.png)
මහින්දාගමනයට රට සූදානම්ද?
-
10:47 AM
-
0
comments
හිටපු ජනාධිපති මහින්ද රාජපක්ෂ ඉදිරි මහමැතිවරණයේදී අගමැති අපේක්ෂකයා ලෙස නැවත දේශපාලනයට ගෙන ඒම සඳහා දිනේෂ් ගුණවර්ධන, විමල් වීරවංශ, වාසුදේව නානායක්කාර සහ උදය ගම්මන්පිල යන එක්සත් ජනතා නිදහස් සන්ධානයේ සාමාජික පක්ෂ හතරක නායකයන් විසින් ව්‍යාපාරයක් ආරම්භකර ඇත. එම ව්‍යාපාරයෙහි තේමාව ලෙස හඳුන්වා තිබුණේ ‘මහින්දාගමනයට ඔබ සූදානම්ද?’ යනුවෙන් ය. මේ එම ව්‍යාපාරය පිළිබඳව කරන ලද අදහස් විමසීමකි. විපක්ෂ නායක නිමල් සිරිපාල ද සිල්වා මහතාගේ අදහස ද විමසීමට අප උත්සාහ ගත් නමුත් ඔහු සම්බන්ධ කරගැනීමට නොහැකි විය.
ආගම වෛශ්‍යා වෘත්තියේ යෙදවීම වැරදියි – දඹර අමිල හිමි කථිකාචාර්ය, ජයවර්ධනපුර විශ්වවිද්‍යාලය
මේ වගේ දේශපාලන ව්‍යාපෘතියකට මහින්දාගමනය වගේ නමක් යොදන එක වැරදියි. ආගම, ජාතිකත්වය, කුලමල භේද දේශපාලනයට පාවිච්චි නොකළ යුතුයි. මහින්ද මීට කලිනුත් ආගම් ජාතිවාදයෙන් තමයි බලය ගන්න හැදුවේ. බෞද්ධ කොඩිය සාටකයක් කරලා කරේ දාගන්න තරම් මහින්දගේ දේශපාලනය ආගම්වාදී වුණා. නමුත් දේශපාලනය කියන්නේ ලෞකික දෙයක්, ආගම කියන්නේ ලෝකෝත්තර දෙයක්. දේශපාලනයට ආගම ගේන එකෙන් ආගමට වගේම විශේෂයෙන් දේශපාලනයට හානි සිද්ධ වෙනවා. දේශපාලනය කියන්නේ සමාජ ආර්ථික දේශපාලන සිදුවීම් මත ඇතිවන සම්මුති සහ ගැටීම් එක්ක යන දෙයක්. මහින්දට නැවත දේශපාලනයට එන්න පුළුවන්. අයිතියක් තියෙනවා. එනවා නම් එන්න ඕනෑ ආර්ථික, සමාජ, දේශපාලන ප‍්‍රතිපත්ත එක්ක. ඒවාගේ තිබුණු වැරදි නිවැරදි කරගෙන සමාජයට ඒවා පැහැදිලි කරලා. ආගම දේශපාලනය වෙනුවෙන් වෛශ්‍යා වෘත්තියේ යෙදවීම මහින්ද නෙවෙයි, කවුරු කළත් වැරදියි. මහින්ද කියන්නේ හිස් මිනිහෙක්. මහින්දාගමනය කියාගෙන ආපහු බලයට එන එකෙන් පේන්නෙත් කිසිම දේශපාලන දර්ශනයක් නැතිකම, ඔහුගේ හිස්කම. දර්ශනයක් ප‍්‍රතිපත්තියක් නැතිකම නිසා කෙටි පාරවල් හොයාගෙන යනවා. මහින්දගේ බෞද්ධකම පිටින් පොරවගත්ත පිටපලූවක්. දැනුමින් අඩු ගමේ උපාසක මාතාවකගේ තියෙන හික්මීම වත් මහින්දට නැහැ. ඔහුට තියෙන්නේම මේ වගේ කෙටි පාරවල්. ළමයි වඩාගන්න එකෙනුයි කාන්තා ආකර්ෂණය දිනාගන්න උත්සාහ කරන එකෙනුයි ආගම පාවිච්චි කරන විදියෙනුයි ඒක පේනවා. මහින්ද කරන්නේ ජනතා කැමැත්ත පික් පොකැට් ගැහීමක්.
