේන්ද්‍ර මෝඩිට වත් වීසා දෙන්නේ නැති තැන බොදුබල සේනාව ලංකාවේ කලබල ඇතිකිරීමට පටන්ගත් පසුත් ඔවුන්ට වීසා ලබා දෙයි. මෙහි ඇති අරුමය කුමක්‌ද? ඉන් පසු ලංකාවේ ආගමික සංහිඳියාව නැතැයි කියමින් එක්‌සත් ජාතීන්ගේ සංවිධානයේ යෝජනා සම්මත කරගත්තේත් ඇමරිකාවමය·

බොදු බල සේනාව, රාවණා බලකාය, සිහල රාවය වැනි සංවිධාන වලට පිරිස්‌ එකතු කර තැන් තැන්වල කලබල ඇති කිරීමට සම්පත් ලැබෙන්නේ කෙසේද? මේ ආකාරයට පිරිස්‌ එකතු කර කලබලවලට යෙදවීම දේශපාලනඥයන්ටත් පහසු කාරණයක්‌ නොවන බව අපි දනිමු. දේශපාලනඥයන්ද එවැනි කටයුතු කරන්නේ තම ගෝලබාලයන්ට උදවු පදවු කොට අත දිග හැර මුදල් වියදම් කිරීමෙනි. මේ රට ජාතියට ඇති කැක්‌කුම නිසා එන පිරිස්‌ යෑයි කීම බොරු කතාවකි. එසේ නම් දේශපාලනඥයන්ටද පක්‍ෂය ගැන කැක්‌කුම නිසා ඕන දේකට එන පිරිස්‌ සිටිනවා විය යුතුය. එවැනි පිරිස්‌ සිටියත් කැක්‌කුමෙන් පමණක්‌ සියල්ල කළ නොහැකි බව අපි දනිමු. විශේෂයෙන්ම නිතර නිතර සිදුවන ක්‍රියාකාරකම් වලට කැක්‌කුම ඇති අය වුවත් සහභාගි කරවා ගැනීම අසීරුය. එපමණක්‌ද නොව මේ කැක්‌කුම්කාරයන් මතු වී ඇත්තේද වැරදි වෙලාවකය. මොවුන් සිටිය යුතුව තිබුණේ යුද්ධය පැවති සමයේය. දැන් මේ යුද්ධය අවසන් වී රටේ සාමයක්‌ තිබිය යුතු අවස්‌ථාවේදී ඒ පවතින සාමය බිඳ දමන්නේ බෞද්ධ භික්‍ෂූන් වහන්සේලා පිරිසකි. ඔවුන් රටේ සුළු ජාතීන්ගේ ක්‍රියාකාරකම්වලට එරෙහිවනවා යෑයි කීවද ඔවුන්ගේ ක්‍රියාකාරකම් වලින් වැඩියෙන්ම හානි සිදුවන්නේ සිංහල බෞද්ධයන්ටය. අද කහ සිවුර දකින විට පිළිකුලක්‌ ඇතිවන තත්ත්වයක්‌ මේ කුමන්ත්‍රණකාරීන් රටේ ඇතිකර තිබෙන බව පොදු මතයයි.

බොදු බල සේනාව, රාවණා බලකාය, සිහල රාවය යන සංවිධානවල භික්‍ෂූන් අතර අඩු ගණනේ බණ දේශනා කිරීමෙන් හෝ සමාජ සේවය කිරීමෙන් හෝ මායිම් ගම්මානවල සිංහලයන් සංවිධානය කිරීමෙන් හෝ ප්‍රසිද්ධියක්‌ ලබා ඇති එකදු භික්‍ෂුවක්‌ වත් නැති බව මම කලින් කීවෙමි. නමුත් ප්‍රසිද්ධියේ සිදුවන මැරකම්වලට සහභාගි නොවූවත් එමෙන්ම දැන් වැඩිය පෙනෙන්නට නොසිටියත් බොදුබල සේනාව ආරම්භ වන අවස්‌ථාවේ කිරම විමලජෝති හිමිද එහි ප්‍රබල සාමාජිකයෙක්‌ විය. කිරම විමලජෝති යනු මේ රටට අතිවිශාල සේවයක්‌ කළ සංඝ පීතෘ වරයෙකි. අන් සියල්ලම පැත්තක තබා නැදිමාලේ බෞද්ධ පොත් සාප්පුව ආරම්භ කිරීම පමණක්‌ සියල්ලටම සෑහේ. මේ පොත් සාප්පුව විවෘත කරන තුරු බුදු දහම ගැන ලංකාවේ පමණක්‌ නොව පිටරටවලද ලියන ලද ශාස්‌ත්‍රීය කෘති මිලදී ගැනීමට තැනක්‌ නොතිබිණි. ත්‍රිපිටකයේ මුල් කෘති පාලියෙන් හෝ පරිවර්තනයක්‌ වශයෙන් හෝ මිලදී ගැනීමට තැනක්‌ නොතිබුණි. නමුත් එම පොත් සාප්පුව ආරම්භ කළ පසු මෙවැනි කෘතිවලට වෙනම වෙළෙඳපොළක්‌ද නිර්මාණය වී ඒවා මුද්‍රණය කිරීමද වැඩි වී ඇත. එම පොත් සාප්පු ආරම්භ කිරීමට පෙර බුදුදහම ගැන ශාස්‌ත්‍රීය පරීක්‍ෂණයක්‌ කිරීමට නම් මේ සම්බන්ධයෙන් රටේ ඇති පුස්‌තකාල කීපයකට ගොස්‌ නිලධාරීන් ඉදිරියේ වැඳවැටී නොයෙක්‌ නීති රැසකට යටත්ව ඒ පොත් පරිශීලනය කිරීමට සිදුවිය.

නැදිමාල පොත් සාප්පුව විවෘත කිරීමෙන් කිරම විමලජෝති හිමියන් කළේ බුදු දහම ගැන ශාස්‌ත්‍රීය හැදැරීමක්‌ කරන අයට විමුක්‌තිය ලබාදීමකි. උන්වහන්සේ වැනි අයෙක්‌ මේ දැන් සිදුවන පාපකර්මයට සම්බන්ධ වූයේ කෙසේදැයි මට නම් වැටහෙන්නේ නැත. උන්වහන්සේ සමඟ බොදුබල සේනාවේ සිටින භික්‍ෂූන් ප්‍රසිද්ධියේ හැසිරෙන ආකාරයට දේශපාලනඥයෙක්‌ හැසිරුනොත් හේතුව කුමක්‌ වූවත් ජනතාව තුළ එම දේශපාලනඥයාගේ දේශපාලන පක්‍ෂය ගැන ඇතිවන්නේ මහත් පිළිකුලකි. මොනම මැර දේශපාලනඥයෙක්‌ වත් හැසිරෙන්නේ නැති තරම් අවිනීත ආකාරයට බෞද්ධ භික්‍ෂුවක්‌ හැසිරෙනවා දැකීමෙන් අන්‍යආගමිකයන් තුළ පමණක්‌ නොව බෞද්ධයන් තුළත් ඇතිවන කම්පනයත් පිළිකුලත් විමලජෝති හිමියන්ට වැටහෙන්නේ නැත්ද යන්න ප්‍රශ්නයකි. නැදිමාලේ පොත් සාප්පුවෙන් ලංකාවේ උගත් පිරිස්‌ අතර බෞද්ධ උද්දීපනයක්‌ ඇතිවූයේ නම් දැන් මේ ඇති වී තිබෙන භික්‍ෂු ප්‍රචණ්‌ඩත්වයෙන් ඒ සියල්ලම කණපිට හැරෙමින් පවතී.

සිංහලයා යුද්ධයක්‌ දිනා රටක්‌ එක්‌සේසත් කොට ආත්මගරුත්වයෙන් යුතුව හිනිපෙත්තටම නැග සිටින අවස්‌ථාවකි මෙය. මේ ගිහියන්ට වත් නැති කුලප්පුවක්‌ භික්‍ෂූන් තුළ ඇතිවිය යුතු යුගයක්‌ නොවේ. මේ භික්‍ෂු ප්‍රචණ්‌ඩත්වය බටහිර රටවල්වලින් සිංහල බෞද්ධයාගෙන් පළි ගැනීමට සිංහල අනන්‍යතාව විනාශ කිරීමට සිතාමතාම කරන කුමන්ත්‍රණයක ප්‍රතිඵලයක්‌ බව මා නැවතත් පවසන්නේ මේ නිසාය.

හම්බන්තොට සිද්ධිය ගැනද යමක්‌ කිවයුතුය. එජාප මන්ත්‍රීවරුන් පිරිසට ආණ්‌ඩු පාක්‍ෂික මැරයන් තර්ජනය කරනු දැක මා තුළ ඇතිවූයේ පිළිකුලකට වඩා සහනදායී හැඟීමකි. බොහෝ කාලයකට පසු භික්‍ෂූන් නොව ගිහියන් මැරකමේ යෙදෙනු දැකීම සැබවින්ම සහනයක්‌ විය. එතන සිදුවූයේ කුමක්‌දැයි මම හරිහැටි නොදනිමි. මැරකමක්‌ නම් සිදුවූ බව දනිමි. එය කළේ හම්බන්තොට නගර සභාවේ සභාපති එරාඡ් ප්‍රනාන්දු බව එජාප මන්ත්‍රීවරු කියති. නමුත් එරාඡ් කියන්නේ ඔහු ඔවුන්ව කලබලකාරීන්ගෙන් බේරා ගැනීමට ගිය බවයි. ඒ කෙසේ වෙතත් මෙතන මැරකමක්‌ නම් සිදුවූ බව පැහැදිලිය. නමුත් මෙය සිදුවූයේ ලංකාවට දැන් හුරුපුරුදු ආකෘතියට නම් නොවේ. මින් ඉදිරියට ආණ්‌ඩු පාක්‍ෂිකයන් මෙවැනි කලබල ඇතිකරන්නේ නම් ඔවුන් කළ යුත්තේ අටපිරිකර කීපයක්‌ මිලදී ගෙන පාත්තරය විසිකොට එහි ඇති දැලි පිහියෙන්ම මැරයන් කීපදෙනකුගේ හිස මුඩුකොට ඔවුන්ට සිවුරු අන්දවා මැරකමට යෙදවීමයි. ලෝකය දැන් පුරුදු වී ඇත්තේ එවැනි දර්ශනවලටය. මැරයන්ටද ජනතාවගේ සාදුකාර මැද්දේ තමන්ගේ මැරකම් කිරීමට හැකිවනු ඇත.

සී. ඒ. චන්ද්‍රප්‍රේම
Read more
Saturday, April 26, 2014
තගිස්තානය -තිසරණී ගුණසේකර

තිසරණී ගුණසේකර -

‘‘කාන්තාවන්ට එරෙහි හිංසනයට පිරිමින්ට වරද පටවලා හරි යන්නේ නැහැ. කාන්තාවන්ම තමයි වගකියන්න ඕනේ.’’ - කතානායක චමල් රාජපක්ෂ

අමිනාල් අල්-ෆිලාල් දූෂණයට ලක්වන විට ඇයට වයස පහළොවකි.

mahinda and shiranthiමොරොක්කෝවේ අපරාධ නීති සංග‍්‍රහයට අනුව, දූෂණයට ලක්වූ තැනැත්තියව විවාහ කරගන්නේ නම්, දූෂකයාට අපරාධයේ වගකීමෙන් ගැලවිය හැකිය. තමා දූෂණය කළ තැනැත්තා සමග විවාහ වීමට අමිනාට
Read more
Friday, April 25, 2014
කේමදාසලා සරත් දසනායකලා අහිමි දූපතක් යානිව වැළඳ ගන්නේ ඇයි?

කේමදාස මිය ගොසිනි. ජෝතිපාලද මිය ගොසිනි. එසේම සරත් දසනායක ද ජීවතුන් අතර නැත. මේ තිදෙනාම මෙරට සංගීත සංස්කෘතියෙහි බල කණුය. අමරදේවයන් දැන් වියපත්ය. රූකාන්තට රට හැර යන්න සිදුවිය. අවසානයේ නන්දා මාලනී වික්ටර් රත්නායක ද කැටුව ‘සිරස’ වේදිකාවට ගොඩවූවාය. විශාරද එඩ්වඩ් ජයකොඩි ජැක්සන් ද සමග රණවිරු රියල් ස්ටාර් වේදිකාවේය. විශාරද චන්ද්‍රිකා සිරිවර්ධන සමිතා ද සමග සුපර් ස්ටාර් වේදිකාවේය. විශාරද රශ්මි සංගීතා, කීර්ති පැස්කුවල් සමග ලිට්ල් ස්ටාර් වේදිකාවේය. දිවුල්ගනේ නිදහස් කලා සන්ධානය නමින් තැනුණු දේශපාලන වේදිකාවට සහ එතැනින්
Read more
Thursday, April 24, 2014
කහ සිවුර ලෙළවා හනුමලා චූන් කිරීම

"මේ රටේ ඕනෑම ආගමක්‌ ඇදහීමේ නිදහස තිබෙනවා. ඕනෑම තැනක ජීවත්වීමේ අයිතිය තිබෙනවා. ඒක නැති කරන්න අපට බෑ. ඒක ආණ්‌ඩුක්‍රම ව්‍යවස්‌ථාවේ සඳහන් වෙලා තියෙනවා. ඒ වගේම එහි සඳහන් වෙලා තිබෙනවා බුදු දහම රාජ්‍ය අනුග්‍රහය ඇතිව ආරක්‍ෂා කරනවා කියලා. ඒ ව්‍යවස්‌ථාව ඒ විදිහටම තිබෙනවා. ඒවා වෙනස්‌වෙලා නෑ. ඒ නිසා ඒක ගැන කවුරුවත් කලබල වෙන්න ඕනෙ නැහැ. ඒක රැකගැනීම, අනෙක්‌ ආගම් අතර
Read more
Wednesday, April 23, 2014
ක්‍රිකට් වීරයන්ට කටු ඔටුනු

තිඹිරිගෙදර සිට සුසානය දක්වා මේ දිවයිනේ ඇති සියලු දේ ඊනියා දේශපාලනයේ බලපරාක්‍රමයට නතු වූයේ අද ඊයෙක නොවේ. මේ ඊනියා දේශපාලනයේ අනවශ්‍ය මැදිහත්වීම නිසා අවුල් ඇතිවී ඇති එක් අංශයක් වන්නේ ක්‍රීඩාවය. ලංකාවේ ජනප්‍රියම ක්‍රීඩාව ලෙස සැලැකිය හැකි ක්‍රිකට්වලටද දේශපාලන හෙනහුරාගේ බැල්ම වැටී මේ වන විට සැලැකිය යුතු කාලයකි. ක්‍රිකට් ආයතනයේ මුල් පුටුවලට නිලධාරීන් පත්කිරීමේ සිට ජාතික කණ්ඩායමට ක්‍රීඩකයන්
Read more
Monday, April 21, 2014
බොදු බල සේනාව කරන්නේ ආණ්ඩුවයි, බුද්ධාගමයි දෙකම විනාශ කිරීමේ කුමන්ත්‍රණයක්  ----  ප්‍රවීණ දේශපාලන විචාරක( Gota's War ලියු )සී.ඒ.චන්ද්‍රප්‍රේම

බොදු බල සේනාව ඇතුළු බෞද්ධ සංවිධාන කිහිපයක් සම්බන්ධයෙන්, දේශපාලන විචාරකයකු ලෙස,ඔබ  දැඩි විවේචනයක් කර තිබුණා. මුලින්ම ඔබගේ මේ විවේචනයේ පදනම ගැන යම් හැඳින්වීමක් කරන්න?

ප්‍රධාන වශයෙන් මගේ විවේචනයට ලක්වන්නේ මේ ආගමික සංවිධානවල හැසිරීමයි. කිසියම් ගැටලුවක් ඇතිනම් ඒ සම්බන්ධයෙන් කටයුතු කළ යුතු ආකාරයක් තිබෙනවා. එවැනි කාරණයකදී විශේෂයෙන්ම බෞද්ධ භික්ෂුවක් කටයුතු කළ යුතු ආකෘතියක් තිබෙනවා. එසේ නොකර කලබලකාරී තත්ත්වයක්, ගැටුම්කාරී තත්ත්වයක් ඇති කළ විට එය ගැටලුවක් වෙනවා. සාමාන්‍යයෙන් කලබලකාරී තත්ත්වයන් ඇති කරන්නේ ගිහි පුද්ගලයිනුයි. පූජ්‍ය පක්ෂයේ අය එවැනි කලබලකාරී තත්ත්වයක් ඇති කළ විට ඒ කරුණ මතම ගැටලුවක් ඇති වෙනවා.
දැන් ආගම පැත්තකින් තියලා දේශපාලනය ගන්න. දේශපාලනඥයෙක් කිසියම් කරුණක් සම්බන්ධයෙන් මැරයෙකු සේ කටයුතු කරනවානම් ජනතාවගේ සිත් සතන් තුළ වඩාත් අවධානයට ලක්වන්නේ ඔහුගේ එම මැර හැසිරීමයි. එසේ නැතිව ඔහු කියන කාරණය ජනතාව අතරට යන්නේ නැහැ. එම මැර දේශපාලනඥයින් පිළිබඳව ජනතාව තුළ ඇතිවන්නේ වෙනස් ආකාරයක ප්‍රතිරූපයකුයි. යම් දේශපාලන පක්ෂයක අයෙක් ඒ ආකාරයට කටයුතු කළ විට ලැබෙන ප්‍රතිචාරය එසේනම් භික්ෂූන් වහන්සේ නමක් සිවුරක් දමාගෙන ඔය ආකාරයට හැසිරීමෙන් ඇතිවන තත්ත්වය කෙසේදැයි සිතාගත හැකියිනේ. සිවුරක් දමාගත් අයෙකුගේ මැර හැසිරීමෙන් හානියක් වන්නේ බුද්ධාගමටමයි.
බොදු බල සේනාව ඇතුළු සංවිධාන විසින් රටේ සිදුවනවා යැයි කියන කාරණාවලින් බුද්ධාගමට කිසියම් හානියක් වන්නේද, ඔය භික්ෂූන් වහන්සේලාගේ හැසිරීම නිසා ඒ හානිය වගේ දස ගුණයක හානියක් සිදුවෙනවා.
බෞද්ධ භික්ෂුවක් කියන්නේ ආගමික ස්වරූපය අතින්ම වෙනස් කෙනෙක්. මේ වගේ කටයුතු නිසා බෞද්ධ භික්ෂූන් වහන්සේලාගේ ප්‍රතිරූපය කඩා වැටීමේ අවදානමක් තිබෙනවා. මේ වගේ තවත් සංවිධානයක් හරක් මස් තහනම් කරන්න කියලා බලපෑම් කරනවා. හරක් මස් කන බහුතරය සිංහල බෞද්ධයින්. ඔවුන් කළයුතු වන්නේ හරක් මස් නොකන තැනට ජනතාව ‍පොළඹවන එකයි. එසේ නැතිව බලහත්කාරයෙන් ආණ්ඩුව ලවා කරන්න යන එක නොකළ යුතුයි.

මේ ආකාරයට බොදු බල සේනා සංවිධානය ඇතුළු සංවිධානවල භික්ෂූන් වහන්සේලා ප්‍රචණ්ඩ ආකාරයෙන් හැසිරීමට හේතුව කුමක් විය හැකිද?
මේ ආකාරයට හැසිරෙන එකේ ඇති වරද උපසම්පදාව ලැබූ භික්ෂුවකට නොතේරෙන්න විදියක් නැහැ. ඔවුන් කරන දේවල්වලින් ඇතිවන බලපෑම ඔවුන්ට තේරෙනවා. ඕනකමින්ම තමයි මේ භික්ෂූන්වහන්සේලා ප්‍රචණ්ඩකාරී ආකාරයට හැසිරෙන්නේ. මේ අය සිවුරටත් නිගා දෙන ආකාරයට තමයි හැසිරෙන්නේ. මම විශ්වාස කරන ආකාරයට විදේශීය බලවේගවලට වුවමනා ආකාරයට මේ භික්ෂූන් වහන්සේලා කටයුතු කරන බවයි.

එසේ කියන්නේ ඇයි?
මම එසේ කියන්නේ හේතු ඇතිවයි. මේ සංවිධාන කාලයක් තිස්සේ වර්ධනය වූ සංවිධාන නොවෙයි. යුද්ධය පැවති කාලයේදී මේ අය සිවුරු දමාගෙන මේ ආකාරයට දිව්වේ පැන්නේ නැහැ. යුද්ධය ඉවරවුණාට පස්සේ එක්වරම මේ අය මතුවෙන්න ගත්තා. යුද්ධය කාලයේ තිබුණේ නැති ජාතික බලවේගයක් යුද්ධයෙන් පසුව මතුවුණේ කෙසේද?
දැන් ප්‍රචණ්ඩ ආකාරයට හැසිරෙන භික්ෂූන්වහන්සේලාගේ නම් යුද්ධය කාලයේදී ජනතාව දැනගෙන සිටියේවත් නැහැ. මැරකම් කරන දේශපාලනඥයෝ වගේ මැරකම් කරලා තමන්ගේ නම ප්‍රසිද්ධ කරගන්න වෙන්න ඇති මේ භික්ෂූන් කටයුතු කරන්නේ. මැර ක්‍රියාවලින් තමන්ගේ ‘කීර්ති නාමය’ සකස් කරගෙන තිබෙනවා. ඒක අපේ කම්පනයට තුඩු දිය යුතුයි.

