Open top menu
Tuesday, June 3, 2014

* ගංජා වනසන්නට පෙර කේරළ ගංජා මරාලයෙන් ගැලවෙමු!
* වේලන්නේ මදුරු නාශක දියර ගහලා
* කේරළ ගංජා සැර වැඩියි!
* දැන් අපේ රටේ දේශීය වෙදකමට ගන්නෙත් කේරළ ගංජා


කාලයෙන් කාලයට විවිධාකාර මත්ද්‍රව්‍ය සමාජයට එකතු වන්නේය. මෑත කාලයේ අප සමාජයේ ජනප්‍රියම මත්ද්‍රව්‍ය කේරළ ගංජාය. කේ.ජී. කෑල්ලක්‌ මිලට ගත නොහැකි නගරයක්‌ ගමක්‌ නැති ගානය. රට හැම තැනම කේරළ ගංජා විකිණීමට තිබෙන්නේය. කේ.ජී. බට්‌ටෙක්‌ රුපියල් හතළිහට අලෙවි වන විට කේ.ජී. ග්‍රෑම් 10 පැකට්‌ එක රුපියල් දෙදහස්‌ පන්සීයත් තුන්දහසත් අතර මුදලකට අලෙවි වන්නේය. කේරළ ගංජාවලට මෙරට ඇති ඉල්ලුම අතිශය ඉහළය. එහෙත් එවැනි වටිනාකමක්‌ ඇති කේරළ
ගංජා සම්බන්ධයෙන් දැන් දැන් රට තුළ මතු වෙමින් තිබෙන කතා නම් අතිශය භයානකය.

"කේරළයෙන් ගංජා ගේන ඒක ඇත්ත... ඒත් රට හැම තැනම තියෙන කේ.ජී. කේරළ ගංජා නෙමෙයි..." කංසා පිළිබඳ හොඳ දැනුමක්‌ සහ ගංජා ව්‍යාපාරය ගැන මනා පළපුරුද්දක්‌ ඇති කෙනකු කේරළ ගංජා ගැන අප නොදත් තතු බොහෝ දේ අපට පැහැදිලි කර දුන්නේය.

"අපේ රටේ කංසා සැර අඩුයි... ඖෂධීය ගුණය වැඩියි. කේරළයේ ගංජා සැර වැඩියි. ලංකාවට ගෙන්වන කේරළ ගංජා ඊටත් වඩා සැර වැඩියි. මොකද කේ.ජී. වේලන්නේ මදුරු නාශය දියර ස්‌ප්‍රේ කරලා. උගුරු දෙක තුන ඇද්ද ගමන් නවතින්නේ උඩු ගුවනේ. අපේ මිනිස්‌සුන්ටත් ඕනා ඉක්‌මනටම තරු බලන්න නේ. ඒක නිසා තමයි ඔය කේ.ජී. හොයාගෙන එන්නේ. රට හැම තැනම කේ.ජී.වලට හොඳ බිස්‌නස්‌ එකක්‌ තියෙනවා. ඒ නිසා මහා පරිමාණයෙන් ගංජා බිස්‌නස්‌ කරන උන් දැන් ලංකාවේ ගංජාවලටත් මදුරු නාශක දියර ස්‌ප්‍රේ කරනවා. කැස්‌සට බොන පැණි කලවම් කරලා කංසා වේලනවා. දැන් ලංකාවේ ගංජයි, කේරළ ගංජයි සේරම කේ.ජී. තමයි...

මමත් කේ.ජී. හොඳට බිව්ව කෙනෙක්‌. කේ.ජී. කෑල්ල කුඩු කරලා සිගරැට්‌ එකක කුඩුවලට බොහෝම චුට්‌ටක්‌ කලවම් කරන්නේ. ඒ බට්‌ටත් බොන්නේ දෙතුන් දෙනෙක්‌ එක්‌ක. ඒත් එක දවසක්‌ වෙනද බොනවට වඩා උගුරු දෙක තුනක්‌ වැඩි වෙලා මාව ගල් වුණා. වාඩි වෙලා හිටපු තැනින් නැගිට ගන්න බැරිව පැය භාගයක්‌ විතර එක තැන හිටියා... මට කිසිම දෙයක්‌ මතක නැහැ. එදායින් පස්‌සේ මම කේ.ජී. නම් බොන තැනකවත් ඉන්නේ නෑ. වස නැති අපේ ගංජා ටිකක්‌ සෙට්‌ වුණොත් අදටත් බොනවා... ඇඟටත් හොඳයි. බඩපිරෙන්න කෑම ටිකක්‌ කන්නත් පුළුවන්. හැබැයි අපේ රටේ ගංජා වුණත් වැඩිය ඉරුවොත් කටේ කෙළ ටිකත් වේලිලා යනවා. ලෙඩකට දෙන බෙහෙතක්‌ වුණත් පමණට වඩා ගත්තොත් මොළේ විකාර වෙනවා නේ. සෙම වේලන්න දෙන පැණියත් එහෙම තමයි නියමිත මාත්‍රාවට පාවිච්චි කළොත් ඔසුවක්‌. පමණට වඩා ගත්තොත් මත්ද්‍රව්‍යයක්‌..." කංසාවල ගුණ අගුණ ගැන ඒ කතා කළේ අප නොවේ. කේ.ජී. බී හොඳ හැටි තරු බලපු තරුණයෙකි.