මහින්ද හැම වෙලාවෙම මේ කිසිවක් දන්නෙ නැහැ වගේ පෙන්නන්න තමයි උත්සාහ කරන්නේ. බොදුබල සේනාව සම්බන්ධයෙනුත් එහෙමනේ හිටියේ. දැන් කරන්න හදන්නෙත් ඒක. දැක්කේ නෑ වගේ ඉන්න එක. ඒවා දකින්නේ නැත්නම් රට බාරගන්නේ කොහොමද? ජනාධිපති වෙලා ඉද්දී අහිංසක මුස්ලිම් එල්ල කරලා කරපු විනාශය නොදැක්කේ කොහොමද? ඒවා නොතේරෙන්නේ කොහොමද? දැන් කියන්නෙත් මම වාහන ගත්තේ නැහැ. සල්ලි වෙන් කරගත්තේ නැහැ. මම දන්නේ නැහැ කියලනේ. ඔහු නැහැ කියන දේවල් වැඩක් නැහැ. මේ මහින්ද, විමල්, වාසු, දිනේෂ්, ගම්මන්පිළ වගේ අය අනාථවූවන්ගේ සංවිධානයක් හදාගෙන මහින්දගේ නම පාවිච්චි කරලා දේශපාලනයට එන්නයි හදන්නේ.
රනිල් පරද්දන්න පුළුවන් මහින්දට විතරයි – උදය ගම්මන්පිළ පිවිතුරු හෙළ උරුමය
අපි බලපෑම් කණ්ඩායමක් විතරයි. සන්ධානයේ කොටසක් විදියට අප ඉන්නවා. එළියට බැහැලා නැහැ. වෙනම පෙරමුණක් හදාගෙන නැහැ. අපි කියන්නේ ඉදිරි මැතිවරයේදී මහින්ද රාජපක්ෂව අගමැති අපේක්ෂකයා කරන්න කියලා. මහින්දාගමනය කියන නම ඒකට යොදාගැනීම වැරැුද්දක් විදියට අපි හිතන්නේ නැහැ. අපි අදහස් කරන්නේ මහින්දගේ පැමිණීම කියන එක. ඒක බුද්ධ වචනයක් නෙවෙයි. සිංහල භාෂාවේ වචනයක්. මේක විවේචනය කරන්නේ හෙළ උරුමය. නමුත් 2014දී හෙළ උරුමය මැතිවරණ වේදිකාවේ බෞද්ධ කොඩිය පාවිච්චි කළා. රාජා භවතු ධම්මිකෝ, කාලෝ අයංතේ වගේ නොයෙකුත් බුද්ධ භාෂිත යෙදුම් මැතිවරණ ව්‍යාපාරවලට ගෙනාවේ හෙළ උරුමය.
අපි මෛත‍්‍රීපාල සිරිසේන මහත්මයා සන්ධානයේ නායකයා විදියට පිළිගන්නවා. ඔහුව ඉවත් කරන්න කියලා නෙවෙයි යෝජනා කරන්නේ, මහින්දව අගමැති අපේක්ෂකයා කරන්න කියලා. රනිල් වික‍්‍රමසිංහ ඇතුළු එක්සත් ජාතික පක්ෂය පරද්දන්න පුළුවන් මහින්ද හිටියොත් විතරයි. මෛත‍්‍රීපාල සිරිසේන මහතාට ආණ්ඩුක‍්‍රම ප‍්‍රතිසංස්කරණ සඳහා ජනවරමක් ලැබිලා තියෙනවා. ඒවා ඉටු කරන්න අපේ සහයෝගය ලැබෙනවා. හොඳ දේවල් අනුමත කරන්නත් නරක දේවල් විවේචනය කරන්නත් දින සීය තුළ අපි කටයුතු කරනවා.
මහින්දාගමනවලට අපි ලෑස්ති නැහැ – වාසුදේව නානායක්කාර ප‍්‍රජාතන්ත‍්‍රවාදී වාමාංශික පෙරමුණ
අපි උත්සාහ කරන්නේ ඉදරයේදී එන මහ මැතිවරණයට සන්ධානය පණගන්වලා ඒ වටා නැවත ජන පෙළගැසීමක් සමඟ නැවත බලය ලබාගැනීම සඳහා බලපෑම් කණ්ඩායමක් විදියට කටයුතු කරන්න. අපි හිතන්නේ ජනාධිපතිවරණයේ පරාජය එතරම් බරපතළ නැහැ. නමුත් අපි නැවත සන්ධානය පණගන්වන්න ඕනෑ අලූත් වැඩපිළිවෙලක් එක්ක. දිගුකාලීන සහ කෙටිකාලීන ප‍්‍රතිපත්තිමය වැඩසටහනක් එක්ක. මැතිවරණයෙන් පස්සේ ශ‍්‍රීලනිපය නායකයා විදියට මෛත‍්‍රීපාල සිරිසේනව තෝරාගත්තා. එසේ කිරීම අනුමත කළත් නොකළත් දැන් ඒක පිළිගන්න වෙනවා. අපි කියන්නේ මෛත‍්‍රීගේ නායකත්වය යටතේ මහින්දව අගමැති අපේක්ෂකයා ලෙස ඉදිරිපත් කරන්න කියලා. මේ වෙද්දී සිද්ධ වෙන දූෂණ විමර්ශන කටයුතුත් ඉදිරියට කරගෙන යන්න සහ ආයතන ස්වාධීනත්වය වෙනුවෙන් කටයුතු කරන්න ඕනෑ.