බොදු බල සේනාව පිටුපස විදේශ බලවේග සිටිනවා යැයි ඔබ කියනවා නම් එසේ සිටින විදේශ බලවේග මොනවාද?
චිලී රාජ්‍යයේ ආණ්ඩු පෙරළීම සඳහා ඇමෙරිකාව කටයුතු කළ ආකාරය පිළිබඳව ඇමෙරිකානු කොංග්‍රස් මණ්ඩලය විසින්ම වාර්තා ඉදිරිපත් කර තිබෙනවා. ඇමරිකානු සී.අයි.ඒ. ඔත්තු සේවාවන් කාලයක් තිස්සේම චිලී රාජ්‍යයේ ක්‍රියාත්මක වුණා. පිටතින් කටයුතු කරමින් තමන්ට සතුරු බලවේග විනාශ කිරීමට නොහැකි විට ඔවුන් එම සතුරු බලවේග තුළට ගොස් ඒවා විනාශ කිරීමට උත්සාහ ගන්නවා. නැතිනම් එම බලවේග මෙල්ල කරනවා. දැන් බටහිර රටවල සතුරන් සේ සලකන්නේ අපේ රටේ සිංහල ජාතිකවාදී බලවේගයි. එළියෙන් ඇවිත් පහරදීලා එම ජාතිකවාදී බලවේග බිඳහෙළිය නොහැකියි. පිටතින් පහරදෙන්න පහර දෙන්න එම ජාතිකවාදී බලවේග ශක්තිමත් වෙනවා. ඒ නිසා ඇතුළට ගොස් ඒවා විනාශ කළ යුතුයි. බොදු බල සේනාව හරහා මේ ක්‍රියාත්මක වන්නේ මේ රටේ ජාතිකවාදී බලවේග විනාශ කිරීමේ කුමන්ත්‍රණය කියලයි මම හිතන්නේ.
එසේ ජාතිකවාදී බලවේග විනාශ කිරීම සඳහා ගනු ලබන කුමන්ත්‍රණයක් බව පැහැදිලි වන්නේ බොදු බල සේනාවේ ක්‍රියාකාරීත්වය එක්වරම මතුවීම නිසයි. එක්වරම ක්‍රියාත්මක වෙලා කිසියම් තැනක ගැටුමක් ඇතිකිරීමේ හැකියාව මොවුන් සතුවෙනවා. ඒවාට සම්පත් අවශ්‍යයි. දැන් මැතිවරණ රැස්වීමක් පවත්වන්න ගියත් නිකම්ම ඒකට මිනිස්සු අදින්න බැහැනේ. ඒකට මුදල් අවශ්‍යයි. සම්පත් අවශ්‍යයි. මේ අය දැන් මිනිස්සු ඇදගෙන ගිහින් විරෝධතා, උද්ඝෝෂණ කරන විදියට ඒ කාලයේදී මායිම් මිනිස්සු අරගෙන එන්න තිබුණානේ. ඒත් එහෙම කළේ නැහැනේ. දැන් මේ අය කරන මැරකම් වගේ මැරකම් කොටි ඉන්න කා‍ලේ කළානම් එදා කොටි ඉදිරියේ දනින් වැටීමේ අවශ්‍යතාවක් ඇතිවෙන්නේ නැහැ. මේ අයට දැන් ඇවිත් තියෙන ජාතිකවාදී හැඟීම එන්න තිබුණේ මීට අවුරුදු දහයකට පහළොවකට කලින්. එදා පහරදීලා විනාශ කළ නොහැකිවූ ජාතික බලවේගය දැන් සිවුර තුළින්ම විනාශ කිරීමේ කුමන්ත්‍රණයක් තමයි ක්‍රියාත්මක වෙන්නේ.

බොදු බල සේනාව ඇතුළු සංවිධාන හැසිරෙන ආකාරයේ ගැටලුවක් තිබුණාට ඔවුන් මතුකරන කාරණාවල ගැටලුවක් නැහැ නේද?
ඔවුන් මතුකරන කාරණාවල නොවෙයි ගැටලුව තිබෙන්නේ. ඔවුන් එම කරුණු කතා කළාට කමක් නැහැ. ඒත් එය කළ යුතු ආකාරයක් තිබෙනවා. ඔවුන් ක්‍රියාකරන ආකාරයේ තමයි ගැටලුව තිබෙන්නේ.

බොදු බල සේනා ඇතුළු සංවිධාන මේ ආකාරයෙන්වත් කටයුතු කරන්නේ නැතිනම් බුදුදහමට හා බෞද්ධයින්ට එරෙහිව  දැනට ඇතිවෙමින් තිබෙන තත්ත්වයන් පිළිබඳ සමාජයේ කතිකාවක් ඇතිවන්නේ නැහැ කියලා කෙනෙක් කියන්න පුළුවන්. 
දැන් පාඨලී චම්පිකලා, උදය ගම්මන්පිලලා, විමල් වීරවංශලා, ගුණදාස අමරසේකරලා වගේ අයත් මේ ප්‍රශ්න ගැන කතා කරනවානේ. මේ අය මේ වගේ ගැටලු විසඳගත්තේ මැරකම් කරලාද?
අනෙක ප්‍රභාකරන් විනාශ කළේ ගිහියෝ වෙඩි තියලා. ත්‍රස්තවාදීන්ට යළිත් නැගී සිටිය නොහැකි ආකාරයට ප්‍රහාර එල්ල කළේ ගිහියෝ. දැන් මේ හාමුදුරුවරුන් මතුකරන ගැටලු ගැන කතා කිරීමට සිංහල බෞද්ධයින් සිටිනවා. බොදු බල සේනාවේ හාමුදුරුවෝ අනවසර පදිංචිකරුවන් ගැන කතා කරනවානම් ඒ ගැන කතා කිරීමට සිංහල බෞද්ධ ගිහියන් සිටිනවා. ඒකට හාමුදුරුවරුන් මේ වගේ ප්‍රචණ්ඩ ආකාරයට  මැදිහත් විය යුතු නැහැ. චම්පිකලා, උදයලා, විමල්ලා, අමරසේකරලා ඉන්නේ මේ වගේ දේවල් කතා කරන්නයි. මේ ප්‍රශ්න කතා කරන එක ගිහි අයට භාරදිය යුතුයි.
දැන් හාමුදුරුවරු සිවුරත් උස්සාගෙන ඕවා ගැන කතා කරන්න යනවා. ඒත් යුද්ධය කාලයේදී චම්පිකලා සරම කැහැපට ගහගෙන යුද්ධයට ගියේ නැහැ. ඒ අය කටයුතු කළේ ඒ විදියට නම් භික්ෂූන් වහන්සේ කෙනෙක් හැසිරෙන ආකාරය මීට වඩා වෙනස් විය යුතුයි.

බොදු බල සේනාව ආණ්ඩුවේම ඇතැම් පාර්ශ්ව විසින් මෙහෙයවනු ලබන සංවිධානයක් බවටත් චෝදනා එල්ලවෙනවා. ආණ්ඩුවට මෙවැනි සංවිධානයක් නඩත්තු කිරීමේ අවශ්‍යතාවක් තිබෙනවාද?
බොදු බල සේනාව වගේ සංවිධානයක් පවත්වාගෙන යාමෙන් ආණ්ඩුවට කිසිදු වාසියක් අත්වන්නේ නැහැ. එයින් ආණ්ඩුවට සිදුවන්නේ අවාසියක් පමණයි. බොදු බල සේනාවේ හාමුදුරුවන්ගේ හැසිරීම ජාතියටම අපහාසයක්. යුද්ධය ජයග්‍රහණය කරලා ඔළුව ඔසවන ජාතියකට කරන නිගාවක් තමයි මේ භික්ෂූන් වහන්සේලා කරන්නේ. ඒ විතරක් නොවෙයි සිවුරටත් නිගා කරනවා. හාමුදුරුවෝ මැරකමට යොමු කළා කියලා ආණ්ඩුවට එයින් කිසිදු වාසියක් අත්වෙන්නේ නැහැ. මොකද මේ අය ඡන්දයක් කාලයට ඡන්ද ව්‍යාපාරයට එන්නේත් නැහැනේ. ඒ වගේම මේ අය නිසා ආණ්ඩුව ගැන ජනතාවගෙන් හොඳ ප්‍රතිරූපයක් ලබාගැනීමටත් නොහැකියි.
මේ අය දැන් සූදානම් වෙන්නේ ආණ්ඩුවත් විනාශ කරගෙන බුද්ධාගමත් විනාශ කිරීමටයි. ලංකාවේ ජාතිකවාදී ව්‍යාපාරයේ සාර්ථක පියවරක් තමයි මේ ආණ්ඩුව. මේ අය ජාතිකවාදී ආණ්ඩුවට වගේම බුද්ධාගමටත් කරන්නේ හානියක්. බොදු බල සේනාවේ එක් භික්ෂූන් වහන්සේ නමක් ප්‍රසිද්ධ රූපවාහිනී නාලිකාවකට ඇවිත් තමන් නෝර්වේ යන විට ඒ බව
ආරක්ෂක අමාත්‍යංශයට දැනුම් දුන් බව පැවසුවා. හාමුදුරු නමක් නෝර්වේ යන විට ඒ බව ආරක්ෂක අමාත්‍යංශයට කියන්නේ ඇයි? අනෙක යුද්ධය පැවති කාලයේදී නෝර්වේ ආණ්ඩුව හා ලංකාවේ ආණ්ඩුව අතර තිබුණේ විශම සම්බන්ධයක්. මේ වගේ ප්‍රකාශ කරන්නේ යුද්ධය දිනා ගෞරවයක් අත් කර දුන් ආණ්ඩුව ගැරහීමට ලක් කිරීමටයි. ආණ්ඩුව ගැන වැරදි චිත්‍රයක් ඇති කිරීමටයි.

බොදු බළ සේනාව ත්‍රස්තවාදී සංවිධානයක් බවට ‘ට්‍රැක්’ නමැති සංවිධානය විසින් හඳුන්වා දී තිබෙන බව වාර්තා වුණා. එය විග්‍රහ කළ හැක්කේ කෙසේද?
ත්‍රස්තවාදී සංවිධානයක් කියන්නේ ආයුධ අරගෙන යන සංවිධානයක්නේ. මොවුන් අතේ ආයුධ නැහැ. ඒත් මේ අය සිවුරට නිගා කරනවා. මොවුන් බුද්ධාගමට එරෙහි ත්‍රස්තවාදයක් තමයි ක්‍රියාත්මක කරන්නේ. ප්‍රවෘත්ති සාකච්ඡාවකට සහභාගි වූ භික්ෂූන්වහන්සේ නමක් බය කළ හැටි අපි රූපවාහිනියෙන් දුටුවානේ. අපේ රටේ මහානායක හිමිවරුන් ඉන්නවා. ඒ අය කැසිනෝවලට විරුද්ධව කතා කරනවා. ඒත් මහානායක හිමිවරුන් මේ ගැන කිසිම අවවාදයක් කළේ නැහැ. මේ අය මහානායක හාමුදුරුවොත් වට කරලා දැනටමත් තර්ජනය කර තිබෙනවාද දන්නේ නැහැ. දැන් දේශපාලනය ගැන කතා කරන සෝභිත හාමුදුරුවෝ වගේ හාමුදුරුවෝවත් මේ ගැන කතා කරන්නේ නැහැනේ.

බොදු බළ සේනාවේ ක්‍රියාකාරීත්වය නිසා ජාත්‍යන්තරව ලංකාවට එල්ලවන පීඩනය කුමන ආකාරයක් ගන්නවාද?
මේ අයගේ ක්‍රියාකාරීත්වය නිසා ජාත්‍යන්තර වශයෙන් ලංකාවට තිබෙන ප්‍රතිරූපය විනාශයට පත්වෙනවා. දැනටමත් එය සිදුවෙලා. ආගමික උම්මත්තයකින් සිටින රටක් ලෙස තමයි අපේ රට නම් කෙරෙන්නේ.

මෙම සංවිධාන කටයුතු කරන ආකාරයට ඉදිරියටම කටයුතු කළොත් මොනවා සිදුවෙයිද?
මේ අය කටයුතු කරන විදියට කටයුතු කළොත් තවත් අවුරුදු දහයක් පහළොවක් යද්දී බුදුදහම නැතිවෙලා යාවි. විදේශ බලවේගවලට ලංකාවෙන් පලිගත හැකි හොඳම ආකාරය තමයි සිංහල බෞද්ධ අනන්‍යතාව විනාශ කරන එක. දැන් මේ යන ගමනේ අවසානය එය විය  හැකියි.
Read more
Sunday, April 20, 2014
මත්තල පිස්‌තෝල මෙහෙයුම!

හම්බන්තොට වරාය, මත්තල ගුවන් තොටුපළ ඇතුළු හම්බන්තොට දිස්‌ත්‍රික්‌කයේ නව සංවර්ධනය දැක බලා ගැනීම සඳහා ඒ ප්‍රදේශයේ සංචාරයක නිරත වූ එජාප මන්ත්‍රී පිරිසකට මත්තල දී මැර ප්‍රහාරයක්‌ එල්ල වූ බව කියෑවෙන පුවතක්‌ ඉකුත් 18 වැනිදා දිනපතා දිවයින පත්‍රය ඡායාරූපද සහිතව වාර්තා කර තිබිණි. හම්බන්තොට නගරාධිපතිවරයාද පිස්‌තෝලයක්‌ රැගෙන එජාප මන්ත්‍රීවරුන් ගමන් කළ බස්‌රිය ලුහුබැඳ ගිය බවක්‌ද කියෑවිණි.

මේ සිද්ධියට සම්බන්ධ වූවෝ කවරහුද? ඒ සඳහා සේනා සංවිධානය කළෝ කවරහුද යන්න පිළිබඳව තවම නිශ්චිතව කිව නොහැක. ඇතැම් විටෙක මේ කියන නගරාධිපතිවරයා බියට පත්ව තම ආරක්‍ෂාව සඳහා පිස්‌තෝලයද සුරතට ගෙන ඒ කියන කලබලය අස්‌සේ දිව ගියාද විය හැකිය. සාමාන්‍යයෙන් එබඳු දේවල් මේ රටේ සුලභව සිදුවන හෙයිනි.

එදා ඡේ. ආර්. ජයවර්ධන පාලන සමයේදී නඩුකාරයන්ගේ නිවෙස්‌වලට ගල් ගසන ලද්දේත්, තවත් අවස්‌ථාවක කොටුව දුම්රියපල අබියස විරෝධතාවකට සහභාගි වූ පිරිසකට පහර දෙන ලද්දේත් සාමාන්‍ය ජනතාව හා මහපාරේ ඇවිද ගිය පිරිස්‌ බවද එකල පාලකයෝම කීහ. ඒ අතීතය දන්නා එ.ජා.ප.යට එදා තමන්ගේ නායකයන් කී කතා සිහිපත් කර මේ සිද්ධිය අමතක කර දැමීමටද හැකිය. එහෙත් මේ සිදුවීම කුමක්‌ද? එය දේශපාලන වශයෙන් ශීලාචාර ක්‍රියාවක්‌ද යන්න විමසා බැලීම වැදගත් බව අපට පෙනේ.

ශ්‍රී ලංකාවේ දේශපාලන භාවිතය පිළිබඳව දන්නා කවරෙකුට වුවද මෙබඳු දේවල් වටහා ගැනීම අසීරු නැත. ඇතැම් විටෙක මේවා සංවිධානය කරනු ලබන්නේ දේශපාලන දැක්‌මක්‌ නොමැති මුග්ධයන්ම විය හැකිය. එබඳු මුග්ධයන්ට රැකවරණය දීමටත්, වරදාන දීමටත් මේ රටේ දේශපාලනය හැමදාමත් සැදී පැහැදී සිටි බවත්, සිටින බවත් රහසක්‌ නොවේ.

බොහෝ ප්‍රාදේශීය දේශපාලනඥයන්ගේ නොහොබිනා දේශපාලන හැසිරීම් මෙන්ම මැර ක්‍රියාකාරකම්ද දැන් සම්මතයක්‌ බවට පත්ව තිබෙන සෙයකි. නොයෙක්‌ විෂමාචාර ක්‍රියාවලදී මෙකී ප්‍රාදේශීය දේශපාලනය දොaලනය වන අයුරු රටම දනී. කෙබඳු විවේචන සිදුවූවත් තම පක්‍ෂයෙන් ඔවුන්ට ඒ වෙනුවෙන් ඉහළ අගයක්‌, ප්‍රදානයක්‌ හිමිවන බවද ඒ ක්‍රියාවන්හි යෙදෙන මුග්ධ දේශපාලනඥයෝ ඉඳුරා දනිති.

මත්තල මෙහෙයුමේ පිස්‌තෝල කාරයා බවට මාධ්‍යවලින් ප්‍රකට වූ හම්බන්තොට පුරපතිවරයා දැනටමත් සිය නිදහසට කරුණු කියමින්ද සිටියි. ඔහු පවසන පරිදි ඔහු එතැනට ගොස්‌ ඇත්තේ එ.ජා.ප. මන්ත්‍රීවරුන්ගේ ආරක්‍ෂාවටය. එහෙත් මේ පුංචි යුදපිටියෙ සිටි කපටි ආරක්‍ෂකයකුගේ තත්ත්වයට ඔහු පත්වී නැද්ද?

ඔහු සැබැවින්ම එ.ජාප. මන්ත්‍රීවරුන්ගේ ආරක්‍ෂාව උදෙසා පෙනී සිටියේ නම් ගුවන්තොටුපලේ හා හම්බන්තොට වරාය අසල සූදානමින් සිටි මැර හමුදා විසුරුවා හැරීමට බැරි වූයේ ඇයි? ඔහු පමණක්‌ නොව පොලිසියද මේ ගැටුමේදී නරඹන්නන්ගේ තත්ත්වයට පත්වූයේ කෙසේද? ආයුධ සන්නද්ධ මැරයන් මහජන නියෝජිතයන්ට තර්ජනය කරද්දීත්, කුණු බිත්තර ගසද්දීත් පොලිසිය නපුංසක පිළිවෙතක්‌ අනුගමනය කිරීමද කැපී පෙනුණි. ඒ ගැන පොලිසියට දොස්‌ කීමට අපි සූදානම් නොවෙමු.

මේ රටේ දේශපාලන අධිකාරීන්ගේ පීඩනයට හසුව ක්‍රියා කරන පොලිසියකින් අපට බලාපොරොත්තු විය හැකි නීතිය හා යුක්‌තිය කුමක්‌ද? පොලිසියට ධර්මචක්‍රය පළඳවා මේ රට ධර්මිෂ්ඨ කිරීමට ලෑස්‌ති වූ ඡේ. ආර්. ආණ්‌ඩුවේ නායකයෝ පොලිසියට දින කීපයක්‌ නිවාඩු දෙන බවද කීහ. එලෙස ඇරඹුණු ඒ පොලිසියේ ගමන අද වන විට නරකම අදියරකට වැටී තිබේ.

පොලිසිය, ප්‍රභූ ආරක්‍ෂක සේවාවන් අද දේශපාලනය නිසා විනාශ වී තිබේ. අපට මේ පිළිබඳව ඕනෑ තරම් සාක්‌කි ඉදිරිපත් කළ හැකිය. ඡේ. ආර්. යුගයේ විවියන් ගුණවර්ධන මන්ත්‍රිවරියට පහර දුන් පොලිසිය බේරා ගත්තේ ආණ්‌ඩුවමය. ඊට පසුව දරමිටිපොල හිමියන්ට එරෙහිව උසිගැන්වූ පොලිස්‌ ලොක්‌කෙකුටත් ඡේ. ආර්. ගේ කරුණාව ලැබුණි. චන්ද්‍රිකා ජනාධිපතිනිය යටතේ සිටි ආරක්‍ෂකයන් පිරිසක්‌ රූකාන්තලාගේ කොණ්‌ඩා කැපීමට තරම් එඩිතර වූහ. (අද ඔවුන්ට ජනාධිපති සමාව ලැබී ඇත).

මේ ආණ්‌ඩුව යටතේත් පොලිසියේ භූමිකාව වෙනස්‌ වී ඇති බවක්‌ නොපෙනේ. පොලිසියේ ඒ නිවට මානසිකත්වය බිඳලීමට මේ ආණ්‌ඩුවට නොහැකිද? පොලිසිය තුළත් සිය රාජකාරිය හිතට එකඟව කිරීමට කැමැති අය සිටිති. එහෙත් ඔවුන් පසු බාන්නේ දේශපාලන බලපෑම් සමඟ ගැටීමට ගොස්‌ සිය රැකියාව අනතුරේ දමා ගැනීමට බියෙනි.

කෙසේ හෝ අද රටක්‌ ලෙස අප ගමන් කරන්නේ කෙබඳු දිශානතියකටද යන ප්‍රශ්නය මෙහිදී මතුවේ. දේශපාලනය යනු බලය පිළිබඳව මෙන්ම එම බලය කෙක්‌කෙන් බැරිනම් කොක්‌කෙන් හෝ රැක ගත යුතු යෑයි සිතන මුග්ධ මානසිකත්වයකට බොහෝ දේශපාලනඥයෝ පත්ව සිටිති.

