Open top menu
Monday, February 15, 2016

දන්නෝ බුදුන්ගේ ගීතය ඔපෙරා හඬින් ගැයීම ගැන තාමත් සාකච්ඡා වෙන හින්ද තවත් පොඩි දෙයක් කියන්ඩ ඕනෙ කියල හිතුන. සමහරු ඒ ගායනය කරපු කිශානි ජයසිංහට විවිධ නරක වචන කියමින් බැනල තිබ්බ අතරෙ ඒ ගායනය විවේචනය කරල තිබ්බ අයව ගල් වැද්දන්ට සමාන කරමින් රටේ සංස්කෘතියට ගරහන්ඩ අවස්ථාවක් උදාකරගත්ත අයත් හිටිය.

මේ ගායනය ගැන හිතද්දි මට මතක් වුනේ කාලෙකට ඉස්සෙල්ල ජාතික රූපවාහිනියෙ විකාශය වෙච්ච කන්දෙ ගෙදර-2 ටෙලි නාට්ටියෙ කුඩා සිද්ධියක්. මේ නාට්ටියෙ කතානායකය "බාල මහත්තය" (රෝහණ බැද්දගේ). බාල මහත්තය ගමේ හැදිච්ච, ගමේ නම්බුකාර චරිතයක් වුණු සර්ව සම්පූර්ණ ගැමියෙක්. බාල මහත්තයගෙ ලොකු පුතත් ගමේ හැදුනු වැඩුණු කෙනෙක් වුනාට නගරෙ උසස් රැකියාවක් කරන කෙනෙක්. බැඳල ඉන්නෙ නගරෙ හැදිච්ච, අර අපි කියන පොෂ් පැලැන්තිතියෙ කෙනෙක්. ඉතින් මේ දෙන්නගෙ ළමයිනුත් (විශේෂයෙන් දුව) හැඳි ගෑරප්පුවලින් විතරක් කන, නගරෙ විදිහට හැදිච්ච අය. වරක් මේ ලොකු පුතාගෙ පවුල යනව ගමේ, ඒ කියන්නෙ බාල මහත්තයගෙ ගෙදර. අර ලොකු පුතාගෙ දුවට ගමේ දේවල් පුරුදු නැති හින්ද පොඩි පොඩි අකරතැබ්බවලට මුහුණ දෙන්ඩ වෙන්ඩ දෙන අතරෙ හොඳම වැඩේ වෙන්නෙ කෑම මේසෙදි. කෑම මේසෙ තියෙන්නෙ ඉතිං බාල මහත්තයල කන ගමේ කෑම තමා. ඒ වුනාට අර දුවට හැඳි ගෑරප්පුවලින්ම කන්ඩත් ඕනෙ. බොහොම අමාරුවෙන් කන අතරෙ බත් පිඟානෙ තිබ්බ තම්බපු කොස් ඇටයක් කන්ඩ කියල ගෑරප්පුවෙන් ඇනපි. කොස් ඇටේ පිඟානෙන් එළියට විසික් වෙලා යනව නිකං අර කොටින්ට ගහපු මල්ටි බැරල් රොකට් එකක් වගේ. බාල මහත්තය ඇතුළු පිරිසට හිනා. ඕක තමා සිද්ධිය.