ඒ වගේම මහින්ද රාජපක්ෂ ස්වයං විවේචනයකට එන්න ඕනෑ. මමත්වය පෙරටු කරගත්ත පුද්ගලාභිවන්දන දේශපාලනයක නිරත වීම ගැන. හැම දේකටම තමන්ගේ නම යෙදීම එහෙම නැත්නම් එහෙම කරන්න ඉඩ දීම වැරදියි. මහින්ද රාජපක්ෂව වන්දනීය තත්ත්වයට පත්කරන්න ආණ්ඩුව කටයුතු කළා. ඒවා ගැන පාපොච්චාරණයක් සිද්ධ වෙන්න ඕනෑ. අපිම විමර්ශනයක් කරලා වැරදි පිළිගන්නේ නැතිව ඉදිරියට යන්න බැහැ. මහින්දාගමනය කියන නම මේකට යොදාගැනීමට අපේ අනුදැනුමක් නැහැ. ඒකට අපි විරුද්ධයි. මහින්දාගමනවලට අපි ලෑස්ති නැහැ. අපි මේකට සම්බන්ධ වෙන්නේ එක්සත් ජනතා නිදහස් සන්ධානය ශක්තිමත් කරන්න අවශ්‍ය වැඩපිළිවෙලක් යෝජනා කරන්න විතරයි. අපි අලූත් පක්ෂවලට සම්බන්ධ වෙන්නේ නැහැ.
පුද්ගලයන් මත තීන්දු ගන්නේ නෑ – ඩිව් ගුණසේකර ශ‍්‍රී ලංකාවේ කොමියුනිස්ට් පක්ෂය
මේ සංවාදයට මාව සම්බන්ධ කරගන්න එකේ ප‍්‍රයෝජනයක් නැහැ. ඒකට පක්ෂව හෝ විපක්ෂව අපි මතයක් දරන්නේ නැහැ. මහින්දව දේශපාලනයට ගෙන ඒම හෝ එසේ නොකිරීම ශ‍්‍රීලනිපයට අයිති වැඩක්. අපි කටයුතු කරන්නේ දේශපාලන පක්ෂ එක්ක මිසක් පුද්ගලයන් එක්ක නෙවෙයි. මහින්දව ගේනවාද නැද්ද කියලා ශ‍්‍රීලනිපයෙන් හරි ඔහුගෙන්ම හරි දැනගන්න ඕනෑ දෙයක්නේ. මම මේ ව්‍යාපෘතියේ නැහැ. එහෙම සම්බන්ධ වෙන්න ඕනෑ නම් දැනටමත් අපි සම්බන්ධ වෙලා. ඉදිරියේදී ගන්නා දේශපාලනික පියවර ගැන අපි තවමත් තීරණය කරලා නැහැ. ඉදිරියේදී බලමු. දැනට කියන්න තියෙන්නේ අපි ප‍්‍රතිපත්ති මත මිසක් පුද්ගලයන් මත තීන්දු නොගන්නා බව විතරයි.