පසුගිය දිනක මාතර ප්‍රදේශයේ ක්‍රියාත්මක වූ කුරුඳුපොලු ප්‍රහාරය අපට මතකය. ඒ එජාපයේම ඇතුළත ගින්නක ප්‍රකාශනයකි. පසුගිය පළාත් සභා ඡන්ද සටන් බිමේදීත් ආණ්‌ඩුවේම පිරිස්‌ කුළල් කා ගත් අයුරු අපට මතකය. එහෙත් මේ කිසිදු ගැටුමකදී, අර්බුදයකදී ඒවාට අදාළ වගකිව යුතු අයට එරෙහිව ගත් පියවර කුමක්‌ද?

අද හැම පක්‍ෂයක්‌ම ක්‍රියා කරන්නේ තමන්ගේ බලය වෙනුවෙන්ය. ඒ බලය ගිලිහී යැමට නොදී රැක ගැනීම වෙනුවෙන් කෙරෙන ඕනෑම නොහොබිනා ක්‍රියාවන් අනුමත කිරීමට අද පක්‍ෂවලටද සිදුවී තිබේ. පක්‍ෂවල ඉහළ නායකත්වයට වුවද පක්‍ෂය ඇතුළෙන්ම බලකරන්නේ පාක්‍ෂිකයන් රැක ගැනීමට මිස විනය හා යුක්‌තිය රැකීමට නොවේ.

මත්තල පිස්‌තෝල සටන හා කුණු බිත්තර ප්‍රහාර, මැර තර්ජන ඉතා සංවිධානාත්මක මෙහෙයුමක්‌ බවට නිසැකය. ප්‍රාදේශීය දේශපාලන නායකත්වය ඒ සඳහා ක්‍රියාත්මක වන්නේද සිය දේශපාලන වගකීමක්‌ වශයෙනි. මේ මුග්ධ හැසිරීම්වල විලාසය රූපවාහිනි නාලිකා මගින්ද ප්‍රදර්ශනය විය. මුද්‍රිත මාධ්‍ය මගින්ද දැක්‌විණි. සත්තකින්ම ඒවා දෙස බලා ආඩම්බර විය හැකි, අත්පුඩි ගැසිය හැකි මුග්ධයෝත් සිටිති. එහෙත් අපට නම් ඇතිවන්නේ ලැඡ්ජාවකි.

එබඳු ඡායාරූපවලින් කියෑවෙන දේශපාලන කතාව අපේ ජාතික සංස්‌කෘතික අනන්‍යතාවට කෙළ ගැසූ වසලයන්ගේ කතාවක්‌ ලොවට හඬගා කියයි. අද ඩෙඟා නටන දේශපාලන විකටයන්ගේ ප්‍රචණ්‌ඩත්වය ලොවටම විදහා පායි. අද අප ලබන්නේ මීට පෙර පාලකයන් විසින් වපුරන ලද බිජුවටක අස්‌වනු බව සැබෑය. එහෙත් එය අවසන් කිරීමට කාලය එළඹ තිබේ.

දේශපාලනය යනු එළිපිට සුසිරිත ගැන දෙසාබාමින් රහසේ දුසිරිත වඩන දූෂිතම ව්‍යාපාරයක්‌ බවට අද පත්ව තිබෙන්නේ ජනතාවගේ වරදකට වඩා ඒවා හසුරුවන පක්‍ෂ නායකයන්ගේ දුබලතාවන්ද නිසා යෑයි කිව යුතුය. නායකත්වයේ පෞරුෂය යටපත් වී, මුග්ධ ක්‍රියාකාරකම් මතුවීම ගැන නායකයෝද වික්‍ෂිප්තව සිටිති. එහෙත් ඒ වරද නිවැරැදි කළ යුත්තේ නායකත්වය විසින්මය.

මේ දේශපාලන ගමනට ජනතාවගේ මනාපයද හිමිවීම අද අපි දකිමු. මැරයන්ට, හොරුන්ට, තක්‌කඩියන්ට මනාපය පළකරන ජනතාව ඒ සඳහා වගකිව යුතු බවද ඇත්තය. එහෙත් මෙබඳු අවස්‌ථාවලදී රටේ බුද්ධිමත්හු නිහඬව සිටිත් නම් ජනතාවද රෑ වැටුණු වළේ දවාලට වැටීම කෙලෙස නවත්වන්නද?

බොහෝ ප්‍රාදේශීය දේශපාලනඥයන්ගේ නොහොබිනා ක්‍රියාකාරකම් හා මුග්ධ හැසිරීම් අද සම්මතයක්‌ බවට පත්ව තිබේ. මේ වන විට විවිධ විෂමාචාර සම්බන්ධයෙන් චෝදනාවට ලක්‌වූ ප්‍රාදේශීය දේශපාලනඥයෝ කොපමණ සිටිත්ද? නගරාධිපතිවරු, උප නගරාධිපතිවරු ද ප්‍රාදේශීය සභාපතිවරු ද ඒ අතර සිටිති. සමහරුන්ට මිනීමැරුම් චෝදනාය. තවත් සමහරුන්ට ස්‌ත්‍රී දූෂණ චෝදනාය. තවත් සමහරුන්ට අල්ලස්‌ හෝ වංචා චෝදනාය. මේවා ඉතා බරපතළ දේවල්ය.

මේ රටට එන සංචාරක ලියක්‌ සමූහ දූෂණයකට ලක්‌කරන ප්‍රාදේශීය දේශපාලනඥයන් ගැන අපට කිව හැක්‌කේ කුමක්‌ද? මේ අය රටට ලබාදෙන අවමානය කෙබඳුද? මේ අය තවමත් වැරදිකරුවන් ලෙස තීන්දු වී නැති බව ඇත්තය. එහෙත් එබඳු ජනතා නියෝජිතයන්ට එල්ල වී ඇත්තේ අතිශය බරපතල චෝදනා බව නම් අප කිව යුතුමය. අප මැනවින් දන්නා පරිදි මේ රටේ කිසිම දේශපාලන පක්‍ෂයක්‌ තම පක්‍ෂයේ ගරුනාමය කෙලෙසූ හෝ විෂමාචාරයකට වැරදිකරුවන් වූ අයට දඬුවමක්‌ ලබා දී නැත. කිසිවෙක්‌ එබඳු කරුණක්‌ නිසා පක්‍ෂයෙන් නෙරපා දමා හෝ නැත.

මේ දේශපාලන මුග්ධභාවයට සුජාත සහතික ලබාදෙමින් ඒවා නඩත්තු කිරීම අද සිදුවන නරකම ක්‍රියාව බව කවදා කෙලෙස තේරුම් ගනු ඇත්දැයි අපට කිව නොහැක. එහෙත් එහි ප්‍රතිඵලය ලෙස මතුයම් දිනක ප්‍රජාතන්ත්‍රවාදයේ නාමයෙන් ඔබේ දොරකඩටම එන දේශපාලන මැරයන්ට මල්මාලා දැමීමට ඔබ සූදානම්ද යන ප්‍රශ්නය ඔබේම හෘද සාක්‍ෂියෙන් ඇසිය යුතුය.

දේශපාලන ලියුම්කරු
Read more
රාජපක්ෂ දිස්නය දියවෙයි

කුසල් පෙරේරා
ඒ ගොල්ලෝ ජිනීවා නුවරදී දිනුවදෙන්. අපි මෙහේ දිනනවා.’’ ජනාධිපති රාජපක්ෂ ප‍්‍රචාරක රැලියක් අමතමින්. 
මීට දින තුනකට පෙර ජිනීවා නුවර දී සම්මත කර ගැනුණු ලංකාව පිළිබඳ ඇමරිකානු යෝජනාවට ලැබුණු ඡුන්ද ප‍්‍රමාණයේ වැඩි වර්ධනයක් නොවුණු බව සැබෑව. වඩාත් කැපී පෙනෙන සහ මවිතයට කාරණය වුණේ, මෙවර එම යෝජනාවෙන් ඉන්දියාව පස්ස ගැසීමයි. ඒ වෙනුවෙන්, ඉන්දියාවේ කොන්ග‍්‍රස් ආණ්ඩුවට අපේ ජනාධිපතිවරයා වහා ස්තුතිය පුද කෙළේ, ශ‍්‍රී ලංකා මුහුදු සීමාවේ අනවසරයෙන් මසුන් ඇල්ලීමේ චෝදනාව මත අත්අඩංගුවට ගෙන සිටි සියලූ ඉන්දියානු ධීවරයන්ව වහා නිදහස් කිරීමට නියෝග කිරීමෙනි.

ජිනීවා නුවර මානව හිමිකම් කවුන්සිලයේ ලංකාව පිළිබඳ යෝජනාවෙන් ඇත්තෙන්ම ඇමරිකාව පරාජය විණැ’යි මහාචාර්ය ජී.එල්. පීරිස් තර්ක කරන බවක් ‘ඬේලි නිව්ස්’ පුවත්පත වාර්තා කෙළේය: ‘‘ගිය වසරේ දී වැඩි ඡුන්ද 25 කින් සම්මත වූ යෝජනාව මෙවර ඡුන්ද 23කට පහත වැටී ඇති බව මහාචාර්ය ජී. එල්. පීරිස් පෙන්වා දුනි. යෝජනාවට සහාය දක්වන රටවල් ප‍්‍රමාණයට වැඩි රටවල් ප‍්‍රමාණයක්, ඊට සහයෝගය නොදැක්වූ බවට’’ ඔහු තර්ක කොට තිබුණි. ඔහුගේ සූත‍්‍රයට අනුව, යෝජනාවට විරුද්ධව ඡුන්දය පාවිච්චි කළ රටවල් පමණක් නොව, ඡුන්දය දීමෙන් වැළැකී සිටි රටවල් ද සැලකෙන්නේ යෝජනාවට විරුද්ධ රටවල් වශයෙනි. එවිට, ලංකාවට පක්ෂව සිටියේ යැයි ජී. එල්. පීරිස් කියන රටවල් ප‍්‍රමාණය, 24 කි. එක්සත් ජාතීන්ගේ මානව හිමිකම් කවුන්සිල සැසියෙන් පසු ලංකාවේ ආණ්ඩුව තෘප්තිමත් වුණේ එවැනි විග‍්‍රහයන්ගෙනි.

ජනාධිපති රාජපක්ෂ විසින්ම පෙරමුණ ගත්, පසුගිය දා අවසන් වූ බස්නාහිර සහ දකුණු පළාත් සභා මැතිවරණ ව්‍යාපාරය තුළ සිය ප‍්‍රධාන තේමාව වශයෙන් ආණ්ඩුව පෙරමුණට ගත්තේ එම ජිනීවා යෝජනාව වූ බැවින් එවැනි ස්ථාවරයක් ගැනීමට ආණ්ඩුවට සිද්ධ වුණි. එක්සත් ජනතා නිදහස් සන්ධානය සඳහා ඡුන්දය පාවිච්චි කිරීමෙන්, තමන් ‘ජිනීවා යෝජනාවට’ විරුද්ධ බව පෙන්නුම් කරන්නැ යි ඔවුහු ජනතාවගෙන් ඉල්ලා සිටියහ. ඒ අනුව, ඇමරිකාවට සහ ‘ජිනීවා යෝජනාවට’ එරෙහි විරෝධතා සහ පිකටින් ව්‍යාපාර, ආණ්ඩුවේ අනුග‍්‍රහය යටතේ, කොළඹ පාරවල් ගානේ නිතර විනෝදය සැපයුවේය. එම පළාත් සභා මැතිවරණ ව්‍යාපාරවල කොටසක් වශයෙන්, ‘ජිනීවා යෝජනාවට’ එරෙහි මහජන පෙත්සම් ව්‍යාපාරද ආණ්ඩුවෙන්ම පිට පළාත්වල සංවිධානය කෙරුණි. ඒ අස්සේ, ‘දේශපේ‍්‍රමී’ ඡුන්දයක් ඉල්ලා, සුපුරුදු පරිදි, වීරවංශලා සහ ජාතික හෙළ උරුමකරුවෝ බෙරිහන් දුන්හ.

ජීඑල් සූත‍්‍රය

‘දේශපේ‍්‍රමී ඡන්දයක්’ ඉල්ලූ ජනාධිපතිවරයාගේ ආයාචනය ඉදිරියේ පවා, දකුණේ ඡුන්දය පාවිච්චි කළ මුළු ප‍්‍රමාණය, සියයට 65.8 ක් පමණි. එය, ගිය වර පළාත් සභා මැතිවරණයේ දී ඡුන්දය පාවිච්චි කළ සියයට 70.2 ට වඩා අඩු ප‍්‍රතිශතයකි. ජිනීවා යෝජනාවට එරෙහිව පෙරට දැමූ දේශපේ‍්‍රමී ආයාචනයට යම් හෝ සාධනීය ප‍්‍රතිචාරයක් ජනතාවගෙන් තිබුණි නම්, ගිය වර සියයට 70.2 ට වඩා ඉහළ ප‍්‍රතිශතයක් මෙවර ඡුන්දය පාවිච්චි කළ යුතුව තිබුණි. එහෙත් සිදුවුණේ එහි අනිත් පැත්තයි. එවිට, ජී. එල්.ගේ තර්කයට අනුව ගත් විට, ඡුන්දය පාවිච්චි කිරීමෙන් වැළකී සිටි සියයට 34.2 වූ කලි, ආණ්ඩුවට එරෙහිවූවන් වන අතර, එනිසාම, ජිනීවා යෝජනාවට පක්ෂ ජනතාවක් සේ සැලකිය යුතුව තිබේ. මේ තර්ක ක‍්‍රමය ඔස්සේ තවදුරටත් යන්නේ නම්, ඉවත් කළ සියයට 3.8 ක ඡුන්ද ප‍්‍රතිශතයත් ඊට එක් කළ විට, සියයට 38 ක ඡුන්දයක් ජිනීවා යෝජනාව සමග ඇත. ඊළඟට, සෘජු ආණ්ඩු විරෝධී ඡුන්දයක් වන එක්සත් ජාතික පක්ෂයට, ජනතා විමුක්ති පෙරමුණට සහ ප‍්‍රජාතන්ත‍්‍රවාදී පක්ෂයට සමස්ත දකුණු පළාතේ ජනතාව ලබා දුන් සියයට 42 ක ඡුන්දය ද මීට එක් කළ විට, සියයට 80 ක ඡුන්දයක් ආණ්ඩුවට විරුද්ධව තිබේ. ආණ්ඩු විරෝධී ඒ ඡුන්දය, ජනාධිපති සහ ආණ්ඩුවේ මැතිවරණ ප‍්‍රචාරකයන් මොන තරම් ඉල්ලා සිටියත්, ජිනීවා යෝජනාවට එරෙහි ඡුන්දයක් නොවන්නේය.

හම්බන්තොට විපක්ෂය

මේ ජීඑල් සූත‍්‍රය හැරුණු කොට, පාලන තන්ත‍්‍රයට ලොකුම අබග්ගය වුණේ, ඒ දේශපේ‍්‍රමී ආයාචනය මෙවර රටේ ජනතාව බරසාරව භාරගෙන නොතිබීමයි. එසේ භාර ගැනුණි නම්, අඩු වශයෙන් රාජපක්ෂලාගේ පිළිකන්න වැනි දිස්ත‍්‍රික්කයක් වන හම්බන්තොට ජනතාව ‘රාජපක්ෂ ආයාචනයට’ මීට වඩා කන් දෙන්නට තිබුණි. ගිය සැරේ තරම් ජනතාවක් මෙවර එම දිස්ත‍්‍රික්කයෙන් ඡුන්ද පොලට ගියේ නැත. එහෙත් පසුගිය කාලයේ යෝධ ගොඩනැගීම් ඉදිවුණු, කැපීපෙනෙන දිස්ත‍්‍රික්කයත් එයම ය. මාගම්පුර වරාය, මත්තල ගුවන් තොටුපොළ, සූරියවැව ජාත්‍යන්තර ක‍්‍රිකට් ක‍්‍රීඩාංගණය, රන්මිහිතැන්න පම්පෝරි සිනමා ගම්මානය සහ තවත් නවීන මහාමාර්ග පද්ධතියක් එම දිස්ත‍්‍රික්කයට ලැබුණි. එසේ තිබියදීත්, ගිය වර සියයට 71.6 ක් ඡුන්දපොළට පැමිණි එම පළාතේ ජනතාවගෙන් මෙවර ඡුන්දය පාවිච්චි කිරීමට ආවේ සියයට 67.3ක් පමණි. අඩු වශයෙන්, ගිය වර තමන් ලැබූ ඡුන්ද 192,961 වත් ආරක්ෂා කර ගැනීමට රාජපක්ෂලාට මෙවර නොහැකි විය. එය ඡන්ද 18.274 කින් පහළ බැස්සේය.

සජිත්ගේ දේශපාලනික නෂ්ටකාමය සහ ප‍්‍රජාතන්ත‍්‍රවාදි පක්ෂය

අනිත් අතට, රාජපක්ෂලා හම්බන්තොටින් අහිමි කරගත් දෑ එක්සත් ජාතික පක්ෂය සතු කර ගැනීමට සජිත් පේ‍්‍රමදාස අසමත් විය. මුළු මැතිවරණ වකවානුව තිස්සේම හම්බන්තොට කඳවුරු බැඳගෙන සිටි සජිත්, ජිනීවා යෝජනාවට එරෙහිව ලේවලින් වුවත් තමන් අත්සන් කරමි’යි සිංහ නාද දුන්නත් ඔහුට ලබාගත හැකි වුණේ, සියයට 26.2 ක් පමණි. එවිට, ජනතා විමුක්ති පෙරමුණ සහ ප‍්‍රජාතන්ත‍්‍රවාදී පක්ෂය, පිළිවෙලින් සියයට 12.9 ක් සහ 3.1 ක් ලබා ගත්තේය. ඔවුන් අලූතෙන් ලබාගත් ඡුන්ද, ඇත්ත වශයෙන්ම, එක්සත් ජාතික පක්ෂයට යා යුතුව තිබුණු ඡුන්ද ප‍්‍රමාණයකි. විශේෂයෙන් ප‍්‍රජාතන්ත‍්‍රවාදී පක්ෂයට ගිය ඡුන්ද, පක්ෂය දිනවීමට තමා සමත් වන බව කියන සජිත්ගේ පුරාජේරුව නිවැරදි නම්, එක්සත් ජාතික පක්ෂයේ රැුඳිය යුතුව තිබුණි. එහෙත් ඔහු ද මෙවර ඔප්පු කොට පෙන්නුවේ, එම පක්ෂයේ වෙනත් ඕනෑම නායකයකු තරමටම, තමා ද බෙලහීනයකු බව ය.
සරත් පොන්සේකාගේ ප‍්‍රජාතන්ත‍්‍රවාදී පක්ෂය දකුණු සහ බස්නාහිර පළාත්වලින් ලබාගත් මුළු ඡුන්දය, පැහැදිලිවම එක්සත් ජාතික පාක්ෂික ඡුන්දයකි. එසේ ප‍්‍රජාතන්ත‍්‍රවාදී පක්ෂයට ගියේ, සිංහල මුහුණුවරක් පෙන්නීමෙන් තමන්ට ආරක්ෂා කරගත හැකි යැයි එක්සත් ජාතික පක්ෂයේ සිටින සිංහල ජාතිවාදී නායකයන් සිතන, එක්සත් ජාතික පාක්ෂික සිංහල බෞද්ධ ඡුන්ද තට්ටුවකි. ජනතා විමුක්ති පෙරමුණට යෑමට කැමති නැති, අර්ධ නාගරික, ව්‍යාපාරවලට බර, සාම්ප‍්‍රදායික එක්සත් ජාතික පක්ෂ ඡුන්ද, එක්සත් ජාතික පක්ෂ නායකත්වය මේ පාලනයට ශක්තිමත් අභියෝගයක් විණි නම්, එම පක්ෂයේම රැුඳෙන්නට තිබුණි. එහෙත් එක්සත් ජාතික පක්ෂ නායකත්වය, වගකීමෙන් යුත් බරසාර බවක් සහ කැපවීමක් පෙන්වීමට අසමත් වීමත්, ප‍්‍රායෝගික ‘ප‍්‍රජාතන්ත‍්‍රවාදී සහ සංවර්ධනමය වැඩපිළිවෙලක්’ සමග මේ ආණ්ඩුවට අභියෝග කිරීමට අසමත් වීමත් නිසා, ප‍්‍රජාතන්ත‍්‍රවාදී පක්ෂයට සහ ජනතා විමුක්ති පෙරමුණට යන තමන්ගේ ඡුන්දදායකයා ආරක්ෂා කර ගැනීමට අසමත් වුණේය. ‘විරෝධතා ඡුන්දදායකයන්’ බවට පත්වූ ඒ ඡුන්දදායකයෝ වූ කලි, එක්සත් ජාතික පක්ෂයට මෙන්ම ආණ්ඩුවටත් විරෝධය දැක්වූවෝ ය.