දැන් අර වෙච්ච වැඩේට හිනාගිය බාල මහත්තයට ගල් වැද්ද කියල බැනල හරියන්නෙ නෑ. එක්කො කොස් ඇටේ ඇඟිලිවලින්ම ඇරං කන්ඩ ඕනෙ. ගෑරප්පුවෙන්ම කන්ඩ ඕන්නං කොස් ඇටේ හොඳටම තම්බල ගන්ඩ ඕනෙ ගෑරප්පුවෙන් ඇනල ගන්ඩ පුළුවන් ගාන වෙනකං. නිදහස් දවසෙ දන්නෝ බුදුන්ගේ ගීතය ඔපෙරා හඬින් ගැයීම ගැනත් මේ වගේ දෙයක් තමා කියන්ඩ තියෙන්නෙ. එතන වුනේ සිංහල ගීතයක් අමුවෙන්ම ඔපෙරා ශෛලියකින් ගායනා කිරීමක් විතරයි. එතන කිසිම නිර්මාණාත්මක දෙයක් වෙලා තිබ්බෙ නෑ. ඉංග්‍රීසි ඇක්සන්ට් එකකින් හූ කියනව වගේ ඒක අපිට ඇහෙන්නෙ ඒ හින්ද. අර ඉතාලි ඔපෙරාවල කරනව වගේ "ර්"යන්න වැඩියෙන් උච්ඡාරණය කිරීමෙන්ම පේනව එතන වුණේ අමුවෙන්ම අනුකරණයක් කියල. නමුත් කේමදාස මාස්ටර්ගෙ සිංහල ඔපෙරාවල මෙහෙම ප්‍රශ්නයක් නෑ. ඒවා ඔපෙරා වුනාට ඒවායේ සිංහල හෝ උත්තර භාරතීය සංගීතයේ මුද්‍රාව තිබ්බ. ඔපෙරා අනුකරණය කරන්ඩ ගියේ නෑ. ඔපෙරා ශෛලිය අඩුපාඩු සහිතව හරි අපේම දෙයක් කරගත්ත එක කරේ. කේමදාසයන්ගේ ඔපෙරාවල සිංහල වචන උච්ඡාරණය වෙන විදිහ අහල බලන්ඩ. සාමාන්‍ය සිංහල උරුවක් තියෙන්නෙ. නමුත් ඔපෙරාවල වගේ යම් යම් වචන/ශබ්ද අලංකරණ යොදාගන්නව, ඇක්සන්ට් නෑ. කේමදාසයන්ගෙ විශිෂ්ඨම ඔපෙරාවක් වෙච්චි "පිරිනිවන් මංගල්‍යය" අහල බලන්ඩ. ගමේ සාමාන්‍ය උපාසක අම්ම කෙනෙක්ට වුනත් වැඩි අපහසුවකින් තොරව අහං ඉන්ඩ පුළුවන්. කේමදාස මාස්ටර් සංගීතවත් කරපු නාට්‍ය සහ චිත්‍රපටිවලත් මෙම ඔපෙරා ශෛලිය යොදාගත්තත් සාමාන්‍ය කෙනෙක්ට ඒක වැඩිපුර ඉස්මතු වෙලා පේන්නෙ නෑ. මොකද ඒවා අමු ඔපෙරා නොව, අපේම කරගත්ත ඔපෙරා වෙච්චි හින්ද.

ඉතිං ඕක තමා කතාව. කේමදාස මාස්ටර්නං කොස් ඇටේට ගෑරප්පුවෙන් අනින්ඩ කලින් හොඳටම තම්බගත්ත. අඩුම ගානෙ එහෙම කරන්ඩ උත්සාහ කරා. කිශානි ජයසිංහ කිසි හෙවිල්ලක් බැලිල්ලක් නැතුව ඇන්න කොස් ඇටේට ගෑරප්පුවෙන්. ඉතින් කොස් ඇටේ විසිවෙලා ගියා. කොස් ඇටේ විසිවුනා නේද කියල අපි ඇහුවම, කිශානි නෝන හැඳි ගෑරප්පුවලින් ඉංග්‍රීසි කෑම කාල ගත්ත සම්මානවලින් අපිට දමල ගහල වැඩක් නෑ. ඕං ඔහොමයි මට මේ වැඩේ දැනුනෙ.

ප.ලි: බාල මහත්තයගෙ මිනිපිරීගේ කෑම පිඟානෙ මුරුංග ව්‍යංජනයකුත් තිබ්බද කියල හරියටම මතක නෑ.

-සධීර බණ්ඩාර

යුතුකම සංවාද කවය
www.yuthukama.com

Different Themes
Written by lankateam

ඔබ අදහස් සහ අපට එවන්න.