නැවත අගමැති කරන්න බැරි බව දන්නවා – ආචාර්ය අනුරුද්ධ ප‍්‍රදීප් ජාතික හෙළ උරුමය
පහුගිය ජනාධිපතිවරණයේදී සන්ධානයේ කොටසක් මෛත‍්‍රීපාල සිරිසේනට සහාය දුන්නා. නමුත් සන්ධානයේ හිටපු බහුතරය මහින්ද රාජපක්ෂට ඡුන්දය දුන්නා. එතනින් කොටසක් සදාචාර සීමා උල්ලංඝනය කරමින් මහින්දට උදව් කළා. තවත් පිරිසක් සාමාන්‍ය ශිෂ්ටත්වයෙන් යුතුව මහින්දට සහාය දුන්නා. තවත් කණ්ඩායමක් නිහඬව හිටියා. මැතිවරණය ඉවර වුණාට පස්සේ ශ‍්‍රීලනිපයේ බලය මෛත‍්‍රීට ලැබුණා. ඒක බලාපොරොත්තු විය යුතු තත්ත්වයක්. ඒත් මෛත‍්‍රීට සිරිසේන ගොයියා කියමින් උපරිමයෙන් අපහාස කළ විමල් වගේ අයටත් කිහිප වරක් පිල් මාරු කරලා අනවශ්‍ය දුරක් ගිය ගම්මන්පිල වගේ අයටත් මෙතනට එකතු වෙන්න බැහැ. මෛත‍්‍රී පිල තුළ ඔවුන්ට ඉඩක් නැහැ. පක්ෂය ගත්ත තීරණය කියලා ආවරණයක් ලබාගන්නත් බැහැ. ඔවුන් කල්පනා කරන්නේ ඊළඟ වාරයේ පාර්ලිමේන්තුවට යන්නේ කොහොමද කියලා. ඒකට ඔවුන් යොදාගත්ත උපාය මාර්ගය තමයි මේ මහින්දාගමනය. ඇත්තටම වාසු දිනේෂ් වගේ දේශපාලනයේ ප‍්‍රාමාණිකයන් මේ මහින්දාගමනයට එකතු වෙන්නේ ඇයිද කියලා අපට තේරෙන්නේ බැහැ. ඔවුන් කොහොමද මෙහෙම හැසිරෙන්නේ? තමන්ගේ දේශපාලන අනාගතය අවදානමක දාගන්නේ?
ශ‍්‍රීලනිපයත් මෛත‍්‍රී සහ චන්ද්‍රිකාට හිමිවෙලා තියෙන නිසා මේ අයට ඉඩක් ලැබෙන්නේ නැහැ. මහින්දගේ කණ්ඩායම වෙනම ඡුන්දය ඉල්ලූවොත් මහින්ද නාමයට ආකර්ෂණය වෙලා ඉන්න සුළු පිරිසක් ඡුන්දය දෙයි. ආසන සුළු ප‍්‍රමාණයක් ලබාගන්න පුළුවන් වෙයි. ඒත් බලපෑමක් කරන්න බැහැ. අනෙක් පැත්තෙන් ප‍්‍රායෝගිකව සිදු නොවුණත් පිරිසක් කියන විදියට මහින්ද, මෛත‍්‍රී, චන්ද්‍රිකා නායකත්වයේ තියාගෙන ඡුන්දයට එනවා කියලා උපකල්පනය කළොත් එතනදී මහින්ද කණ්ඩායම ලෙස මැතිවරණයට එන්න මේ අය උත්සාහ කරනවා. නමුත් මේ වැඩවලින් වෙන්නේ මහන්ද රාජපක්ෂට ගෞරවනීය ලෙස විශ‍්‍රාම ගන්න තියෙන ඉඩ තවතවත් ඇහිරෙන එක. මහින්ද කියන්නේ ලංකාවේ ජනාධිපතිවරණයක් පැරදිච්ච එකම ජනාධිපතිවරයා. ඒ ඔහු කරපු දේවල ප‍්‍රතිඵලය. මේ වෙලාවේ ඔහුට අගමැති අපේක්ෂකයෙක් වෙන්න කවුරුවත් දේශපාලනිකව ඉඩ දෙයි කියලා හිතන්න බැහැ. ඔහුට සන්ධානයේ අගමැති අපේක්ෂකයා වෙන්න බැහැ. ඔය කියන මහින්දාගමනය සිද්ධ වෙලා ඔහු ඡුන්දය ඉල්ලූවත් ඔහුට පත්වෙන්න බැහැ.
ශ‍්‍රීලනිපය නායකයෝ කිහිප දෙනෙක් එක්ක ඡුන්දයට ගියොත් වෙන්නේ පක්ෂය තව තවත් අර්බුදයට යන එක විතරයි. මෛත‍්‍රීට අමතරව මහින්ද නෙවෙයි චන්ද්‍රිකා ආවත් ඒ අවුල එනවා. පක්ෂය ඇතුළේ එක එක්කෙනාගේ කල්ලි හැදෙනවා. එක නායකත්වයක් යටතේ පක්ෂය රීලෝන්ච් කිරීමක් හෙවත් නැවත දියත් කිරීමක් කරන්න ඕනෑ. සංකේතාත්මකව විශාල වෙනසක්, නැවුම් ගතියක් එක්ක මැතිවරණයට නොආවොත් සන්ධානය පරාදවෙනවා. මහින්දාගමනය කරන්න හදන අය මහින්දව නැවත කවදාවත් අගමැති කරන්න බැරි බව දන්නවා. මේක දේශපාලනයෙන් ප‍්‍රතික්ෂේප වෙච්ච කිහිප දෙනෙකු පාර්ලිමේන්තුවේ ආසන ටිකක් දිනාගන්න ගන්න උත්සාහයක් විතරයි.