වාර්ගික ධ‍්‍රැවීකරණය

යුද්ධයෙන් පසු ගතවූ පස් වසර තුළ රාජපක්ෂ දේශපාලනය හේතුවෙන් සමාජය, වාර්ගික සහ ආගමික තීරු දිගේ පසමිතුරුව ඇති සැටි ද මේ මැතිවරණයෙන් පෙන්නුම් කෙරේ. සාමාන්‍යයෙන් එක්සත් ජාතික පාක්ෂිකයන් වන කොළඹ වෙසෙන දෙමළ වැසියන් මෙවර, බොහෝ දුරට තනි ප‍්‍රජාවක් වශයෙන් ගොස් තිබෙන්නේ, මනෝ ගනේෂන් සහ ඔහුගේ පක්ෂය වන ප‍්‍රජාතන්ත‍්‍රවාදී මහජන පෙරමුණ සමගයි. මීට පෙර 2009 මැතිවරණයේ දී, මනෝ ගනේෂන්ගේ පක්ෂය සිටියේ එක්සත් ජාතික පක්ෂ ලැයිස්තුවේ ය. මෙවර, දෙමළ ජාතික සන්ධානයේ නිල අනුමැතිය ද ඇතිව තනියෙන් තරග වැදුණු එම පක්ෂය, කොළඹ දිස්ත‍්‍රික්කය තුළ, ප‍්‍රධාන ධාරාවේ දේශපාලන පක්ෂ දෙකින්ම පිටස්තරව, ස්වාධීන දෙමළ අනන්‍යතාවක් ස්ථාපිත කර ගැනීමට සමත්ව තිබේ. මෙවර එම පක්ෂය ලබාගෙන ඇති සියයට 6.4ක ඡුන්ද ප‍්‍රතිශතය, කඩුවෙල, කැස්බෑව, හෝමාගම සහ මහරගම වැනි එම පක්ෂයට වැඩිමනත් ඡුන්දයක් පාවිච්චි නොවුණු සාම්ප‍්‍රදායික සිංහල බෞද්ධ ඡුන්ද කොට්ඨාස සමග එකට ගත් විට පෙන්නුම් කරන්නේ, ප‍්‍රධාන පක්ෂ දෙකේ දේශපාලනය වෙනුවට, තමන්ගේ දේශපාලනය ගැන තකන, ස්වාධීන දේශපාලන ඒකකයක් වශයෙන් ගොනුවීමට දෙමළ ජනතාව තුළ ඇති නැමියාවයි.
අනිත් අතට, කොළඹ මැතිවරණ කොට්ඨාස තුළ ශ‍්‍රී ලංකා මුස්ලිම් කොන්ග‍්‍රසය වැඩිමනත් ප‍්‍රතිඵල ලබා ගැනීමට අසමත්ව සිටීම, රාජපක්ෂ පාලන වළල්ලේ එල්ලී සිටින රවුෆ් හකීම්ගේ නාඩගම් තවදුරටත් වැඩ නොකරන බවට නිදසුනකි. කොම්පඤ්ඤවීදියේ පාරම්පරික වාසස්ථානවලින් පිටමං කරනු ලැබ, බොදුබල සේනා සහ වෙනත් එවැනි කල්ලිවල ප‍්‍රචණ්ඩ ජාතිවාදී ප‍්‍රහාරයන්ට ලක්කරනු ලැබ සිටින මුස්ලිම් ප‍්‍රජාව එකට ළං කළ මනෝභාවය විසින් ඉල්ලා සිටිනු ලබන්නේ, රාජපක්ෂ පාලන තන්ත‍්‍රයෙන් පිටස්තර දේශපාලනික නියෝජනයකි. සමහර විට, උතුරු කොළඹ (සියයට 28.3), මැද කොළඹ (සියයට 45.9), බොරැුල්ල (සියයට 41.8), නැගෙනහිර කොළඹ (සියයට 32.7), බටහිර කොළඹ (සියයට 32.9) සහ දෙහිවලින් (සියයට 34) ක් ඡන්ද ලබා ගැනීමෙන් යම් ගෞරවාන්විත තත්ත්වයක් ආරක්ෂා කර ගැනීමට එක්සත් ජාතික පක්ෂයට හැකි වුණේ, ෆොන්සේකාගේ ප‍්‍රජාතන්ත‍්‍රවාදී පක්ෂයවත්, ජනතා විමුක්ති පෙරමුණවත් තමන්ගේ විකල්පය වශයෙන් ගැනීමට ඉහත කී අසන්තෝසයෙන් සිටින මුස්ලිම් ජනතාව ප‍්‍රතික්ෂේප කිරීම නිසා විය හැකිය.

කොළඹ සහ ගම්පහ යන දිස්ත‍්‍රික්කත් රාජපක්ෂලා ලොකුවට දිනාගෙන නැත. ඇත්ත වශයෙන්ම, මීට පෙර ලැබූ ඡුන්ද ප‍්‍රතිශතය මෙවර ඔවුන්ට අහිමිව ඇත. 2009 පළාත් සභා මැතිවරණයේ දී රාජපක්ෂ ආණ්ඩුවට ගම්පහ දිස්ත‍්‍රික්කයෙන් සියයට 69.1 ක් ලැබුණි. මෙවර එය සියයට 57.9 කට පහත වැටී තිබේ. එය, සියයට 12 කට ආසන්න පරිහානියකි. කොළඹත් ඊට වෙනස් නැත. මෙවර ඔවුන් කොළඹින් ලබාගෙන ඇති සියයට 45.3 වූ කලි, පසුගිය වර ලැබූ (57.7) ප‍්‍රතිශතයෙන් සියයට 12 කට වැඩි කඩා වැටීමකි.

මේ මගින් කියැවෙන්නේ, රාජපක්ෂ ආණ්ඩුව සුළු ජාතීන් අතර තිබූ විශ්වාසය නැතිකර ගැනීම සහ පශ්චාත් යුදකාලීන ශ‍්‍රී ලංකා සමාජය ධ‍්‍රැවීකරණය කිරීමට තල්ලූ වීම පමණක් නොව, මීට පස් වසකට පෙර සිංහල සමාජය තුළ ඔවුන් සතුව පැවති දේශපේ‍්‍රමී දිස්නයත්, සැබෑ දේශපාලනය තුළ දිය කරගෙන ඇති බවයි. එහි සහතික නිරූපණයක් වන මැතිවරණ පල්ලම් බැසීමත් දැන් පටන්ගෙන තිබේ. එහෙත් ජනතාව පැත්තෙන් ඇති අවාසනාවන්ත ලක්ෂණය වන්නේ, එම තත්ත්වයෙන් ප‍්‍රයෝජන ගැනීමට සමත් බුද්ධිමත් සහ නිසි විපක්ෂයක් නැති වීමයි. එවැනි විපක්ෂයක අඩුව තිබියේ වී මුත්, බර්ටෝල්ට් බ්‍රෙෂ්ට් ‘හුණුවටයේ කතාවේ’ දී කීවාක් මෙන්, ‘‘දීර්ඝ කාලයක් යනු අනන්තයක් නොවීම’’, මේ පාලන තන්ත‍්‍රය කෙරෙහිත් සත්‍යයක් වීමට නියමිතයි.
 Thursday,17 Apr 2014   ravaya -
Read more
Friday, April 18, 2014
ඡායාරූපයක කතාව

ඊයේ රටේ ජාතික පුවත්පත් සියල්ලේම පාහේ මුල් පිටු සැරසුණේ අතිශය ප්‍රවෘත්තිමය වටිනාකමක්‌ සහිත ඡායාරූප කීපයකිනි. කලවා අග දක්‌වා සරම උස්‌සාගත් එකෙකුත්, නිල් - රතු කමිසයක්‌ හැඳ නිල් තොප්පියක්‌ ද දමා පිස්‌තෝලයක්‌ අතින් ගත් එකෙකුත්, මේ සමහර ඡායාරූපයක සිටි අතර, නිල් රෙදිකඩකින් හිස ඔතා බිත්තර ප්‍රහාරයක්‌ එල්ල කරන්නකුගේ ඡායාරූපයක්‌ ද ඒ අතර තිබුණේය. හැම විටම නිශ්චලව ද, නිහඬව ද මහා දිග කථා ප්‍රකාශයට පත් කරන
Read more
Thursday, April 17, 2014
සුද්දා එක්ක සුදි සුද්දට හදි

2001 මහ ඡන්ද කාලයේ යූ.ඇන්.පී.ය මාර කතාවක් කීවේය. ඒ කතාව කීවේ තමන් ආණ්ඩුව අතට ගත්ත ගමන් එකල ජනාධිපතිනි චන්ද්‍රිකාව ගෙදර යවන හැටි කියලා දෙන්නටය. යූ.ඇන්.පී. ආණ්ඩුවේ පළමු අය - වැයේදී ජනාධිපති නඩත්තු කරන්න දෙන මුදල් කපා හරින බවත්, ජනාධිපති මන්දිරයේ ලයිට් කපන බවත්, වතුර කපන බවත් යූ.ඇන්.පී.ය රස කර කර කීවේය.

යූ.ඇන්.පී.ය කිව්ව මේ කතාව මතක් වන්නේ මහින්දගේ ආණ්ඩුවේ මානව හිමිකම් කඩකිරීම් නිසා
Read more
Tuesday, April 15, 2014
ඊළම නැතිව පස්ස බලන්නේ නැහැ .....රටින් පිට ඊළාම් අගමැති කියයි

ශ්‍රී ලංකා ගාඩියන් කර්තෘ නිලන්ත ඉලංගමුව ඇමෙරිකාවේ නිව්යෝර්ක් නුවර දී එල් ටී ටී ඊ සංවිධානයේ නීති උපදේශකයා ලෙස කටයුතු කළ රටින් පිට පිහිටුවා ගත් ‘ඊලාම් සංක්‍රාන්ති රජයේ අගමැති‘ විෂ්වනාදන් රුද්‍රකුමාරන් හෙවත් රුද්‍රා සමග සමූඛ සාකච්ඡාවක් පැවැත්වීය.
කොටි  සංවිධානයේ නීති උපදේශකයා ලෙස කටයුතු කළ විෂ්වනාදන් රුද්‍රකුමාරන් හෙවත් රුද්‍රා තමන් දෙමළ ඊළාම් සංක්‍රාන්ති රජයේ අගමැති ලෙස  හදුන්වාගනී. ඇමරිකා පුරවැසියෙකු වන ඔහු නිව්යෝර්ක් නුවර වාසය කරයි. ඔහු නීතිඥවරයෙකි. යාපනය හිටපු පුරපති විශ්වනාදන් ගේ පුත්‍රයා වන රුද්‍රකුමාරන් යාපනය මධ්‍ය මහා විද්‍යාලයයේ හා කොළඹ නීති විද්‍යාලයේ අධ්‍යාපනය ලැබූවෙකි.
විෂ්වනාදන් රුද්‍රකුමාරන් නොඑසේනම් රුද්‍රා ඔහු සම්බන්ධවී සිටින වැඩකටයුතු නිසාම නිතර දෙවේලේ දැකිය හැකි චරිතයක් නොවූවත් දශක ගණනාවක සිටම ඔහුගේ නම පොදු ජනතාව හොදින්ම හදුනන්නකි. වරක් දමිළ ඊළාමය සදහා වන විමුක්තිකාමී  කොටි (එල්.ටී.ටී.ඊ) සංවිධානයේ නීති උපදේශකයා ලෙස අන්තර්ජාතික තලයේ පෙනී සිටි ඔහු එල්.ටී.ටී.ය සහමුලින්ම විනාශ කර දැමීමේ අරමුණින් ශ්‍රී ලංකා ආරක්ෂක අංශ දියත් කළ අවසන් මෙහෙයුමේදී මැරුම් කෑ එල්.ටී.ටී.ඊ සංවිධානයේ නායක වේලූපිල්ලේ ප්‍රභාරකරන් කිට්ටුවෙන්ම ආශ්‍රය කළ අයකුද වේ.
රුද්‍රා දැන් එල් ටී ටී ඊ සංවිධානයේ ප්‍රභාකරන්ගේ අඩුව පුරවන්නා ලෙස සැළකේ.   ඔහුගේත් එල් ටී ටී ඊ සංවිධානයේ ඉතිරිව සිටින සෙසු සාමාජිකයන්ගේත් නවතම උත්සාහය වී ඇත්තේ අවිගත් අරගලකට පරිබාහිර ක්‍රියාවලියකින් ඊළම දිනාගැනීමට වෑයම් කිරීමයි. මේ සදහා ඔහු දෙමළ ඩයස්පෝරාව හා එක්ව කටයුතු කරමින් සිටී.
මෙම දීරඝ සම්මුඛ සාකච්ඡාවේදී රුද්‍රා සමග එල්.ටී.ටී.ඊ සංවිධානයේ අලූත්ම මුහුණුවර වන ‘දෙමළ ඊළමේ සංක්‍රාන්ති රජය‘ පිහිටුවීමේ සැබෑ අරමුණ හා ඒ හා බැඳුණු ගැටලූකාරී කරුණු කාරනා සම්බන්ධයෙන් තොරතුරු විමසීමට අපි කටයුතු කළෙමු. කෙසේවුවත් ඇතැම් ප්‍රශ්න හමුවේදී රුද්‍රා උපක්‍රමශීලීව ඒවා මගහැර යන අයුරුත් අපගේ අවධානයට හසුවිය.
ප්‍රශ්නය - ඔබ දැන් නව රජයක එනම් ‘දෙමළ ඊළම සදහා වන සංක්‍රාන්ති රජයේ‘ නායකයා. මෙය ‘සෙවණැලි රජයක්‘. ඒ කියන්නේ මොන්ටෙවීඩියෝ සම්මුතියට අනුව සැබෑ රජයක් පිහිටුවීමට අවශ්‍ය වන නීතිමය පදනම නොමැති රජයක්. ඒ කොහොම වුවත් 2009 වසරේදී ශ්‍රී ලංකාවේ සිවිල් යුද්ධය අවසාන වෙනවාත් එක්කම ඔබ එක සැරේට එහි නායකයා වෙනවා. මේ වගේ රජයක පැවැත්ම ඔබ පැහැදිලි කරන්නේ කොහොමද?
පිළිතුර - මොන්ටෙවීඩියෝ සම්මුතිය බලපැවැත්වෙන්නේ රටවල් වලට  පමණයි. නමුත් දෙමළ ඊළම සදහා වන බහුජාතික රජය රටක් පාලනය කිරීම සදහා  පිහිටුවාගත්තක් නොවන අතරම තහනම් කරනු ලැබූ රජයක්ද නොවේ. ඔව්, ඇත්තටම දෙමළ ඊළම සදහා වන සංක්‍රාන්ති රජය නව සංකල්පයක්. එය අප පිහිටුවාගත්තේ දෙමළ ඩයස්පෝරාවේ දේශපාලන වැඩකටයුතු වලටත් ඩයස්පෝරා සාමාජිකයින්ගේ දේශපාලනය සදහා වන නිදහස තහවුරු කර දීමටත් පිළිවන් වන මාර්ගයක්  විදියට. ශ්‍රී ලංකාවේ දෙමළ ජනතාවට තමන් කැමති දේශපාලනයක් කිරීමට හෝ  දේශපාලන මතයක් වෙනුවෙන් පෙනීසිටීමට හෝ ඉඩක් නැහැ. දෙමළ සඳහා වන බහුජාතික රජයේ ප්‍රධාන අරමුණ වන්නේ ඩයස්පෝරාව නියෝජනය කිරීම. ඒ  එක්කම කාසියේ අනිත් පැත්තේ සිටින්නේ දෙමළ ජනතාව. ඔවුන් තමා සවෛරී ඊළාම් රාජ්‍යයක් පිහිටුවා ගැනීම වෙනුවන් හඬනගමින් සිටින්නේ. මෙම රජයේ නියෝජිතයන් පත්වන්නේ සාමාන්‍ය රජයක මෙන් ඡන්ද ක්‍රමයක් හරහා. මම පෙර කී සාමාන්‍ය දෙමළ ජනතාව තමයි ඡන්දදායකයෝ. ඡන්දදායකයින්ගේ සහභාගීත්වය මත තමයි නියෝජිතයන් පත්වන්නේ.මේ නිසා අපගේ රජයට සැබෑවටම පැවැත්මක් තිබෙනවා.
බලයෙන් පහ කැරුණු රජයක් හා අපගේ රජය සැළකූ විට යම් යම් සමානකම් හදුනාගන්න පිළිවන්. නමුත් ඒවා න්‍යායාත්මකව විමසා බැලූවහොත් බලයෙන් පහ කැරුණු රජයක් හා අපගේ රජය අතර කිසිදු සමානකමක් නැහැ.
බලයෙන් පහ කැරුණු රජයක් ලෙස සාමාන්‍යයෙන් හැදින්වෙන්නේ එක් රටක රජයක්  තාවකාලිකව වෙනත් රටක පිහිටුවීමක්. මෙම පිහිටුවීම සිදුකරන්නේ අදාළ රටෙහි සිටියදී රජය නියෝජනය කළ නමුත් කුමන හෝ හේතුවක් නිසා එම රටෙන් පිටුවහල් කර හෝ එළවා දමා සිටින නියෝජිතයන් පිරිසක්. ඔවුන් මෙසේ වෙනත් රටක රජයක් පිහිටුවීමේ අරමුණ වන්නේ ඔවුන් පිටුවහල් කර දැමීමට තරම් ඔවුන්ගේ මව් රටෙහි ඇතිව තිබෙන වාතාවරණය සමනය වූ දිනයක ක්‍රියාකාරී රජයක් රැගෙන යළිත් සියරට කරා ගොස් බලය තහවුරු කර ගැනීම. මේ ආකාරයේ රජයකට ඔවුන් නවාතැන් ගෙන සිටින නව රටේ අනුමැතිය ලැබීම පමණක්ම ප්‍රමාණවත්. බලයෙන් පහකෙරුණු රජයකට ඩයස්පෝරාවක් අවශ්‍ය වන්නේ නැහැ.
සංක්‍රාන්ති රජයක් කියන සංකල්පය දශක දෙකකට පමණ පෙර සිට අද දක්වාම සමාජ විද්‍යාඥයින්ගේ අවධානයට ලක්වන දෙයක්. එය පුද්ගලයින්ගේ බහුජාතික සබඳතා හා බහුජාතික දේශපාලන බැදීම් එකතුවෙන් ඇතිව තිබෙන දෙයක්.
ඩයස්පෝරාවේ සාමාජිකයන් ඔවුනොවුන් අතර සබදතා පවත්වාගන්නා අතරම ඔවුන්ගේ මව්රටවල් වල පුද්ගලයින් සමග, වෙනත් රටවල් වල වෙසෙන ඩයස්පෝරාවට අයත් ඔවුන්ගේ නෑහිතවතුන් සමග, කොටින්ම කියතොත් ඔවුන් වෙසෙනේනේ කොතැනද එතැන සිටින්නවුන් සමග සබඳතා පවත්වා ගන්නවා. මෙවන් දිවි පෙවෙතක් ගත කරන ඩයස්පෝරා සාමාජිකයින් දේශසීමා වල පිහිටා එක් එක් රටකට අයිතියි කියලා කියන්න බැහැ. මෙනිසා දෙමළ ජාතිකයන් බහුජාතික සමාජයක් පිහිටුවාගෙන සිටිනවා කියලා පෙන්වා දෙන්න පුළුවන්. ඔවුන්ට නවාතැන් සැපයෙන රටේ නීතිරීති වලට ඔවුන් අනුගත වී සිටින්නේ. නමුත් ඔවුන්ගේ දේශපාලනික, සමාජමය, ආර්ථීකමය කරුණු සම්බන්ධයෙන් වන කටයුතු වලදී ඔවුන් කටයුතු කරන්නේ මේ කියන බහුජාතික සමාජය ඇතුලේ ඉදගෙන.
ඊළාම් ඩයස්පෝරාවේ දිවි පෙවෙතත් මේ වගේම තමයි. ඔවුන්ගේ පවුල්වල සාමාජිකයින් එකිනෙකාගෙන් වෙන්වෙලා ජීවත් වන්නේ ලොව පුරා රටවල. නමුත් ඔවුන් තම තමන්ගේ අවශ්‍යතා වෙනුවෙන් ඒ එකිනෙකා හා විවිධ මාර්ග භාවිතා කරමින් සබදතා පවත්වාගනිමින් සිටිනවා. මේ ආකාරයේ පවුලේ, සංස්කෘතිකමය, සමාජමය සබදතා භෞතික දේශසීමා ඔබ්බවා යන්නක්.
සංක්‍රාන්ති රජයේ අරමුණක් වන්නේ මේ කියන සබදතා වැඩිදියුණු කිරීම.මේ සබදතා වලට අර්ථයක් දීමට සාමාජිකයින් අතර දේශපාලනමය සංහිදියාවක් ඇතිකිරීමට, ඒ සමගම තමන්ට කැමති දේශපාලන මතිමතාන්තර දැරීමට අවැසි නිදහස ඇතිකිරීමට  යාන්ත්‍රණයක් සකස් කිරීමට අප කටයුතු කරමින් සිටිනවා. මේ යාන්ත්‍රණය ක්‍රියාත්මක වනු ඇත්තේ සාමාජිකයින් දැනට ජීවත් වන කුමන හෝ රටෙහි නීති රීති වලට අනුකූල වන අන්දමින්. දේශසීමාවන් වලට ඔබ්බෙන් විහිදෙන මේ සබදතා උපයෝගී කර ගැනීමෙන් හා ඒවා වර්ධනය කරගැනීමට අවැසි කටයුතු සම්පාදනය කිරීමෙන් තමයි සංක්‍රාන්ති රජයේ දේශපාලන ව්‍යුහය සකස් වන්නේ.
අපගේ මව්බිමේ සිටින සාමාජිකයින්ද ඇතුලත් සකළ දෙමළ ඩයස්පෝරාව මේ කියන  බහුජාතික සබදතා ආරක්ෂා කර ගැනීමටයි කටයුතු කරමින් සිටින්නේ. දෙමළ ඊළමේ  සාමාජිකයින්ට අපගේ වෙනම සැළකීමක් නැහැ. ඔවුනුත් මා පෙර සදහන් කළ සංක්‍රාන්ති සමාජයේ සාමාජිකයින්. ඔවුන්ගේ දේශපාලන මතිමතාන්තර උතුරුකරයට පමණක් සීමාවී නැහැ. ඒවා සංක්‍රාන්ති දේශපාලන ව්‍යුහය දක්වාම විහිදෙනවා. දෙමළ ජාතිය කියන්නේ ඉතාම විහිදුණු, ඒ නිසාම සාමාජීය කරුණු සම්බන්ධයෙන් ඉහළ දියුණුවක් ඇති, ප්‍රජාතාන්ත්‍රික කරුණු මත පදනම් වුණු ජන කොට්ඨාශයක්.