4 comments :

  1. Rock, Pop, Rap walin international awards dinapu kenekta wunath me wage geethayak Rap/Rock/Pop widiyata wenas karata kamak nadda? danne nathi nisa ahenne. Mokada Kishani Opera walin awards gaththa nisa me sinduwa mehema kiyanna puluwannam, anith ewatath awulak wenna be ne.

    ReplyDelete
  2. මුරුංගා, වම්බටු, පපඩම්, ආප්ප, හැන්දෙන් ගෑරෙප්පුවෙන් කන්න පුළුවන්. මට ඒක ඉගැන්නුවේ මම හමුදාවට බැඳුන කාලේ හිටිය කර්නල් වරයෙක්. අලබැදුම්, වට්ටක්කා, බත් එක්ක අනාගෙන කන්නත් පුළුවන් ඔය ආයුද සැට් එකෙන්. එය හරියට පාවිච්චි කරන ක්‍රමය ඉගෙන ගන්නේ නැතිකමයි අපේ තියන වැරැද්ද.නමුත් අපේ කෑම අතින් අනලා කනවා තරම් රස නැහැ ආයුද සැට් එකෙන් කනකොට. ඒ වගේමයි ඉක්මනින් කාලා යන්න අවශ්‍යතාවක් තියනවනම් ආයුද පාවිච්චි කිරීම තමයි පහසු ක්‍රමය.

    මේ ගීතය අහපු ගමන් කඩාගෙන පනින්නේ නැතුව මොකක්ද ඒ සංගීත සම්ප්‍රදාය කියලා ටිකක් හොයලා බලලා, මෙන්න මෙහෙම කිව්වනම් වැරද්දක් නැහැ. ඒ සම්ප්‍රදාය ලෝකප්‍රසිද්ධ බව පිලිගන්නවා. නමුත් මේ ගීතය අපේ රටේ මිනිසුන්ගේ හිතේ රැඳිලා තියන විදිහට හැකිතරම් ආසන්න විදිහට කිව්වනම් බොහොම හොඳයි.

    ReplyDelete
  3. බාල මහත්තයා එතනදි හිනා වුනේ අපහාසාත්මකව කියලා හිතන්න බෑ. ඒ වගේම "මේ බැලලිට ගඩොල් බාගෙන් ගහන්න " කතා කරෙත් නෑ. කේමදාස මාස්ටර්ගේ ඔපෙරා වලට පවා යම් යම් විරෝධතා ආවා. පිරිනිවන් මංගල්‍යයට වඩා අග්නි ඔපෙරාව වෙනස්. ඒක අර විදිහටම රස විඳින්න බැරි වෙන්න පුළුවන්. මෙතන වෙලා තියෙන ගැටළුව තමයි තම තමන්ගේ රස වින්දනය ‍තෝරා ගන්න බැරි අවුල. නිදහස් උත්සවයේ බස් අජිත්ගේ ගීතයක් ගැයුවා නම් ඒකට හොඳ කියන අය වගේම බනින අයත් ඉඳීවි. යමෙකුට යමක් රස විඳින්න බැරි කම ඒ නිර්මාණයට ගඩොල් බාග වලින් ගහන්න හේතුවක් නෙවෙයි.

    ReplyDelete
  4. ඇත්තටම රස විඳින්න බැරි දෙයක් පොෂ් කියලා පෙන්නන්ට දඟලන එකත් අපේ එක විදිහක ගතානුගතිකත්වයක්. මොකද මම කිව්වෙ සුද්ද රට අල්ලගත්ත කාලෙ ඉඳලා කට්ටියකට තියෙන ලෙඩක්නේ. ඒ විදිහට බැලුවොත් අර සදාචාරවාදීන් ඊට වඩා නූතනයි. මොකද උන් බිහිවුනේ ඊට කාලෙකට පස්සේනේ කොහොම උනත් හොඳ ලිපියක්....

    ReplyDelete

Popular Posts

Popular Posts