රජ පිස්සුව හොඳවෙලා නෑ වාගේ – නියෝජ්‍ය අමාත්‍ය සුජීව සේනසිංහ එක්සත් ජාතික පක්ෂය
මොනවා කියන්නද? මහින්දාගමනය කියන එකෙන් වෙන්නේ ශ‍්‍රීලනිපය විනාශ වීම. බංකොලොත් දේශපාලනඥයෝ ටිකක් පරාජය දරාගන්න බැරුව කියවන දෙයක් තමයි මහින්දාගමනය කියන්නේ. ශ‍්‍රීලනිපයෙන් නොමිනේෂන් ලැබෙන්නේ නැති බංකොළොත් දේශපාලනඥයෝ ටිකක් තමයි මේ ශ‍්‍රීලනිපය විනාශ කරන්න යන්නේ.
මහින්දාගමනය කියන්නේ ලංකාවේ ඉතිහාසය එක්ක, ආගම එක්ක යෙදිච්ච නමක්. ඒ නම යොදාගන්න එකෙන් පේන්නේ තාමත් අර රජ පිස්සුව හොඳ වෙලා නැහැ කියලනේ. දැන් නම් මේක විහිළුවක් බවට පත්වෙනවා. මහින්දාගමනය නෙවෙයි මොකක් කියලා ආවත් ඒ අය කරපුවා ගැන ප‍්‍රශ්න ගොඩක් තියෙනවා. මහින්දට කොහොමත් ශ‍්‍රිලනිපයේ අගමැති අපේක්ෂකයා වෙන්න බෑ. කොහොමද එයාට දෙන්නේ? එහෙම පුළුවන් නම් මටත් වෙන්න පුළුවන්නේ. මේ වැඩවල ප‍්‍රතිඵලය අන්තිම අසාර්ථක එකක්. ඒකෙන් වෙන්නේ මහින්ද ලැජ්ජාවට පත් වෙන එක.
මහින්ද රාජපක්ෂ මහත්මයා පෙන්නන්න උත්සාහ කරන්නේ එතුමාගේ අනුදැනීමක් නැතිව විමල්ලා කරන වැඩක් විදියට. හැමදාම එයා කළේ රඟපෑම. මොනාවත් දන්නේ නැති කෙනෙක් වගේ. දැන් ඒවාට ඉඩ නැහැ. මහින්දගේ කාලේ ඉවරයි. මහින්ද රාජපක්ෂට ඡුන්ද ලක්ෂ 58ක් නැහැ. ඒක බොරුවක්. ඔය ඡුන්ද ගාණ ගත්තේ ඉවර වෙච්ච ඡුන්දයකදී. ඒක ලැබුණෙත් අපි ආවොත් කොටියා එනවා කියලා මීඩියා අල්ලගෙන ගෙනිච්ච ප‍්‍රචාරය නිසා. මිනිස්සුන්ට දැන් ඇත්ත පේනවා. මහින්ද රාජපක්ෂ දැන් කරන්න ඕනෑ විශ‍්‍රාම ගන්න එක. දැන් ඔහුට වයස හැත්තෑවක් විතර වෙනවා. රිටයර් වෙන්න කාලේ හරි. හිටපු කාලේදී කරපු දේවල් ටික හොඳටම ඇති. මහින්ද තමයි ජනාධිපතිවරණයක් පැරදිච්ච පළවෙනි ජනාධිපතිවරයා. ඒකෙන් ඔහුට විතරක් නෙවෙයි දේශපාලනඥයන්ට හොඳ පාඩමක් ඉගෙනගන්න තියෙනවා, සීමාව ඉක්මවලා බලයේ ඉන්න උත්සාහ කරන්න එපා කියලා. ඔහු ආපහු එන්න යනවා නම් ඒ පාඩම වඩාත් හොඳට ඉගෙනගන්න පුළුවන් වෙයි.
ravaya
.png)
.png)
.png)
.png)