දෙමළ ඊළම සදහා වන සංක්‍රාන්ති රජය පිහිටුවෙනු ඇත්තේත් මේ කියන බහුජාතික සමාජය තුළමයි. අපගේ මව්බිමෙහි වෙසෙන දෙමළ සහෝරත්වයේ දේශපාලනික වුවමනා එපාකම් මුළු මහත් ඩයස්පෝරාවටම දැන හදුනාගැනීමට අවස්ථාව විවර කර දීම තමයි එහි අරමුණ.අනෙක් කාරණය තමයි දෙමළ ජනතාවගේ සමාජමය, ආර්ථීකමය හා සංස්කෘතිකමය කටයුතු ප්‍රවර්ධනය කිරීමට මෙය යොදාගත හැකිවීම.
රජය ගොඩනැගී ඇත්තේත් ක්‍රියාත්මක වන්නේත් ජනතාව මත පිහිටා බැවින් රජයේ පැවැත්මට රටක් තිබිය යුතු වීම අත්‍යාවශ්‍ය නොවන්නක්. ප්‍රජාතන්ත්‍රික රටවල් ප්‍රජාතන්ත්‍රවාදී කරුණු වෙනුවෙන් එක්රැස්වීමේ අයිතිය පිළිගන්නවා හා ආරක්ෂා කරනවා සේම අපිත් කරන්නේ ප්‍රජාතන්ත්‍රවාදී කරුණු වෙනුවෙන් එක්රැස්වීමක්. එය ආරක්ෂා කරන්නේ අපම පිහිටුවාගෙන තිබෙන රජය. මෙනිසා රටක රජයක් හා අප අතර වැඩි වෙනසක් නැහැ. දෙමළ ජනතාව අතර පවතින සමිති සමාගම් තමයි දෙමළ ඊළම සදහා වන සංක්‍රාන්ති රජයේ බලකණු විය යුතුව තිඛෙන්නේ. අප ස්වාධීන, ස්වෛයිරී දෙමළ ඊළාම් රාජ්‍යයක් පිහිටුවා ගැනීම සදහා සැළසුම් හා ක්‍රියාකාරකම් ක්‍රියාවට නැංවීමට සූදානමිනුයි සිටින්නේ.
ප්‍රශ්නය - දෙමළ ඊළම සදහා වන සංක්‍රාන්ති රජයේ වැදගත්කම කුමක්ද? ඔබගේ රජයේ මන්ත්‍රීවරුන්ගේ නම් ප්‍රසිද්ධ කරලා නැත්තේ ඇයි? රජයක් නම්  නිර්නාමික නියෝජිතයින් සිටින්නේ කොහොමද?

පිළිතුර - දෙමළ ජනතාවගේ දේශපාලන අවශ්‍යතා සම්පූර්ණයෙන්ම සපුරාලීමට ශ්‍රී ලංකාවේ දේශපාලන ව්‍යුහයේ ඉඩක් නැහැ. හය වැනි ව්‍යවස්ථා  සංශෝධනයෙන් ස්වාධීන රාජ්‍යයක් ලබාගැනීම සදහා කෙරෙන සාමකාමී මැදහත්වීම්  අපරාධ හැටියට වර්ග කරලා තිබෙනවා. එය භාෂණයේ නිදහස උල්ලංඝණය කර තිබීමක් ලෙසත්, එවන් අවස්ථාවක මිලිටරි බලය යොදාගැනීම සාධාරණීකරණය කිරීමක් ලෙසත් පෙන්වා දෙන්න පිළිවන්.
දෙමළ ජනතාවගේ සාමාජීය පැවැත්ම තීරණය වන්නේ ඔවුන්ට අනන්‍ය දේශපාලනික, ආර්ථීකමය  හා සංස්කෘතිකමය අංග වලින් සමන්විත ඔවුන්ගේ දිවි පෙවෙත ගෙවීමට ඔවුනට කෙතරම් නිදහසක් ඇත්ද යන කාරණය මතයි. දෙමළ ජාතිකයින්ට ලොව අනෙක් ජන සමාජයන් සමග උරෙනුර ගැටෙමින් ජීවත්වීමටත්, සම්බන්ධතා ගොඩනගා ගැනීමටත් අවස්ථාව තිබිය යුතුමයි. මෙම ඉලක්ක කරා යාමට හා එම යන ගමනේදී මතුවිය හැකි බාධා ජයගැනීමට සවිමත් දේශපාලන ව්‍යුහයක් අවශ්‍යයි. මේ සදහා මූලික පියවරක් වූයේ 1976 දී ඉදිරිපත් වුණු වදුක්කොඩ්ඩයි ප්‍රඥප්තියයි. පසුව 1977 පාර්ලිමෙන්තු මැතිවරණයේදී උතුරේ ජනතාව එය පිළිගන්නා බව පෙන්වන ජනමතයක් පළ කළා. 1985 දී ඉදිරිපත්වූ තිම්පු ප්‍රතිපත්තීන් හා 2003 වසරේදී ඉදිරිපත් කෙරුණු අන්තර්වාර පාලනයක් සම්බන්ධයෙන් වන අධිකාරියක් සදහා වන යෝජනා වලින් මේ ඉලක්ක කරා යෑම පහසුවන ලකුණු පෙනුනා.
ශ්‍රී ලංකාවේ දේශපාලන ව්‍යුහය වසර 60 කට අධික කාලයක් තිස්සේ පවතින්නේ දැඩි සේ මිලිටරිකරණය වෙලා. රටේ ව්‍යවස්ථාව සකස් වී තියෙන්නේ බහුතර බොදු ජනතාවට වුවමනා හැටියට. මෙනිසා සුළුතර ජන කොටස් වල මූලික මිනිස් අයිතීන් හා යහපැවැත්ම ගැන අවධානය යොමුවීමක් සිදුවෙලා නැහැ. රටේ වත්මන් දේශපාලන ව්‍යුහය දෙමළ ජනතාවගේ පමණක් නොව රටේ ජීවත්වන සිංහල බෞද්ධ නොවන අනෙක් ජනකොටස් වලත් දේශපාලන අයිතීන්, සමාජ පැවැත්ම හා සංස්කෘතික ප්‍රගමණය වැනි කරුණු කාරණා වලට බාධා එල්ල කරමින් නැගී තිබෙන්නක්.
රට අභ්‍යන්තරයේ පවතින්නේත් දෙමළ ජාතීන්ට යහපත් වාතාවරණයන් නොවේ. ඔවුන්ට තමන්ගේ අදහස් නිදහසේ ප්‍රකාශ කිරීමට, තමන් කැමති දේශපාලන කටයුතු වල යෙදීමට, ඔවුන්ගේ අයිතීන් ආරක්ෂා කර ගැනීමට, දෙමළ ජාතිකයින් ලෙස පෙනී සිටීමට අවස්ථාවක් සපයා දී නැහැ.
ශ්‍රී ලංකාව එහි වෙසෙන දෙමළ ජාතිකයින්ට එළිමහන් සිරකඳවුරක්. මෙවන් තත්ත්වයක් තියෙද්දී රටේ දේශපාලඥයින්, නීති සම්පාදකයින්, හමුදා නිළධාරීන්, ලොව පුරා බොරු ප්‍රචාර ගෙන යන්නේ ශ්‍රී ලංකාවේ දෙමළ ජනතාවට කිසිදු ගැටලූවක් නොමැති බවත් ඔවුන්ට දේශපාලනමය විසදුමක් අවශ්‍ය නොමැති බවත් කියමින්.
මේ ගැටලූ වලට විසදුම් සෙවීමේ වගකීම දැන් පැවරී ඇත්තේ ඩයස්පෝරා සාමාජිකයින්ට. වෙනස්ම ක්‍රමවේදයන් භාවිතා කරලා දෙමළ ජාතිකයින්ට හිමි අයිතීන් දිනා දීමට ඔවුන්ට කටයුතු කිරීමට සිදුවුණා. එහි ප්‍රතිඵලයක් ලෙස තමයි ප්‍රජාතන්ත්‍රවාදී කරුණු මත පදනම්ව මනා අධීක්ෂණයක් යටතේ සිදුවුනු දෙමළ ඊළම සදහා වන සංක්‍රාන්ති රජයේ උපත.
ප්‍රශ්නය - තමන් දෙමළ ඊළම සදහා වන රජයේ කැනඩා මන්ත්‍රීවරයායැයි  හදුන්වාදෙන එක්සත් ජනපද වාසී දෙමළ ජාතිකයකු සිටිනවා. ඔහු  කවරක්ද, නියෝජනය කරන්නේ?

පිළිතුර - මෙම ප්‍රශ්නයට පදනමක් නැහැ. එනිසා මට ඒ සම්බන්ධයෙන් පිළිතුරක් දිය නොහැකියි.
ප්‍රශ්නය - මම දන්නා හදුනන ඩයස්පෝරා සාමාජිකයින් මා සමග පැවසුවා ඔවුන් කිසිවෙකුටවත් ඡන්දය දීමට හෝ කාට ඡන්දය දිය යුතුදැයි හෝ කිසිදු දැනුම්වත් කිරීමක් සිදුකර නැතැයි කියා. ඔවුන් ඡන්දයක් පැවැත්වෙනවායැයි කියාවත් දැන  සිටියේ නැහැ. ඡන්දයක් පැවැත්වුණා නම් කොහේදීද ඒ සම්බන්ධයෙන් වන තොරතුරු  බෙදා හරිනු ලැබූයේ? තොරුතුරු බෙදා දුන්නේ ඊලාම් කවයන්ට පමණද?  සියලූදෙනා ඡන්දය ප්‍රකාශ කර ඇති බවක් පෙනෙන්නට නැති නිසා ඔබට ඔවුන්ගේ නියෝජිතයින් ලෙස පෙනී සිටීමට හැකිද?
පිළිතුර - ඔබ පවසන්නේ මොනවාදැයි මා දන්නේ නැහැ. ඡන්දයක්  පැවැත්වෙනවායැයි අප සියලූදෙනාම දෙමළ ඩයස්පෝරාවේ රූපවාහිනී නාළිකා, ගුවන්විදුලි නාළිකා, පුවත්පත් ආධාරයෙන් දැනුම්වත් කළා. ඡන්දය  සම්බන්ධයෙන් වන රැස්වීම්ද පැවැත්වුවා.
දෙමළ ඊළම සදහා වන සංක්‍රාන්ති රජය පිහිටුවීමේ පළමු පියවර වුණේ දෙමළ ඩයස්පෝරාව පැතිර තිබෙන ප්‍රදේශ වල ඡන්ද පැවැත්වීමෙන් සභිකයින් තෝරාගෙන රජයේ ව්‍යවස්ථාපිත ව්‍යුහය සැකසීමයි.
ප්‍රජාතන්ත්‍රවාදී රජයක් පිහිටුවීම සදහා පොදුජනතාවගේ එක්රැස්වීම අන්තර්ජාතික නීතිය මගින්ද ස්ථාපිත කර තිබෙන්නක්.එක්සත් ජාතීන්ගේ මානව හිමිකම් කමිටුව ව්‍යවස්ථාවක් සකස් කිරීමට එක්රැස්වීම අයිතිවාසිකමක් ලෙස පිළිගන්නක්. මේ සදහා පොදු ජනතාව සහභාගී කරවා ගත හැකි හොඳම මාර්ගය වන්නේ ඔවුන් ලවා තොරාගන්නා නියෝජිතයින් එකතු කරගෙන මූලික ව්‍යවස්ථාව සැකසීමයි. මේ සදහා යොදාගත හැකි ජනප්‍රියතම යාන්ත්‍රණය වන්නේ ඡන්දයක් පැවැත්වීමයි.
සහභාගී කරවා ගැනීම යනු වර්තමානයේ අවශ්‍යතාවක් වගේම අයිතියක්. එය අයිතියක් බවට පත්ව තිබෙන්නේ සහභාගීකම අරබයා ජාත්‍යන්තර තලයේ ඉදිරිපත්ව ඇති ප්‍රඥප්තීන් හා සම්මුතීන් නිසාවෙන්. එය අවශ්‍යතාවයක් වන තැනට තල්ලූ කර තිඛෙන්නේ ප්‍රජාතන්ත්‍රවාදයයි.මොකද විශ්වාසනීය අයුරින් රජයක් පිහිටුවන්නට නම් පදනම වන්නේ ප්‍රජාතන්ත්‍රවාදයයි.රජයක් පිහිටුවන්නට සහභාගීකරවාගතයුතු වන්නේ ජනතාවයි.මෙනිසා විශ්වසනීය රජයක් පිහිටුවාගැනීමට නම් සහභාගීකරවාගැනීම අවශ්‍යතාවක් වෙලා තිඛෙනවා.සහභාගීකරවාගැනීම මාර්ගයෙන් ව්‍යවස්ථාවක් සම්පාදනය කර ගැනීම ඉක්මනින් ප්‍රගමනය වෙමින් පවතින්නක්.ක්‍රියාවට නැංවීමේදී යම් යම් ගැටලූ පැනනැගිය හැකිවුවත් ප්‍රජාතන්ත්‍රවාදී ව්‍යවස්ථා සම්පාදනය කිරීමේ ක්‍රියාවලියක් යනු අප්‍රිකා විමර්ෂකයෙකු වන ජුලියස් ඉවොන්හ්බරේගේ වචන වලින් කිවතොත්
‘ශක්තිමත්, පිළිගතහැකි හා විශ්වසනීය නිමැවුමක්‘ ලබාගත  හැකි මාර්ගයක්.
මේ සදහා වන මූලික පියවර ගනු ලැබූවේ 2009 වසරේ ඔක්තෝබර් මාසයේදී. මුලින්ම ඇති කෙරුණේ රට රටවල වෙන්වූ ක්‍රියාකාරී කණ්ඩායම්. පළමු වටයේදී බ්‍රිතාන්‍යය, කැනඩාව, ඇමරිකාව, දකුණු අප්‍රිකාව හා නෝර්වේ යන රටවල කණ්ඩායම් ඇති කෙරුණා.පසුව ඕස්ෙට්‍ර්ලියාව, නවසීලන්තය හා ප්‍රංශය යන රටවල කණ්ඩායම් ඇති කෙරුණා.

මෙම ක්‍රියාකාරී කණ්ඩායම් වලට පැවරුණු වගකීම වූයේ දෙමළ ඊළම සදහා වන සංක්‍රාන්ති රජය පිහිටුවීම සදහා ඒ ඒ රටවල සිටින දෙමළ ජාතිකයින්ගේ හා එම  රටවල ක්‍රියාත්මක වන දමිළ සංවිධානයන්ගේ සහය ලබාගැනීමයි. නමුත් මෙම කණ්ඩායම් එයිනුත් නොනැවතී අදාළ රටෙහි සිටින වෙනත් ජනකොට්ඨාශයන්ගේ සහය පවා දෙමළ ඊළම සදහා වන සංක්‍රාන්ති රජය පිහිටුවීමට ලබාගත්තා.අනතුරුව මෙම  කණ්ඩායම් තමන් සිටින රටේ හොදින් සමාජගතවුනා.ඔවුන් එම රටවල සිටින දේශපාලන පක්ෂ නායකයින් හා ඇතැම් අවස්ථාවන්හි රජයන් සමග හොද සබදතා ගොඩනගාගැනීමට සමත්වුනා.ඒවැනි සබදතාවලින් අපගේ රජය පිහිටුවීමට ලැබුණේ  ලොකු ශක්තියක්.
ස්වාධීන මැතිවරණ කමිටුවක් බැගින් දමිළ ඊළම සදහා වන සංක්‍රාන්ති රජයට නියෝජිකයින් පත්කරගැනීම සදහා ඡන්ද විමසීමට තෝරාගැනුණු රටවල ඇති කෙරුණා.මේ කමිටු ඇතිකිරීමේ වගකීම පැවරුනේත් එම රටවල සිටි ක්‍රියාකාරී  කණ්ඩායම් වෙතටයි.ස්වාධීන හා නිදහස් මැතිවරණයක් පැවැත්වීමේ අරමුණින් එක් එක් ඡන්ද මධ්‍යස්ථානයකට මැතිවරණ නිරීක්ෂකයින් අනුයුක්ත කිරීමද සිදුකෙරුණා.
ඡන්ද ප්‍රකාශය කිරීම සදහා සුදුසුකම් ලෙස සැළකුණේ ඡන්ද විමසීමේ දිනය වන විට වයස අවුරුදු 17 ට වැඩි වීමත්, දෙමළ ඊළාම් සංස්කෘතියට පරම්පරාවෙන්, විවාහයෙන්, දරුකමට රැගෙන හදාවඩා ගැනීමෙන් හෝ හිමිකම් කීමත්ය.ඊළාම් දමිළයන් යැයි තමන් හදුන්වාගත් දමිළ ජාතිකයින්ටද ඡන්දය ප්‍රකාශය කිරීමේ අයිතිය ලබා දෙනු ලැබුණා.එසේ වුවත් ඊට පෙර ඔවුන් සැබෑ ලෙසටම ඊළම  වෙනුවෙන් පෙනී සිටින්නේදැයි සොයාබැලීම සිදුකෙරුණා.
ප්‍රශ්නය - ඔබ ලෝක ඉතිහාසයෙන් උකහාගත් කිසියම් දෙයක් ඊළම සදහා වන බහුජාතික රජය පිහිටුවීමේ කටයුතුවලදී භාවිතා කළාද?
පිළිතුර - මම පෙරදීත් සදහන් කළා වගේ මේක නව සංකල්පයක්.
ඊළම සදහා වන සංක්‍රාන්ති රජය දෙමළ ජනතාවගේ ජාතිකත්වය, භූමිය, ස්වාධීනත්වය හා නිදහස දිනා දීමේ අරමුණින් දේශපාලන ව්‍යුහයක් ඇතිව නිර්මානය වූවක්.එය දෙමළ ජනතාවට මෙන්ම සමස්ත ලෝකයටම අලූත් දෙයක්.
දැනට පවතින තත්ත්වය අනුව දෙමළ ජනතාව තමන්ගේ මාතෘභූමියේදී දේශපාලන මතයන් වෙනුවෙන් පෙනී සිටීමට හා තමන්ගේ අයිතිවාසිකම් වෙනුවෙන් හඩගෑමට කිසිසේත් උත්සාහ කරන්නේ නැහැ.මොකද ශී්‍රලංකා රජය නීති මගින්, මිලිටරි බලය  යෙදවීම මගින්, ඇතැම් අවස්ථාවන්හි මිනී මැරීම මගින් ඔවුන්ගේ මග අහුරා දමායි  තිඛෙන්නේ.
මෙම තත්ත්වය සළකා බලා අන්තර්ජාතික දෙමළ ඩයස්පෝරාව කළේ ඔවුන් ස්ථානගතව සිටින රටවල්වල ප්‍රජාතන්ත්‍රවාදී අයිතිවාසිකම් අනුව යමින් දෙමළ ඊළම සදහා වන සංක්‍රාන්ති රජය නිර්මානය කිරීමයි. මෙය දෙමළ ජනතාවගේ අයිතීන් දිනා ගැනීම අරබයා තිඛෙන දේශපාලනික ව්‍යුහයකින් යුත් උත්තරීතරම සංවිධානයයි.දෙමළ  ඊළම නියෝජනය කරනා දෙමළ දේශපාලඥයින් හා ජනතාව සියලූදෙනා මෙම රජය වෙත ඇතුළත් කර ගැනීම ප්‍රායෝගික නොවූ හෙයින් රජයේ නියෝජිතයින් ලෙස ප්‍රජාතන්ත්‍රවාදීව පැවැත්වූ මැතිවරණයන්ගෙන් තෝරාගත්තේ දෙමළ ඩයස්පෝරාවේ සාමාජිකයින්වයි.දෙමළ ඊළම සදහා වන සංක්‍රාන්ති රජය දෙමළ ජනතාවගේ හිතසුව සදහා ශී්‍රලංකාවේ සිට ක්‍රියාකාරී වන සියල්ලන් හා සහයෝගයෙන් කටයුතු කරමින් සිටින අතර ඔවුන් අතරට ඊළමේ ජනතාව නියෝජනය කරනා දේශපාලනික  හා සමාජ නායකයින් ඇතුළත්.
ප්‍රශ්නය - තමන්ගේ සිහිනයන් දිනාගත් සංක්‍රාන්ති රජයන් සම්බන්ධයෙන් ඉතිහාසයේ උදාහරණ තිබෙනවාද?
පිළිතුර - දෙමළ ඊළම සදහා වන සංක්‍රාන්ති රජය  පළමුවැන්න වනු ඇති.
ප්‍රශ්නය - මට පෙනීගිය කරුණක් තමයි ඔබ රට හා රජය යන වචන දෙක පරිස්සමින් වෙන් වෙන් කොට භාවිතා කිරීම. ඔබ ශ්‍රී ලංකාව එනම් රටට එරෙහිව නැගී සිටීමක් ගැන පැවසූවත් රජයට එරෙහිවීමක්  සම්බන්ධයෙන් කිසිත් සදහන් කළේ නැහැ. ඔබට ගැටළු ඇත්තේ රට සමගද? නැත්නම් ශ්‍රී ලංකා රජය සමගද?, කරුණාකර ශ්‍රී ලංකා ප්‍රජාතාන්ත්‍රික සමාජවාදී ජනරජය යන රට මුල්කරගෙන ඔබගේ ඇති ප්‍රතිපත්තීන් සම්බන්ධයෙන් වන කරුණු පැහැදිලි කරන්න.
පිළිතුර - එක්සත් ජාතීන්ගේ විශේෂ පරීක්ෂණ මණ්ඩල වාර්තාව හා අභ්‍යන්තර තොරතුරු විමර්ෂණ වාර්තාවේ සදහන් පරිදි ශ්‍රී ලංකාවේ දෙමළ ජනතාවට යුක්තිය සොයා යා හැකි දේශපාලනික හෝ නීතිමය හෝ වාතාවරණක් නැහැ.නිදහස ලැබූ දා පටන්ම විවිධ රජයන් එකක් පසුපස එකක් පත්වුනත් දෙමළ ජනතාව කොන්  කර සැළකුනේ.එම නිසා වැරැද්ද තිඛෙන්නේ රටේ.
ඊළමේ දෙමළ ජනතාව ස්වාධීන හා ස්වෛරී අන්තර්ජාතික තලයේ පිළිගත් රටක් වෙනුවෙන් කරනා දීර්ඝ අරගලය වර්තමානයේ බොහෝ දෙනාට ආර්ශයක් බවට පත්වෙලා.අද දිනයේ එම අරගලය ලෝකයේ හැදින්වෙන්නේ තමන් උපන් භූමියෙන්  සමාජමය, සංස්කෘතිකමය ලෙස තමන්ව සහමුලින්ම අතුගා දැමෙනු ඇතැයි බියෙන් විරුද්ධව පැමිණී බලවේග වලට එරෙහිව සටන් කළ ජනතාවකගේ අරගලයක්  ලෙසයි.එමෙන්ම අද එයට ඇත්තේ ඛේදනීය මුහුණුවරක්.