අඩු මුදලකින් පැය ගානකට සිහින ලෝකයකට යන්න පුළුවන් එකම බෙහෙත ගංජා බව මත්ලෝලීහු පවසන්නාහ. එහෙයින්ම අප සමාජයේ ගංජා පානයට ඇබ්බැහි වූ තරුණයෝ ද බොහෝය. වැඩිහිටියෝද එමටය. පිරිසක්‌ මත්ද්‍රව්‍යයක්‌ ලෙස ගංජා පාවිච්චි කරන විට තවත් පිරිසක්‌ සිරුරට අසාමාන්‍ය ශක්‌තියක්‌ එකතු කරගැනීමේ අදහසින් ගංජා පානය කරති. කිනම් අරමුණකින් ගංජා පානය කළද සිදුවන්නේ ශරීරයට අහිතක්‌ පමණි.

ගංජාවල අඩංගු ප්‍රධාන රසායනික සංයෝගය වන්නේ ටෙට්‌රාහයිෙඩ්‍රාa කැනබිනෝල් (ඔHC) ය. කෙනෙකු ගංජා පානය කළ විට හෘද ස්‌පන්දය වැඩි වී නිදිමත සහ හිසේ බර ගතියක්‌ ඇති වන බව විද්‍යාත්මක සොයාගැනීමකි. එහෙයින් ගංජා නිතරම භාවිත කිරීම ශරීරයට හානි ගෙන දෙන්නක්‌ බව ද විද්‍යාත්මක මතයකි. ගංජා පමණක්‌ නොව සියලුම මත්ද්‍රව්‍ය සහ මත්වතුර මිනිස්‌ සිරුරට අහිතකරය. එසේ නම් මදුරුවන් විනාශ කරන බෙහෙත්, සෙමට දෙන පැණිය වැනි විෂ රසායනික ද්‍රව්‍ය මුසු කර වියළන ලද ගංජා පෙර සඳහන් (ඔHC) රසායනික සංයෝගය කෙසේ විකෘති කරනවා ඇද්ද? එවැනි විෂ මත්ද්‍රව්‍යයන් ශරීරයට ඇතුළු වූ විට ගල් නොවී තිබුණොත්ය පුදුමය.

එහෙත් විෂ ද්‍රව්‍ය කලවම් කළ විකෘති කළ ගංජා නොව, නියම පිරිසිදු කංසා යනු මිනිසුන් ගල් කරනු ලබන මත් රකුසකු නොවේ. ඈත අතීතයේ සිට පැවැත එන දේශීය වෙදකමට ගන්නා ඖෂධයකි. ෙත්‍රෙයිලෝක විජයාපත්‍ර නොහොත් කංසා ශාකයේ ඖෂධීය ගුණයෙන් යුත් රසායනික සංයෝග හාරසීයක්‌ පමණ අඩංගු බව හෙළ වෛද්‍යවරුන් සොයාගෙන ඇත. ලොව පුරාම රටවල් කංසා ශාකය ඖෂධයක්‌ ලෙස භාවිතා කරන බව ද දැනගන්නට ලැබේ. එමෙන්ම ලෝකයේ කංසා වැවෙන රටවල් අතුරින් ඖෂධීය ගුණයෙන් ඉහළම කංසා ශාකය වැවෙන්නේ අපේ රටේය. එහෙත් ලෝකයේ සෑම රටක්‌ම සේම මෙරටත් ගංජා අලෙවිය, ප්‍රවාහනය, වගා කිරීම සහ පානය කිරීම නීති විරෝධීය. නමුදු මෙරට දේශීය වෙදකමට කංසා අනිවාර්ය ඖෂධයකි. එහෙයින් අතීතයේ හෙළ වෛද්‍යවරුන්ගේ ගෙවතු තුළ ගංජා පැළෑටි කිහිපයක්‌ වගා කරගෙන සිටි බවද දැනගන්න ලැබේ. එහෙත් දැන් එසේ වගා කිරීම දඬුවම් ලැබිය හැකි වරදකි. එහෙයින් දැන් ආයුර්වේද වෛද්‍යවරු තම බෙහෙත් හේත් පිළියෙල කරගැනීම සඳහා භාවිත කරන්නේ කේරළයෙන් ගෙන්වන ගංජා බව දේශීය ආයුර්වේද වෛද්‍ය පණ්‌ඩිත නන්දන විමලවීර මහතා අප සමග පැවසුවේය.