මේ සියල්ල ආරම්භ වූයේ මීට දශක 06 කට පමණ ඉහතදී බ්‍රිතාන්‍යයින් යටත්විජිතය  අතහැරයාමේදී ඊළාම් දේශයේ පාලනයත් බහුතර සිංහලයන් අතට ලබාදීමත් සමගයි. බහුතර බලය හිමිව තිබූ, වර්ගවාදී කොළඹ පාලකයින් දෙමළ ජනතාවගේ  අයිතීන් උදුරා ගැනීමට පටන් ගත්තා.මෙයට මුලින් දෙමළ ජාතිකයින් විරෝධය දැක්වූයේ සාමකාමී, ප්‍රචණ්ඩකාරී නොවන අරගල යොදාගෙන.නමුත් පසුව මෙම තත්ත්වය ස්වාධීනත්වය සදහා අවි අතට ගෙන කරන යුද්ධයක් තරමටම වර්ධනය වුනා.
2009 මැයි මාසයේදී යුද්ධය අවසන් වුනේ දහස් ගණනක් සිවිල් වැසියන් මරුදැකලා.ගැටුම් මෙහෙයවූ නායකයින් මරණයට පත්කෙරුණේ දරුණු අන්දමින්. දහස් ගණනක් දමිළ තරුණ තරුණියන් අත්අඩංගුවට ගැනීම ඇරඹුනා.ඔවුන් බොහෝ දෙනෙක්ට අත්වූයේ මරණයයි.ඇතැමෙක් වධකාගාර වලට ගාල් කෙරුණා.කාන්තාවන් දහස් ගණන් හිංසාවට ලක්කෙරුණා.අහිංසක සිවිල් වැසියන් නිස්කාරනයේ රැදවුම් කදවුරු වල රැදවීමත් සිදුවුනා.
අද මෙතරම් අපරාධ සමූහයක් සිදුවුණු මුල්ලිවයික්කාල් ප්‍රදේශය දැකීමේදී, අපරාධ සිදුවෙද්දී ඊට එරෙහිව හඩ නැගීමට අන්තර්ජාතික ප්‍රජාවට කොදුනාරටියක් නොතිබුණීද යැයි සිතීමේදී ඊළම වෙනුවෙන් පෙනී සිටි ඕනෑම කෙනෙක් අධෛර්යමත් වනවා නිසැකයෙන්ම.
වාතාවරණය තවදුරටත් දෙමළ ජාතිකයින්ට ස්වාධීන ස්වෛරී තමන්ට වෙන්වූ භූමියක් තිබිය යුතුයැයි යන මතය තවදුරටත් සාධාරණීකරණය කරන්නක්.විනාශවී යාමෙන් වැළකීමට, ආරක්ෂාව සහතික කිරීමට එවන් භූමි ප්‍රදේශයක් දෙමළ ජාතිකයින්ට තිබිය යුතුමයි. අන්තර්ජාතිකනීතියෙන්ද මෙවැනි පියවරක් ගතහැකි බවද පැවසෙනවා. ශ්‍රී ලංකාවේ තත්ත්වය සම්බන්ධයෙන් කැනඩාවේ ශ්‍රෙෂ්ඨාධිකරණයේදී විභාග වුනු ක්විඛෙක් නඩුවේදී ශ්‍රී ලංකාවේ පවතින තත්ත්වය සළකා බැලු අධිකරණය එවන් වාතාවරණයක් පවතී නම් ස්වාධීන භූමි ප්‍රදේශයක් වෙන්කර දීමේ කිසිදු වරදක් නැතැයිද එය එම ජනතාවගේ අයිතියක් යැයිද ප්‍රකාශ කළා.
ප්‍රශ්නය - ඇයි අපට එකම රටක ඉදගෙන විසදුමකට එන්න බැරි?
පිළිතුර - එකම රටක ඉදන් කෙරෙන විසදුමක් ගැන කතා කළ යුත්තේ ඇයි? ඇයි අපට මිත්‍රශීලී රටවල් දෙකක් හැටියට මේ දූපතේ ජීවත් වන්න බැරි? අප උත්සාහ කළා නිදහස ලැබූ දා පටන්ම සහයෝගයෙන් ජීවත් වන්න.නමුත් දේශපාලනමය  වෙනස්කම් එක්ක එය කළ නොහැක්කක් බව පෙනී ගියා. 1974 දී එස්.ජේ.වී.චෙල්වනායගම් තමයි මෙය හදුනාගෙන ස්වාධීන රාජ්‍යයක් පිහිටුවිය යුතුයැයි මුලින්ම මතයක් ගෙන ආවේ.දමිළයන් පීඩාවට පත්කිරීම ශ්‍රී ලංකා පාලකයින් ඇරඹුවේ ඉන්දියා දෙමළ ජාතිකයින්ට ඡන්දය අයිතිය අහිමි කිරීමෙන්.පසුව ඔවුන් ශ්‍රී ලංකාවේ රාජ්‍ය භාෂාව වන්නේ සිංහල පමණක් යැයි පණතක්ද සම්මත කර ගත්තා.දෙමළ තරුණයින්ට විශ්වවිද්‍යාල වෙත ඇතුල්වීමේ වරම් අහිමි කිරීම, දෙමළ ජාතිකයින් සංවිධානය කළ විරෝධතාවන් දරුණු ලෙස මැඩපැවැත්වීම, දමිළයින්ට එරෙහිව 1958, 1960, 1977 හා 1983 යන වසරවලදී එවක පැවති රජයන්ගේද සහය ඇතිව ඇතිවුණු කෝළහාල, මේ සියල්ල දෙමළ ජාතිකයින් මඩින්නට කළ දේවල්. 1975 දී කන්කසන්තුරේ මැතිවරණ ජයෙන් පසු ඊළමේ ගාන්ධි ලෙස අප ආදරයෙන්
හැදින්වූ එස්.ජේ.වී.සෙල්වනායගම් මෙසේ ප්‍රකාශයක් කළා..

‘අපි පසුගිය වසර 25 පුරාවට අපගේ දේශපාලන අයිතීන් තහවුරු කර ගැනීමටත් සිංහලයින් හා සහයෝගයෙන් එක්සත් ශ්‍රී ලංකාවක ජීවත් වීමටත් උත්සාහ  කළා.නමුත් කණගාටුයි කියන්න.නිදහසින් පසු පත්වුනු රජයන් සියල්ල කළේ නිදහසින්  පසු ඔවුන් සතුවුනු බලය යොදාගෙන අපගේ මූලික අයිතිවාසිකම් පවා අපට අහිමි  කිරීමට කටයුතු කිරීම මගින් අපව කොන්කර දැමීම.අද මේ ලැබූ ජයග්‍රහණයෙන් පෙනී යනවා දෙමළ ජනතාව ස්වාධීන හා ස්වෛරී රාජ්‍යයකට හිමිකම් කීමට  කැමැත්තන් බව.මම මේ අවස්ථාව යොදාගන්නවා ඒ බව මුලූ රටේම හා මගේ ජනතාවට ඒ බව හඩගා පවසන්නට‘
චෙල්වනායගම්ගේ ජයග්‍රණයෙන් පසු සියලූම දෙමළ පක්ෂ වඩුක්කෝඩයි පිළිගත් අතර  වඩුක්කෝඩයි යෝජනාවලිය ඔවුනොවුන් අතර ඒකමතිකව සම්මත කර ගත්තා.මෙම  යෝජනාවලිය මුලින්ම කරලියට පැමිණියේ 1976 මැයි 14 වැනිදා පැවැත්වුණු දෙමළ එක්සත් විමුක්ති පෙරමුණේ පළමු ජාතික සමුලූවේදී. 1977 වසරේ පැවැති මැතිවරණයට දෙමළ එක්සත් විමුක්ති පෙරමුණ සහභාගීවූයේ මේ යෝජනාවලයෙහි පිහිටා යෝජනාවලියෙන් දෙමළ එක්සත් විමුක්ති පෙරමුණ දෙමළ ඊළාම් රාජ්‍යය වෙනම ස්වෛරී රාජ්‍යයක් විය යුතුයැයි වන තම මතය ඉදිරිපත් කළා.දෙමළ එක්සත්  විමුක්ති පෙරමුණ පැවැත්වූ සමුලූවේ මුලසුන හෙබවූයේ එස්.ජේ.වී.චෙල්වනායගම්.පහත දැක්වෙන්නේ එම යෝජනාවලියේ දමිළ බසින් සදහනව තිබූ කරුණු කිහිපයක සිංහල පරිවර්තනය.
‘මෙම යෝජනාවලියෙන් මෙම රටෙහි දෙමළ ජනතාවගේ පැවැත්ම තහවුරු කරනු වස්  නිදහස්, ස්වෛරී, ස්වායක්ත, සමාජවාදී දෙමළ ඊළාම් රාජ්‍යයක්  පිහිටුවාලිය යුතුවීමේ අවශ්‍යතාවය හොදින්ම පෙන්වා දෙනවා‘
යෝජනාවලිය අවසානයේ සදහන්වූයේ දෙමළ ජාතිකයින්ට විශේෂයෙන් දමිළ තරුණ  පරම්පරාවට ඉදිරියට පැමිණ නිදහස හා ස්වාධීනත්වය දිනාගැනීම සදහා වන ශුද්ධවු  යුද්ධයට ඉදිරිපත් වන ලෙස වුනු ඉල්ලීමක්. නමුත් මේ කියන යුද්ධයට ඉදිරිපත්වීම කළ යුතුව තිබුණේ ස්වෛරී රාජ්‍යයක් ඇතිකළ හැකිවීමේ පෙර ලකුණු පෙනෙන්ට තිබුණේ නම් පමණයි. දමිළ ඊළම සදහා වන විමුක්ති කොටි (එල්.ටී.ටී.ඊ) සංවිධානය දශක 03 ක් පුරාවට සටන් වැදුනේ දෙමළ ජනතාවටත් ස්වාධීනත්වයක් ඇති බව පෙන්වා  දීමේ අරමුණ ඇතිව.නමුත් ශ්‍රී ලංකා ආරක්ෂක අංශ හමුවේ සාර්ථකව තම ඉලක්කය කරා යාමට ඔවුන්ට නොහැකිවුනා.
ශ්‍රී ලංකා ආරක්ෂක අංශ වැසි වසින්නාක් මෙන් එල්ල කළ ෂෙල් ප්‍රහාර වලින් යුධ මුක්ත කලාපයේ 2009 වසර මැද භාගය වන විට රැදී සිටි දමිළ සිවිල් වැසියන් දස දහස් ගණනින් ඝාතනය වුනා.යුද්ධය අවසන් වීමෙන් පසු ශී්‍රලංකා රජය ලක්ෂ 03 ක පමණ දෙමළ ජාතිකයින් රැදවුම් කදවුරු වලට ගාල් කළා.රැදවියන්ගේ තත්ත්වය පිළිඹද සොයාබලන්නට එක්සත් ජාතීන්ගේ සංවිධානයටවත්, වෙනත් රාජ්‍ය නොවන සංවිධානවලටවත්, මාධ්‍යවේදීන්ටවත් රජය අවසර ලබා දුන්නේ නැහැ.මෙම පුද්ගලයින් රැදවුම් කදවුරු වල රැදවීමට රජය ට ඉදිරිපත් කළ හැකිවූ එකම හේතුව වූයේ ඔවුන් දෙමළ ජාතිකයින් වීම පමණයි.මෙය ඇත්තටම ඔවුන් දෙමළ ජාතිකයින් වීම නිසාවෙන්ම ඔවුන්ට ලබාදුන් දඩුවමක්.
එක්සත් ජාතීන්ගේ සංවිධානයට අනුව මුල් කාලයේදී මේ රැදවුම් කදවුරු වල රදවා සිටි රැදවියන් රාශියක් හාමතෙන් මියගොස් තිඛෙනවා.ඇම්නෙස්ටි ජාත්‍යන්තරයට අනුව ඇතැම් ගර්භණී කාන්තාවන්ට විළිබිය පසෙකලා ආගන්තුක පුද්ගලයින් ඉදිරියේම දරුවන් බිහිකිරීමට සිදුවූ අවස්ථාවන් වාර්තා වෙලා තිඛෙනවා. බ්‍රිතාන්‍යයේ චැනල් 04නාළිකාව රැදවුම් කදවුරු වල තත්ත්වය වාර්තා කළේ පුද්ගලයින් ජලය හා ආහාර නොමැතිව මිය යමින් සිටින බවත්, මියගොස් සිටියවුන්ගේ මළ සිරුරු ඔවුන් මියගිය ස්ථානවලම තිඛෙන්නට ඉඩ හැර ඇති බවත්, කාන්තාවන් පවුල් වලින් වෙන්කර ඇතැම් අවස්ථාවන්හි ඔවුන්ට ලිංගික අඩත්තේට්ටම් පවා පමුණුවමින් තිඛෙන බවත් සදහන් කරමින්.රදවා සිටි පුද්ගලයින්ගෙන් සැළකිය යුතු තරමේ සංඛ්‍යාවක් 2009 වසර අගභාගය වන විට බාහිරෙන් මෙන්ම අභ්‍යන්තරයෙන් මතුවන්නට ගත් පීඩනය නිසා නිදහස් කර හැරීමට රජය කටයුතු කර ඇතත් එසේ නිදහස් කරනු ලැබූ පුද්ගලයින් ජීවත් වන්නේ බියෙන්.ඔවුනට මූලික මිනිස් අවශ්‍යතා සපුරා ගැනීමේ පහසුකම්වත් සපයා දී නැහැ. ඔවුන්ව නිසි පරිදි වෙනත් ප්‍රදේශයක ජනාවාස කර හෝ ඔවුන්ගේ පැරණි ජනාවාස වෙත යාමට අවසරය ලබාදී හෝ නැහැ.

කදවරු වලින් පිටත වෙසෙන දමිළ ජනතාවගේ තත්ත්වයත් මිීට වෙනස් නැහැ.විශේෂයෙන් උතුරේ, දෙමළ ජනතාවගේ නිජබිම වන ප්‍රදේශයේ ඔවුන්ට ජීවත්වීමට
සිදුවෙලා තිඛෙන්නේ ආරක්ෂක අංශ සාමාජිකයින් එක්ක.ආරක්ෂක අංශ දෙමළ ජාතිකයින්ගේ නිජබිම බලහත්කාරයෙන් අත්පත් කරගෙනයි සිටින්නේ.දකුණ සම්පූර්ණයෙන්ම පාලනය වන්නේ සිංහල ජාතික රජය අතින්.බහුතර සිංහල ජාතිකයින් ඔවුන් සමග දකුණේ වෙසෙන දෙමළ ජාතිකයින් දකින්නේ උවදුරක් හැටියට.මෙනිසා දකුණේ දෙමළ ජාතිකයින්ට ජීවත්වීමට සිදුවෙලා තිඛෙන්නේ කළහකාරී තත්ත්වයක්  ඇතිවේයැයි බියෙන් මුලූගැන්විලා.දෙමළ ජාතිකයින් ඔවුන්ගේ ජාතිය නිසාම නොයෙක්  ආකාරයේ හිංසනයන්ට නොනවත්වාම ලක්වෙමින් සිටිනවා.අතුරුදන් කිරීම් හා  ඝාතනයන්, දමිළ සංස්කෘතිකමය කරුණු බලහත්කාරයෙන් වෙනස් කිරීම සදහා එල්ල කෙරෙන බලපෑම්, කොන් කිරීම් හා කොළණීකරණය මගින් දෙමළ ජාතිය මුලූමනින්ම අතුගා දමන්නටයි ඔවුන් කටයුතු කරමින් සිටින්නේ.
අමතරව දෙමළ ප්‍රදේශයන්ගේ ක්‍රමානුකූලව සිදුකෙරන කොළණිකරණය මගින්, ඡන්ද කොට්ඨාශ වල සීමා මායිම් වෙනස් කිරීම මගින්, රජය තමන්ගේ ඡන්ද ගොඩ වැඩිකරගන්නට කටයුතු කරමින් සිටිනවා.යුධ සමයේදී දෙමළ ජනතාව තමන් වාසය  කරමින් සිටි ප්‍රදේශවල ඇවිලෙන්නට පටන්ගත් ගැටුම් නිසා එම ප්‍රදේශයන් අත්හැර  වෙනත් ප්‍රදේශ වෙත පැමිණීයා.මෙසේ දෙමළ ජනතාව අත්හැර දැමූ ප්‍රදේශවල දැන් රජය කොළණි පිහිටුවමින් සිටිනවා.මෙනිසා භූමියේ පෙර අයිතිය හිමිව තිබූ දෙමළ ජනතාවට දැන් ඒ අයිතිය නැහැ.මේ වගේ වාතාවරණයක් ඇති ප්‍රදේශයක ඡන්දයක්පැවැත්වුවහොත් වාසි රජයට.අනෙක් කාරණය තමයි නව ඡන්දදායකයින් ලියාපදිංචි වීම දෙමළ ජාතිකයින් සැළකීමේදී ඉතා අඩු අගයක් ගැනීම.මේ දෙකේම එකතුවක් හැටියට බැලූවොත් ඇත්තෙන්ම නිදහස ලැබූ දා පටන්ම රටේ නීති රාමුවේ දෙමළ නියෝජනය ඉතා අඩු මට්ටමක පැවතුනේ.තවත් දෙයක් තමයි ශී්‍රලංකාවේ ඡන්ද ක්‍රමය වාර්ගික මුහුණුවරක් ගන්නා එකක් වීම.මෙනිසා තව තවත් දෙමළ ජනතාව කොන්වුනා.මේ දක්වා පැවැත්වුනු කිසිදු මැතිවරණයකදී තම ජාතිය වෙනුවෙන් හඩ  නැගීමට ඔවුනට අවස්ථාව මේ නිසාම අහිමිවී තිඛෙනවා.දමිළ ජාතිකයින්ට රටේ දේශපාලන සැකිල්ලේ කොටසක් වීමට ඉඩක් නැහැ.එකසත් ජාතීන්ගේ විද්වත් මණ්ඩල කමිටු වාර්තාවේ මේ බවත් සදහන් වනවා.එහි දැක්වෙන්නේ ශ්‍රී ලංකාවේ ඇතිවුණු වාර්ගික ගැටුමට මූලිකම හේතුව වී ඇත්තේ ජාතිකත්වය මත පදනම් වී දේශපාලනයෙන්, සමාජයෙන්, ආර්ථීක කටයුතු වලින්, දමිළ ජනතාව කොන් කර දැමීම ලෙසටයි.
මේ දැක්වුණු කරුණු වලින් ශ්‍රී ලංකා රජය දෙමළ ජාතිකයින්ට අමානුෂිකව සළකන ආකාරය පැහැදිලි වනවා ඇති.මේ නිසාම දෙමළ ජාතිකයින් තමන්ගේ ස්වාධීන අයිතිය
වෙනුවෙන්, ජාතියක් ලෙස අතුගෑවීයාමට පෙර ඔවුන්ගේ ආරක්ෂාව සළසා ගැනීමේ අරමුණින් රටේ ඔවුන්ටම කියා ස්වෛරී රාජ්‍යයක් වෙනුවෙන්, කරනා ඉල්ලීම් වල පදනම තවත් ශක්තිමත් වෙනවා.
ප්‍රශ්නය -  ඔබ පසුගිය ජනවාරි මාසයේ නිකුත් කළ අලූත් අවුරුදු පණිවුඩය ‘2014 වසරේදී ශ්‍රී ලංකාව ජාත්‍යන්තර තලයේ තවදුරටත් කොන්කර දැමීමට පියවර ගනිමු. දෙමළ ජාතියට නිදහස දිනා ගැනීම වෙනුවෙන්  ඉදිරියටම යමු.‘ අනුව මේ කියන ආකාරයට ශී්‍රලංකාව ජාත්‍යන්තර තලයේ කොන්කර දැමීමට ඔබ ගැනීමට යන පියවර මොනවාද?

පිළිතුර - පොදුරද මඩුලූ සමුලූව අතරතුරදී සිදුවූ දේවල්, මානව හිමිකම්  කවුන්සිලයට ඉදිරිපත් කෙරුණු ශ්‍රී ලංකාවට එරෙහි යෝජනාවලිය හා නවී පිල්ලේගේ වාර්තාව ශ්‍රී ලංකාව ඉතාම වේගයෙන් අන්තර්ජාතික තලයේ කොන්වෙමින් සිටිනා බව  පෙන්වා දෙන්නන්.මම ශ්‍රී ලංකා රජයට ස්තූති කරන්නත් කැමතියි අපත් සමග තරගයට  වැඩකරනවාට.
ප්‍රශ්නය - දෙමළ දේශපාලඥයින් රජයත් සමග සහයෝගයෙන් කටයුතු  කරමින් සිටිනවා.රටේ ප්‍රධාන දෙමළ විපක්ෂය වන දෙමළ ජාතික සංවිධානය පවා රජය සමග සන්ධාන ගතවීම සම්බන්ධයෙන් ජනපතිවරයා හා සාකච්ඡා පවත්වමින් සිටිනවා.මට නම් පෙනෙන්නේ ශ්‍රී ලංකාවේ දෙමළ ජනතාවගේ තත්ත්වය ඉහළ  නැංවෙමින් තිඛෙන බවක්. නමුත් ඔබ තවදුරටත් ශී්‍රලංකාව කොන් කිරීමක් ගැන පවසනවා. මේ ගැන ඔබ කුමක්ද කියන්නේ?
පිළිතුර - දෙමළ දේශපාලඥයින් බොහෝමයක් රජය හා සහයෝගයෙන් කටයුතු කරමින් සිටිනවායැයි ඔබ කියන ප්‍රකාශය හා මම එකග වන්නේ නැහැ.ඇත්තෙන්ම තත්ත්වය ඔබ පවසන ආකාරයේ නම් මම ශ්‍රී ලංකා රජයට අභියෝග කරනවා රජය සමග සිටිය යුතුද නොඑසේනම් වෙනම ස්වාධීන රාජ්‍යයක් පැවතිය යුතුද මැයෙන් දෙමළ ජනතාව ඉලක්ක කරගෙන සිදුකරන ජනමත විචාරණයක්  පවත්වන ලෙසට.
පිළිතුර - එල්.ටී.ටී.ඊ සංවිධානය දරුණු ලෙස මර්දනය කර ඇති නිසා ඔබ  කියන දෙමළ ඊළම සදහා වන සංක්‍රාන්ති රජයට හොද පදනමක් රටේ නැහැ.නමුත් එල්.ටී.ටී.යට එය නැසුණා වුවත් එය හා හොදින් සම්බන්ධවී තිබුණු දෙමළ ඩයස්පෝරා කණ්ඩායම් එකතුවෙන් සැදුණු ජාලයක් තිබුණා. තවමත් තිඛෙනවා.ඔබ කියන දෙමළ ඊළාම් දේශය ඔබ කොහේද පිහිටුවන්නේ?
පිළිතුර - අපගේ ලාංඡනයේ දැක්වෙන පරිදි ඊළාම් දේශය පිහිටවෙනු ඇත්තේ ශී්‍රලංකාවේ උතුරු නැගෙනහිර ප්‍රදේශයේ.දෙමළ මාතෘභූමිය දිස්ත්‍රික්ක 8  එකතුවක්.අම්පාර, මඩකළපුව, යාපනය, කිළිනොච්චිය, මන්නාරම, මුලතිව්, ත්‍රිකුණාමලය හා වව්නියාව තමයි ඒ දිස්ති්‍රක්ක 08.
ප්‍රශ්නය - ඕක හිතලූවක් නොවෙයිද? ඒ කියන්නේ ඔබට ඔය කියන භූමි ප්‍රදේශයන් අහිමි වෙලා තිබියදී තවදුරටත් වෙනම රාජ්‍යයක් ගැන සිහින මැවීම?
පිළිතුර - නැසී ගිය චෙල්වනායගම් හා දමිල එක්සත් විමුක්ති පෙරමුණ ස්වාධීන දේශයක් වෙනුවෙන් පෙනී සිටි අවස්ථාවේදීත් ඔවුන්ට ඔවුන්ගේම යැයි කීමට භූමියක් තිබුනේ නැහැ.නමුත් ඉන්දියා සාගරකලාපයේ දේශපාලනික පෙරැළි දකින විට අප විශ්වාස කරනවා ස්වාධීන දෙමළ රාජ්‍යයක් ශී්‍රලංකාවේ පිහිටා තිබීම ඉන්දියාවට තමන්ගේ ආරක්ෂාව සම්බන්ධයෙන් වැදගත් වනු ඇතැයි කියා.
ප්‍රශ්නය - ඔබ පවසන දෙය ගැන අවධානය යොමු කරමු.ඔබට වෙනම දේශයක් පිහිටුවීමට අවශ්‍යයි.නමුත් ඒ සදහා වන අවශ්‍යතා කිසිවක් සපුරාගැනීමට ඔබ සමත්වී නැහැ.ඔබට වෙනම දේශයක් පිහිටුවීම වෙනුවෙන් ඔබේය කියා ඇත්තේ ඔබේ ධෛර්යමත්භාවය පමණයි.අනෙක් අතට ඉන්දියාව දෙමළ අරගලයේ මුල් කාලයේ  සිටම වෙනම දේශයක් පිහිටුවීම සම්බන්ධයෙන් විරෝධතාවය දැක්වනවා.මේවා ජයගැනීමට ලෙහෙසි අභියෝගයන් නම් නොවේ නේද?
පිළිතුර - අප විශ්වාස කරනවා දෙමළ දේශපාලන වුවමනා එපාකම්  ඉන්දියාවේ වත්මන් දේශපාලනමය වුවමනා එපාකම් සමග හොදින් ගැලපෙන බව.
ප්‍රශ්නය - ඔබ අවසානට ශී්‍රලංකාවට පැමිණියේ කවදාද? ඔබගේ පාර්ලිමෙන්තු සභිකයින් මොන කාලවලදීද ශී්‍රලංකාවට පැමිණෙන්නේ? ඔවුන්  ඔවුනොවුන් සමග හෝ ජනතාව සමග හෝ සබදතා පවත්වා ගනිමින්ද සිටින්නේ? නැත්නම් ඔවුනුත් අප සේම ඔබගේ පාර්ලිමෙන්තුවේ සිටින්නේ කවුරුන්දැයි දන්නේ නැති අයද?
පිළිතුර - මම පෙර අවස්ථාවකදීත් මේ බව පැහැදිලි කළා.පාර්ලිමෙන්තු මන්තිී්‍රවරුන්ගේ නම් අපගේ වෙබ් අඩවියේ දක්වා තිඛෙනවා.
ප්‍රශ්නය - ඔබට අනුව ශී්‍රලංකා හා දෙමළ සංස්කෘතීන් සැළකීමේදී භාෂාව, සිරිත්විරිත්, හා වෙනත් දේ සම්බන්ධයෙන් දෙක අතර සමානතා තිඛෙනවාද?
පිළිතුර - ශී්‍රලංකා සංස්කෘතිය හා භාෂාව කියා දෙයක් නැහැ.සිංහල සංස්කෘතිය හා දෙමළ සංස්කෘතිය අතර නම් සමානකම් බොහෝමයි.ඒ නිසා මට විශ්වාසයි ශී්‍රලංකාව හා දෙමළ ඊළාම් රාජ්‍යය මිත්‍රශීලීව කටයුතු කරනු ඇතැයි කියා.
ප්‍රශ්නය - ඔබ වැනි පුද්ගලයින් රැසක් සිටිනවා මේ  රටේ දේශපාලඥයින් පිළිකෙව් කරන.නමුත් ඔවුන් බොහෝ දෙනා රටේ සිංහල, දෙමළ, මුස්ලිම් ආදී විවිධ ජාතීන්ට අයත් ජනතාව ගැන එසේ සිතන්නේ නැහැ.ඔබ මේ රටේ ජනතාව දකින්නේ කොහොමද?

පිළිතුර - සියලූ මනුෂ්‍යයින් ස්වභාවයෙන්ම නිර්මානය වී තිඛෙන්නේ මොන වෙනස්කම් තිබුණත් එකිනෙකාට ගෞරව කළ හැකි, එකිනෙකා හා සහයෝගයෙන් කටයුතු කළ හැකි ආකාරයට බව මා විශ්වාස කරනවා.නමුත් ශී්‍රලංකා දේශපාලනයට හසුවන කිසිවෙක් ඒ ගණයට වැටෙන්නේ නැහැ.මොකද ශී්‍රලංකා දේශපාලනයේ විවිධත්වයට ඉඩක් නැහැ.
ප්‍රශ්නය - ඔබ නීතිඥයෙක්.රටක නීති පද්දතිය කවරාකාරයෙන් කි්‍රයාත්මක විය යුතුදැයි හොදින් දන්නා පුද්ගලයෙක්.දැන් ශ්‍රී ලංකාවේ තත්ත්වය ගැන සැළකීමේදී ඔබ සිතනවාද වර්තමානයේ රටේ කඩාවැටී ඇති අධිකරණ පද්දතිය හේතුවෙන් රටවැසි සියලූදෙනා එකම ආකාරයේ වැරදි කරමින් සිටිනවායැයි කියා?
පිළිතුර - 18 වැනි ව්‍යවස්ථා සංශෝධනයෙන් නීතියේ පැවැත්මට හා අධිකරණයේ ස්වාධීනත්වයට එල්ල කර පහරේ ප්‍රතිවිපාක ඔව් රටවැසි සියලූදෙනා කෙරෙන් දැකගත හැකියි.නමුත් ජාත්‍යන්තර නීතිවේදීන්ගේ සංගමයේ මානව හිමිකම් ආයතනය ලේඛණ ගතකර ඇති පරිදි බරපතලම තත්ත්වය වන්නේ කඩා වැටී ඇති අධිකරණ පද්දතිය හා රටේ නීතිය නිසා තවදුරටත් අනාරක්ෂිත වී ඇත්තේ දෙමළ  ජාතිකයින් වීමයි.මූලික මානව හිමිකම් ගැටලූ සියල්ල පාදක වී තිඛෙන්නේ් ජන කොට්ඨාශයක් කුමන ජාතියකට අයත්වන්නේදැයි යන්න මත.ඒ අනුව රටේ මේ දක්වා සිදුවුනු සියලූම ආකාරයේ ප්‍රචණ්ඩ කි්‍රයා සියල්ලටම පදනම වී තිඛෙන්නේත් ජාතියමයි.
ප්‍රශ්නය - නමුත් පොදු ගැටලූ ගැන කතා කරනවාට වඩා ඔබේ වෑයම වෙනම රාජ්‍යයක් ඇති කර ගැනීමට.එහෙම නේද?
පිළිතුර - ඇත්ත වශයෙන්ම ඔව්.දැනට අනවසරයෙන් ඉඩම් අත්පත් කර  ගැනීම් සිදුවෙමින් තිඛෙනවා.රජය මැදහත්වෙලා පිහිටුවන සිංහල ජනාවාස  ඇතිවෙමින් තිඛෙනවා.ඊට අමතරව පෙර දෙමළ ජනතාවට වෙන්ව තිබූ ප්‍රදේශ වල මායිම් වෙනස් කරමින් තිඛෙනවා.දෙමළ ජනයා වෙසෙන ප්‍රදේශ වල ස්ථාන ගත කර සිටින යුධ හමුදා සාමාජිකයින් ගණන දිනෙන් දින වැඩිකෙරෙමින් පවතින්නේ.පෞරාණික දෙමළ ඉදිකිරීම් හා නිමැවුම්වලට, පාසැල්වලට, කෝවිල් වලට, පහර එල්ල කෙරෙමින් පවතිනවා.දෙමළ ජනතාව පීඩාවට පත්කෙරෙමින් තිඛෙනවා. දෙමළ කාන්තාවන් ලිංගික වදහිංසනයට ලක්කෙරෙමින් තිඛෙනවා.මෑතකදී  හෙළිවුනු කරුණක් තමයි දෙමළ කාන්තාවන්ට උපක්‍රමශීලී ලෙස උපත්පාලන ක්‍රම හදුන්වාදීමක් සිදුකෙරෙමින් පවතින බව.ඇතැම් අවස්ථාවන්හීදී මෙය චාටුවෙන්  සිදුවූවත් බලහත්කාරයෙන් සිදුකෙරෙන අවස්ථාද වාර්තා වී තිඛෙනවා.මේ සියල්ලටම  ඉහළින්, වර්ගවාදය නිසා දෙමළ ජනතාවට ශී්‍රලංකාවේ දේශපාලනයට සකිී්‍රයව දායක  වීමට අවස්ථාව අහිමි කර තිඛෙනවා.මෙනිසා එක්සත් ජාතීන්ගේ 2625 වන සභාවාර යෝජනාවලිය අනුසාරයෙන් සකස්වී ඇති අන්තර්ජාතික නීති අනුව හා  කැනඩා ශ්‍රේෂ්ඨාධිකරණ තීන්දුවට අනුව පවතින තත්ත්වය යටතේ දෙමළ ජාතිකයින්ට  ආරක්ෂාකාරීවත්, ගෞරවාන්විතවත් ජීවත්විය හැක්කේ ඔවුනටම වෙන්වූ දේශයක පමණක් යැයි අප විශ්වාස කරනවා.
ප්‍රශ්නය - ශී්‍රලංකාවේ බරපතල ගණයේ කැරලි කෝළහාල කිහිපයක්ම ඇතිවුනා.පළමුවැන්න ඇතිකළේ එල්.ටී.ටී.ය හා අවිගත් දෙමළ  කණ්ඩායම්.දෙවැන්න ඇතිකළේ සිංහල තරුණ තරුණියන්ගේ එකතුවෙන් ඇතිවුනු ජේවීපී ය.ජේවීපීයේ නායකයා එවක සිටි රජය අතින් ඝාතනය වීමෙන් පසු ජේවීපීය රටේ දේශපාලන ප්‍රවාහයට ඇතුල්වුණා. නමුත් එහි නායකයා ඝාතනය වීම දක්වා අපට දක්ෂ, රටේ අනාගතය භාරගැනීමට සිටි සියගණනක් තරුණ තරුණියන්ගේ ජීවිත අහිමිවුනා.රට පස්සට ගියා.මේ සිද්ධි වල ප්‍රතිඵල ලෙස රටේ බලය නැවතත් තහවුරු කරගත්තේ එසමෙයහි සිටි රජයේ මුල්පෙල පුද්ගල පිරිසමයි.මේ මුල්පෙල පුද්ගලයින් අතර අසීමාන්තික බලයක් රටේ ව්‍යවස්ථාවෙන් ලබාදීලා තිඛෙනවා. 18 වැනි සංශෝධනය තමයි එහි අලූත්ම පියවර.ඒ වගේම එය අවසාන පියවරත් වන එකක් නැහැ.ඔබට හැගෙන හැටියට රටේ මේ වගේ තත්ත්වයක් ඇතිවන්න මුල් වුනේ මොකක්ද? ඇයි මේ කැරළි කෝළහාල ඒවා ඇතිවන අවස්ථාවන් වල සිටි රට පාලනය කළ පුද්ගලයින්ගේ බලය තවත් වැඩිකිරීමට මිස රජය තවත් ජනතාවට සමිීප කිරීමට සමත් නොවුනේ?
පිළිතුර - මුලින්ම මම පෙන්වා දෙන්න ඕනෙ ජේවීපී ගැටළුවේදී රජය  සිංහල ජනතාවගේ ගම්මාන වෙත බෝම්බ හෙළන්න, ආර්ථීක බාධක නවන්න කටයුතු කළේ නැහැ.නමුත් රජය ඒ සියලූ දේ දෙමළ ජනතාවට කළා හා කරමින් සිටනවා.රටක ජනගහණයේ කිසියම් ජන කොට්ඨාශයක් ස්වාධීනත්වය ඉල්ලා කරන හඩනැගීමක් බලය යොදා මර්දනය කළ අවස්ථාවල, හෝ යුක්තිය වෙනුවෙන් පෙනී සිටින්නවුන් මර්දනය කිරීමට බලය භාවිතා කළ අවස්ථාවල ප්‍රතිඵල ලෙස කළහකාරී වාතාවරණ වලින් යුත් පාලන තන්ත්‍රයන් ඇතිවුණු රටවල් පිළිඹද උදාහරණ වුවමනා තරම් ඉතිහාසයේ තිඛෙනවා.අයුක්තිසහගත කි්‍රයා නිකම්ම යට ගසා හෝ බහුතර ජනතාව මුලා කර හෝ බලය භාවිතයෙන් මර්දනය කර හෝ තැබිය නොහැකියි.ලෝකයේ සියලූම ශිෂ්ඨ සම්පන්න සමාජයන් සියල්ල දැන් ඒ තත්ත්වයට පැමිණිලා තිඛෙන්නේ එවන් ගැටලූ ඇතිවුනු අවස්ථාවල ඒවා ගැන මානුෂීයව පුද්ගලයින් අතර හා කණ්ඩායම් අතර එකිනෙකාගේ අවශ්‍යතාවන් ගැන අවබෝධයක් ඇතිව සොයාබලා අවශ්‍ය පියවර ගෙන තිබීම හා සුදුසු පරිදි සමාජ ක්‍රමයේ වෙනස් කම් සිදුකිරීම නිසා.
ප්‍රශ්නය - එල්.ටී.ටී.යේ යුධමය අතින් පරාජය කිරීමෙන් පසු මේ එළැඹ ඇති කාලය දෙමළ ජාතිකයින්ට ස්වාධීනත්වය සදහා කළ අරගලයට තමන් කළ කැපවීමෙන් ප්‍රතිඵලක් ඇත්දැයි විමසා බැලීමට හොදම අවස්ථාව බවට සැක නැහැ.ඔබ හිතනවාද  රටේ දෙමළ ජාතිකයින් දිවයිනේම වෙනම රාජ්‍යයක් ඇති කර ගැනීමට සහයවේය කියා?
පිළිතුර - ඔබ මේ ගෙවෙන සමය එල්.ටී.ටී.යෙන් පසු යුගයක් ලෙස සැළකුවත්  ශ්‍රී ලංකා රජය එසේ සළකන්නේ නැහැ.එල්.ටී.ටී.ය තවමත් රජයේ ත්‍රස්ත සංවිධාන ලැයිස්තුවේ තිඛෙනවා.අනෙක් කාරණය ස්වාධීන රාජ්‍යයක් සදහා වන අවශ්‍යතාව එල්.ටී.ටී.ය බිහිවීමට පෙර සිටම තිබුණු දෙයක්.
ප්‍රශ්නය - ශ්‍රී ලංකාවේ ඊළාම් රාජ්‍යයක් පිහිටවුනු ලැබුවහොත් ඔබ ඔබගේ පවුලේ සාමාජිකයින් හා ඔබගේ රජයේ සාමාජිකයින් සමග බටහිර රටවල ඔබලා විදින සියලූ සැප සම්පත් අතහැර එහි පදිංචියට එනවාද? ඊළමේ පදිංචිවූ විට ඔවුන්ට දෙමළ  භාෂාව භාවිතයේදී ගැටලූ මතුවනු ඇත්ද? මම කියන්නට අදහස් කරන්නේ පෙනුමට නොව සැබෑවටම දෙමළ ජාතිකයෙකු වීම පිළිබදව?
පිළිතුර - පෞද්ගලික ප්‍රශ්න වලට පිළිතුර දීමට මම අකමැතියි.මගේ දෙමළ ගතිය මගේ කැමැත්ත අනුව ඇතිවන්නක්.ඒ සම්බන්ධයෙන් කිසිවෙකුටවත් ප්‍රශ්න නගන්නට බැහැ.