"ඉන්දියාවෙන් ගේන කේරළ ගංජා දේශීය වෙදකමට හරි යන්නේ නැහැ. ඒ වගේම තමයි බෙහෙත්වලට හැම ගංජා ගහක්‌ම හරියන්නෙත් නැහැ. බෙහෙත්වලට ගන්නේ ස්‌ත්‍රී ලිංග කංසා ශාකය. අපි ඒක හඳුනගන්නේ ස්‌ත්‍රී ලිංග ශාකයේ මල් හැදෙනවා. පුරුෂ ලිංග ශාකයේ මල් හැදෙන්නේ නැහැ. පුරුෂ ලිංග කංසා ශාකය සැර වැඩියි. මිනිස්‌ සිරුරට අහිතකරයි. ඒ නිසා පැරැන්නෝ පුරුෂ ලිංග කංසා පාවිච්චි කළේ නැහැ. එදා සිංහලයා ශක්‌තිය වඩන්න නියම මාත්‍රාවට ගංජා පාවිවිච් කළා. ගංජා කොළ ටිකක්‌ තම්බලා වතුර ටිකක්‌ දුන්නහම පුංචි දරුවකුගේ බඩේ අමාරුවක්‌ වුණත් සුව වෙනවා. ඉඳල හිටලා වෑංජනයට ගංජා කොළ ටිකක්‌ කලවම් කරලා කනව නම් ශරීරයට කොච්චර ශක්‌තියක්‌ එකතු වෙනවද... අද මේ රටේ දරුඵල නැතිව කීදෙනෙක්‌ ඉන්නවද කංසා කියන්නේ ඒ අයට කොච්චර හොඳ බෙහෙතක්‌ද... කංසාවල මේ ගුණ සමුදාය දැකපු ඉංග්‍රීසින් සිංහලයාගේ ශක්‌තිය අඩු කරන්න අන්ත්‍රාදායක පනත ගෙනත් ගංජා ශාකය මත්ද්‍රව්‍යයක්‌ කියලා තහනම් කළා. එදා සුද්දෝ ගෙනාපු අන්ත්‍රාදායක පනත නිසා තමයි දේශීය වෛද්‍යවරයකුට කංසා ගහක්‌ වගා කරගන්න අයිතිය නැති වෙලා ගියේ...

ආයුර්වේද සංස්‌ථාවේ තියෙන කංසා කලවම්. ඒ නිසා ප්‍රමාණයට අවශ්‍ය නියමිත රසායනික ගුණය නැහැ. රෝගයට අවශ්‍ය ප්‍රමාණයට බෙහෙත් ඖෂධ දාලා බෙහෙත් පිළියෙළ කළත් ඖෂධවල තිබෙන රසායනික ගුණය අඩු නිසා රෝග සුව වෙන්නේ නැහැ. ඒ නිසා තමයි අද සිංහල වෙදකම ගැන මිනිසුන් තුළ විශ්වාසයක්‌ නැති වෙලා තියෙන්නෙ. නැති නම් ඕනෑම ලෙඩකට සිංහල වෙදකමේ බෙහෙත් තියෙනවා" දේශීය ආයුර්වේද වෛද්‍ය පණ්‌ඩිත නන්දන මහතා කංසා ශාකයේ ගුණ අගුණ ගැන මෙන්ම ආයුර්වේද වෛද්‍ය විද්‍යාවට කංසා ශාකය අහිමිවීම ගැන ද අපට එසේ විස්‌තර කළේය.