ප්‍රශ්නය - රටේ කිසිවෙකුටවත් නැවත යුද්ධයක් කරා යාමේ වුවමනාවක් නැහැ.අනෙක බහුතරයක් දෙනා රටේ දේශසීමා පැනවීමක් ගැන මනාපයකුත් නැහැ.ඔවුන් සියලූදෙනාට අවශ්‍ය සාමකාමිී ගෞරවාන්විත දිවිපෙවෙතක්.දමිළ ඊළම සදහා වන බහුජාතික රජයට එය සහතික කළ හැකිද? නැගෙනහිර මුස්ලිම් ජනතාවගේ අවශ්‍යතා සම්බන්ධයෙන් ඔබ කටයුතු කරන්නට යන්නේ මොන ආකාරයටද? වතුකරයේ දෙමළ ජනතාවගේ අයිතීන් ගැන කොහොම?
පිළිතුර - අප ආරාධනා කරනවා වතුකරයේ දෙමළ ජනතාවට උතුරු  නැගෙනහිර ප්‍රදේශයක් කරා පැමිණෙන්න කියලා.මුස්ලිම් ජාතිකයින් ගැන පවසනවානම් අන්තර්වාර පාලන රජයක් සදහා වන අධිකාරී ප්‍රකාශයේ මෙහෙම සදහන් වෙනවා.
‘අන්තර්වාර පාලන රජය සදහා වන අධිකාරියේ මුස්ලිම් නියෝජනයක් සදහා ඔවුන්ට  අයිතිය ඇත.එයින් ඔවුන් අරබයා අධිකාරී ප්‍රකාශයේ සිදුවිය යුතු වෙනස්කම් සම්බන්ධයෙන් ඔවුන්ට සහය විය හැක.‘
‘එක් පාර්ශවයකට වාසි සහගත වන හෝ තවත් පාර්ශවයකට අවාසි සහගත වන කිසිම  ආකාරයක නීතියක්, නියෝගයක්,අණ දීමක් හෝ තීන්දුවක් මෙම ප්‍රකාශයේ අන්තර්ගත නොකෙරෙන අතර පාර්ශවයක ආගමික හෝ සංස්කෘතිකමය අවශ්‍යතාවක් සළකා වෙනස්කමක් සිදුකිරීම කෙරෙහි පමණක් සළකා බැලෙනු ඇත.‘
ප්‍රශ්නය - ශ්‍රී ලංකා ජනාධිපතිවරයා විසදුමක් සම්බන්ධයෙන් සාකච්ඡාවකට  පැමිණෙන්නැයි ඔබට ආරාධනාවක් කළහොත් ඔබගේ ප්‍රතිචාරය කෙබදු වනු ඇත්ද?  ඔබ ඔහු හමුවීමට යන්නේ නම් සාකච්ඡා කිරීමට බලාපොරොත්තු වන ප්‍රධාන ගැටළු මොනවාද?
පිළිතුර - දෙමළ ජනතාවට කිසිවෙකුගේ බලපෑමකින් තොරව තම  තමන්ගේ දේශපාලන දැක්මවල් අනුගමනය කිරීමේ අයිතිය ලබාදීම සම්බන්ධයෙන් ජනමත විචාරණයක් පැවැත්වීමට අප අන්තර්ජාතික ප්‍රජාවගේ සහය ලබා ගැනීමේ අපේක්ෂාවෙන් සිටින්නේ.
ප්‍රශ්නය - අප එක්සත් ජාතීන් ශ්‍රී ලංකාවට එරෙහිව තෙවන වරටත් ඉදිරිපත් කර ඇති යෝජනාවලිය ගැන කතාබහ කරමු.පෙර ඉදිරිපත්වූ යෝජනාවලීන් 02 සේම මෙම යෝජනාවලිය ඉදිරිපත් කර ඇත්තේ ඇමරිකාවයි.ඒත් එක්කම එක්සත් ජාතීන්ගේ මානව හිමිකම් මහකොමසාරිස් නවී පිල්ලේ ශී්‍රලංකාවේ සිදුව ඇතැයි කියන යුධ  අපරාධ සම්බන්ධයෙන් සොයාබැලීමට අන්තර්ජාතික පරීක්ෂණයක් කළ යුතුයැයි  වාර්තාවක්ද ඉදිරිපත් කරලා. ශ්‍රී ලංකා රජය ඇයගේ වාර්තාව ප්‍රතික්ෂේප කරන අතරම ඇයට චෝදනා නගනවා රටේ අභ්‍යන්තර කටයුතු වලට ඇගිලි ගසන්නට  පැමිණෙනවාය කියා.නමුත් දෙමළ ජාතික සන්ධානය මෙම වාර්තාවට සහය පළ කර තිඛෙනවා.ඔවුන් අතීතයේදී මේ ආකාරයටම කටයුතු කළා.උද්ගතවී ඇති තත්ත්වය සම්බන්ධයෙන් ඔබේ අදහස කොහොමද?
පිළිතුර -   ශ්‍රී ලංකාවේ සිදුව ඇතැයි කියන මානව හිමිකම් කඩවීම් හා යුධ  අපරාධ සම්බන්ධයෙන් මේ ආකාරයේ අන්තර්ජාතික පරීක්ෂණයක් පැවැත්වීමේ යාන්ත්‍රණයක් ඉදිරිපත්වීම අප ඉතා අගය කොට සළකන්නක්.එක්සත් ජාතීන්ගේ මානව හිමිකම් කවුන්සිලය ඒඑච්ආර්සී25එල්1 පළමු සංස්කරණය යන යෝජනාවලිය සම්මත කරගෙන තිඛෙන අතර එයට අනුව විධිමත් අන්තර්ජාතික පරීක්ෂණයක් කරන්න ඔවුනට බලය ලැබී තිඛෙනවා.අප යෝජනා කර සිටින්නේ 2009 දී යුද්ධය අවසන් වීමට පෙර සමයේදී, යුද්ධයේ අවසන් සමයේදී හා මේ ගෙවෙන පශ්චාත් යුධ සමයේදී යන අවස්ථා 3 මුල් කරගෙන පරීක්ෂණය සිදුවිය යුතුබවයි.
අප කණාගටුවනවා ඉන්දියාව මෙවන් පරීක්ෂණයක් පැවැත්වීම  සම්බන්ධයෙන් විරෝධය පළ කිරීම ගැන.ඉන්දියාව ඊළාම් දමිළයන් හා අවබෝධාත්මක ලෙස කටයුතු කරන සංස්කෘතිකමය කරුණු නිසා ඊළාම් දමිළයින් අතීතයේ සිටම ආරක්ෂා කළ රටක්.නමුත් ඉන්දියාව අන්තර්ජාතික පරීක්ෂණයක් සදහා පැවැත්වුණු ඡන්ද විමසීමේදී ඡන්දය ප්‍රකාශ කිරීමෙන් වැළකී සිටීම අපව කළකිරවන්නක්.
අප එක්සත් ජාතීන්ට බල කර කියා සිටිනවා මේ පරීක්ෂණයේදී සාක්ෂිකරුවන්ගේ, යුද්ධයෙන් දිවිගලවාගත්තවුන්ගේ හා මානව හිමිකම් කි්‍රයාධරයින්ගේ ආරක්ෂාව හා ගෞරවය ආරක්ෂා කිරීම සදහා යාන්ත්‍රණයක් මුලින් ඇති කර  සිටිනා ලෙස.මෙම කාරණය එක්සත් ජාතීන්ගේ ප්‍රඥප්තියේ 99 වැනි වගන්තිය යටතේ කි්‍රයාවට නැංවිය යුතුව ඇතැයි අප කියා සිටිනවා.
ප්‍රශ්නය - නවී පිල්ලේ එල්.ටී..ටී.ඊ සංවිධානය අතින් සිදුවූ යුධ අපරාධ සම්බන්ධයෙන්ද චෝදනා නගා තිඛෙනවා.මේ චෝදනා වලට උත්තර බදින්නේ  කවුද, ඔබද?  නෙදියවන්ද? ඒ එක්කම දෙමළ ජාතික සන්ධානයේ කි්‍රයාකාරකම් නිසා එල්ල වී ඇති චෝදනා සම්බන්ධයෙන් කටයුතු කිරීමේදී ඔබට ගැටලූකාරී වාතාවරණයක් ඇතිව තිඛෙනවාද?
පිළිතුර - අප සියලූදෙනා මානව හිමිකම් මහකොමසාරිනියගේ පරීක්ෂණය සාර්ථක කර ගැනීමට සහය වනවා ඇති.
ප්‍රශ්නය - ශී්‍රලංකාවට සම්බාධක පැනවිය යුතුව ඇතැයි ඇතැම් දෙමළ සංවිධානයන් යෝජනා කරනවා.නමුත් එසේ සම්බාධක පැනවූවොත්  තැලෙන්නේ රටේ පාලකයා, ඔහුගේ පවුලේ සාමාජිකයින් හෝ ඔහුගේ  සහචරයින් නොව රටේ ජනතාවමයි.එසේ ජනතාවට හානි පැමිණෙනවානම් අන්තර්ජාතික ප්‍රජාව ශී්‍රලංකාවට එරෙහිව සම්බාධක පැනවීම ඔබ දකින්නේ  කොහොමද? දෙමළ ජාතිකයින් මෙසේ සම්බාධක වලට යටවෙලා ජීවත් වීමට කැමතිවනු ඇද්ද?
පිළිතුර - මෙය රටවල් වලට සම්බාධක පැනවීම ආරම්භ වූ කාලයේ සිටම එයට එරෙහිව නැගෙන තර්කයක්.නමුත් සම්බාධක ඇත්තටම සාර්ථක වී ඇති බව පෙන්වන අවස්ථා ඉතිහාසයේ තිඛෙනවා.වැරැද්දකට දඩුවම් කිරීමේදී ඒ වැරැද්දටම පමණක් දඩුවම් කළ හැකි ක්‍රමවේදයක් ලෝකයේ නැහැ.නමුත් ඉතිහාසයට අනුව සම්බාධක වලට වටිනාකමක් තිඛෙනවා.එය රටකට පැනවිය හැකි දරුණුම දණ්ඩනය වන  යුධමය අතපෙවීමක් හා රටක කටයුතු වලට මැදහත්විය හැකි සරලතම මාර්ගය වන දේශපාලනය අතපෙවීමක් යන 2 අතරමැද පවතින්නක්.සම්බාධක පනවා දළ දේශීය නිශ්පාදිතය සියයට 2.5 කින් වැනි කුඩා අගයකින් පහළ යවා රටේ වෙනසක් ඇති කිරීමට මාර්ග පාදා ගත් අවස්ථා ඉතිහාසයේ තිඛෙනවා.තවත් අවස්ථා 11 තිඛෙනවා සම්බාධක පණවා දළ දේශීය නිශ්පාදිතය සියයට 5 ක් වැනි අගයකින් පහත  හෙලු.ඒවායින් 9 කදීම අවසානයේ දේශපාලන විසදුමක් කරා ඒමට හැකිවුනා.

ප්‍රශ්නය - මානව හිමිකම් ක්‍රියාධරයින් ඔබගේ එල්.ටී.ටී.ඊ සංවිධානයට නගන බරපතලම චෝදනා වන්නේ ඒ අදුරු සමයේදී ජාතිකත්වය පවිත්‍ර කිරීමටැයි යැයි කියමින් මුස්ලිම් ජාතිතයින් මරා දැමුණු විට දෙමළ ජාතිකයින් බහුතරයකගේ කැමැත්ත ඊට හිමිවීමත්, කි්‍රස්තියානි පූජකයින් එම මිනීමැරම් සාධාරණීකරණය කිරීමත්, එල්.ටී.ටී.ය එයට විකල්ප මත දැරීමේ වරදට යාපනයේ නගරාධිපතිවරුන් වූ අමිර්තලිංගම්, නීලන් තිරුදෙල්වම් ආදීන් හා වෙනත් නිරායුධ පුද්ගලයින් රාශියක් ඝාතනය කළද දෙමළ ප්‍රජාව එල්.ටී.ටී යට දිගින් දිගටම සහය පළ කිරීමත් යන ඒවාය.මෙයින් කියැවෙන්නේ දෙමළ සංස්කෘතිය (කොටි සංස්කෘතිය පමණක් නොවේ) ශී්‍රලංකා පාලන තන්ත්‍රය සේම ලේ පිපාසිතවූ බවද? එල්.ටී.ටී.ඊ සංවිධානයේ නීති උපදේශකයා ලෙස කටයුතු කළ හා ප්‍රභාකරන්ගේ මරණයෙන් පසු ඔහුගේ තැන ගැනීමට සිටින්නේයැයි සැළකෙන ඔබ මේ සම්බන්ධයෙන් පැහැදිලි කරන්නේ කොහොමද?
පිළිතුර - ජාතිකත්වය පිරිසිදු කිරීම යන්නෙන් අදහස් කෙරෙන්නේ  කිසියම් ජාතියක් සහමුලින්ම රටකින් පහ කර දැමිීමට කටයුතු කිරීම.උදාහරණයක් හැටියට සර්බියාවේ මුස්ලිම්වරුන්ට සිදුවූ දේ පෙන්වා දිය හැකියි.පල්ලි කඩාදමමින් මුස්ලිම් ජාතිකයින් සංහාරය කරමින් සිදුවුණු එම කි්‍රයාවලිය අවසානයක් දුටුවේ  සර්බියාවේන් මුස්ලිම්වරුන් පිටමං වූ පසු.යාපනයේ සිදුවූයේ මෙය නොවේ.එනිසා එහි සිදුවූ දේවල් ජාතිකත්වය පිරිිසිදු කිරීම කියන ගණුමට බැර කරන්න බැහැ.එල්.ටී.ටී.ඊ නායකයින් බොහෝ දෙනෙක් සාමාන්‍ය ජීවිතයේදී භාවිතා කළේත් මුස්ලිම් නම්.
ප්‍රශ්නය - ඊළාම් රාජ්‍යයක් සදහා වන බහුජාතික රජය ත්‍රස්ත සංවිධානයක් හැටියට ශී්‍රලංකා රජය පසුගියදා ලැයිස්තු ගත කරනු ලැබුවා.මේ ගැන ඔබේ අදහස් මොනවාද?
පිළිතුර - ජ් ශ්‍රී ලංකා රජයේ විහිළුකාර ක්‍රියාකලාපය ඔවුන්ගේ  බලාපොරොත්තු කඩවීම, වාර්ගිකභාවය හා බලයේ අයුතු භාවිතය යන කාරණා  හොදින් පෙන්වා දෙන්නක්. ඊළාම් රාජ්‍යයක් සදහා වන බහුජාතික රජය ප්‍රජාතාන්ත්‍රික පදනමක් මත පිහිටැවුනු ඡන්ද විමසීම මගින් සාමාජිකයින් පත්කරගෙන සිටින, ජාතිය, මාතෘභූමිය හා ස්වාධීන කැමැත්තට ඇති අයිතිය තහවුරු කිරීමේ අරමුණින් ඇති වුනක්.අපගේ අරමුණු දිනා ගැනීමට අප භාවිතා කිරීමට අදහස් කරගෙන සිටින්නේ නීත්‍යානුකූල හා සාමකාමිී මාර්ග.සියලූ දමිළ ඩයස්පෝරාවන් ප්‍රජාතන්ත්‍රවාදීව, නීත්‍යානුකූලව හා මනා විනිවිදභාවයකින් යුතුව කටයුතු කරන සංවිධානයන්.දෙමළ ඊළම සදහා වන බහුජාතික රජය සැළකීමේදී මම පෙර සදහන් කළා සේ සාමාජිකයින් පත්කර ගැනෙන්නේත් විනිවිද භාවයකින් යුත් ප්‍රජාතාන්ති්‍රක කි්‍රයාවලියක් ආධාරයෙන්.
සියලූම දෙමළ සංවිධානයන් ත්‍රස්ත සංවිධානයන් යැයි තහනම් කිරීමට ශී්‍රලංකා රජය කටයුතු කිරීමෙන් ප්‍රජාතාන්ති්‍රකව එම සංවිධානයන් හා ගනුදෙනු කිරීමට රජය දක්වන බිය හොදින්ම පෙනෙනවා.
6 වැනි ව්‍යවස්ථා සංශෝධනය මගින් මිලිටරි බලය පෙන්වා දෙමළ ජනතාව බියපත් කර තමන් කැමති දේශපාලන ප්‍රවාහයකට එක්වීමට හා කටයුතු කිරීමට තිඛෙන නිදහස ඔවුනට අවුරා දමා තිඛෙනවා.නමුත් මෙම සංශෝධනයට රටෙන් බැහැර  අන්තර්ජාතික තලයේ කිසිම බලයක් නොමැති බව ශී්‍රලංකා රජය අමතක කර දමා  තිඛෙන්නක්.මෙම සංශෝධනයෙන් රටේ වෙසෙන දෙමළ ජාතිකයින්ව අන්තර්ජාතික තලයේ වෙසෙන දෙමළ ඊළාම් සාමාජිකයින් හා අදහස් හුමවාරු කිරගැනීම,එක්ව  වැඩකටයුතු කිරීම ආදියෙන් වළකා ඔවුන්ව රටේ තනිකරවා දුර්වල කිරීම තමා ශී්‍රලංකා රජයේ බලාපොරොත්තව වන්නේ.
සංශෝධනයෙන් ශ්‍රී ලංකාවේ දෙමළ ජාතිකයින් උපන්ගෙයිම  සිරකරුවන් බවට ශී්‍රලංකා රජය පත්කර ඇති ආකාරය පැහැදිලිව දැකගත හැකියි.ඇත්තෙන්ම මේ සංශෝධනය පිහිටුවීමට ශී්‍රලංකා රජය කටයුතු කර තිඛෙන්නේ  ඔවුන්ට නියමිතව තිඛෙන බලතල වලින් ඔබ්බට ගොස්.
ප්‍රජාතාන්ත්‍රික රාමුව යටතේ සිට ක්‍රියාත්මක වන අනෙක් රටවලට මෙවන් සංශෝධනයක් පිහිටුවාගැනීමට ප්‍රජාතාන්ත්‍රිකයැයි කියාගන්නා ශී්‍රලංකාව කටයුතු කර තිබීම නින්දාවක්.
2009 වසරේදී ත්‍රස්තවාදයට එරෙහිව යැයි පැවසුනු නාටකය සාර්ථකව රගදැක්වීමට ශී්‍රලංකා රජය සමත්වුනා.නමුත් මෙවර ප්‍රේක්ෂකයා පෙර මෙන් මෝඩ නැහැ.ශී්‍රලංකා රජයේ ප්‍රජාතන්ත්‍රවාදී නොවන කි්‍රයාකාරකම් මෙවර නම් ජාත්‍යන්තර ප්‍රජාවගේ  අවධානයට ලක්වනු ඇතැයි අප බලාපොරොත්තුවෙන් සිටින්නේ.දමිළ ඊළාම් රාජ්‍යයක් සදහා වන බහුජාතික රජය සමූලඝාතනයන්ට වගකිව යුතු යුධ අපරාධකරුවන්ගේ නම්  ලැයිස්තුවක් ඉදිරියේදී නිකුත් කිරීමට සිටිනවා.අප එම ලැයිස්තුව ලොව සියලූ රටවල රජයන් වෙත ලබා දී ඒවායේ නම් සදහන් පුද්ගලයින්ට වෙනත් රටවලට ඇතුල්වීම තහනම් කරන ලෙසටත් කිසියම් විදෙස් රටක ඔවුන්ගේ වත්කම් හා දේපළ ඇත්නම් ඒවා එම රටෙහි රජය වෙත පවරාගන්නා ලෙසත් ඉල්ලා සිටීමට අප සැළසුම් කර තිඛෙනවා.අපගේ මේ වැඩකටයුතු වල සකස් කර තිඛෙන්නේ එක්සත් ජාතීන්ගේ ආරක්ෂක කවුන්සිල 1373 සභාවාරයේදී සම්මත කරගත් ත්‍රස්ත විරෝධී කමිටුවේ ක්‍රියාකාරීත්වය අනුසාරයෙනුයි.
මේ දීර්ඝ සම්මුඛ සාකච්ඡාව අවසන් කිරීමට කාලය පැමිණිලා. ස්තූතියි අපත් සමග එකතු වුණාට.
පිළිතුර - බොහොම ස්තූතියි.
 පරිවර්තනය - කෝවිද ගුණසේකර
Read more

Popular Posts

Popular Posts