දේශීය වෛද්‍ය විද්‍යාවට කංසා ශාකය දිව්‍ය ඖෂධයක්‌ විය හැකි බව සැබෑය. එහෙත් ගැටලුව වී ඇත්තේ සමාජයේ මත්ලෝලීන් කංසා ශාකය මත්ද්‍රව්‍යයක්‌ ලෙස භාවිත කිරීමය. සමාජය කාලකණ්‌ණි කරන කිසිම මත්ද්‍රව්‍යයක්‌ කිසි ලෙසකින් අනුමත කළ නොහැකිය. එහෙත් රට හැම තැනම නීතිගත තැබෑරුම් පෝලිමට ඇරෙන්නේය. ආණ්‌ඩුවේ ප්‍රබල ඇමැතිවරු අරක්‌කු පෙරීමට එතනෝල් කන්ටේනර් පිටින් ගෙන්වන්නාහ. මත්ද්‍රව්‍ය ජාවාරම්කාරයෝ විදේශයන්වලින් කුඩු කිලෝ සිය දහස්‌ ගණන් ගෙන්වන්නාහ. දේශපාලන ආනුභාවයෙන් ජාවාරම්කාරයෝ රටම මත් කිරීමට හැකි පමණින් ඉන්දියාවේ කේරළයෙන් ගංජා ගෙන්වන්නාහ. දේශපාලන බලපුළුවන්කාරකම් මත ජාතික වනෝද්‍යාන තුළ මහා පරිමාණයෙන් ගංජා වගා කරන්නේය. එවැනි පසුබිමක දේශීය වෙදදුරකුට තම ගෙවත්තේ ගංජා පැළයක්‌ වගා කරගැනීමට නොහැකි ලෙස වැට කඩුලු බැඳ තැබීම සාධාරණද?

රට තුළ ගංජා වගා කිරීමට අවසර දෙන්නැයි කියා අපි නොකියමු. මත්ද්‍රව්‍ය සහමුලින්ම මෙරටින් අතු ගා දැමිය යුතුය කියන තැන අපි සිටිමු. මහා පරිමාණයෙන් කරගෙන යන ගංජා හේන් විනාශ කළ යුතුය. කේරළයෙන් ගෙවන්වන විෂ ගිල්වපු ගංජා එන දොරවල් සීල් තැබිය යුතුය. මහින්ද චින්තන zමතට තිතZ වැඩසටහන තිතටම ක්‍රියාත්මක කරමින් තරාතිරමක්‌ නොමැතිව ගමේ කසිප්පුකාරයාට මෙන්ම ආණ්‌ඩුව තුළ වැජඹෙන අරක්‌කු පෙරන ඇමැතිවරුන්ටත් නීතිය එක ලෙසින්ම ක්‍රියාත්මක කළ යුතුය. මතින් තොර රටක්‌ නිර්මාණය කළ හැකි වන්නේ එසේ කළොත් පමණි. එවැනි පසුබිමක දේශීය ආයුර්වේද වෙදකමට කංසා ශාකය නැතිවම බැරි ඖෂධයක්‌ නම් වෙදගෙදරක කංසා පැළයක්‌ දෙකක්‌ වගා කරගැනීමට හැකි පරිදි නීති සංශෝධනය කරන්නේ නම් රටේ සෞඛ්‍යට ද යහපතක්‌ බව අපි මතක්‌ කර සිටිමු. මන්ද අපේ සමාජයෙන් ප්‍රතික්‌ෂේප වෙමින් තිබූ දේශීය ආයුර්වේද වෛද්‍ය විද්‍යාව වර්තමානය වන විට නැවත වරක්‌ මිනිසුන් තුළ මහත් පිළිගැනීමටක පත් වෙමින් තිබෙන්නේය. එහෙයින් දේශීය ආයුර්වේද වෛද්‍ය විද්‍යාව නැංවීමට දේශීය වෛද්‍යවරුන්ට අවැසි පහසුකම් සපුරාදීම රජයේ වගකීමකි.

එමෙන්ම කේරළයෙන් ගෙන්වන මදුරු බෙහෙත් මිශ්‍ර කංසා වෙදකට ගෙන බෙහෙත් ගුලියෙන් සුව කළ හැකි රෝගය ඉසකුඩිච්චි දැමිය යුතු තැනට ගෙන යා යුතු ද නැත. විය යුතු දේ අපි පෙන්නා දුන්නෙමු. ක්‍රියාත්මකවීම අදාළ බලධාරීන්ගේ යුතුකමකි. අපි බලා සිටිමු.

තරංග රත්නවීර
රුවනි පෙරේරා
Different Themes
Written by lankateam

ඔබ අදහස් සහ අපට එවන්න.

0 comments

Popular Posts

Popular Posts