Open top menu
Tuesday, July 12, 2016

ඇල්ෆර්ඩ් ‍දොරේඅප්පා  ශ්‍රී ල.නි.ප.ය උතුරේ හදපු නායකයාය. 1976දී එවකට අගමැතිනි බණ්ඩාරනායක මැතිනියට උතුරේ සංචාරය කරන ලෙස ‍දොරේඅප්පා  ආරාධනා කළ විට මැතිනිය එය සතුටින් පිළිගත්තාය. ඇය උතුරට එනවිට ‍ දොරේඅප්පා තොරණ ගසා ඇයව පිළිගත්තේය. යාපනයේ අලවලින්, ලූනුවලින්, මිරිස්වලින් හදපු මාල ඇයගේ ගෙලට වැටුණි. ඇය ප්‍රධාන රැස්වීම් වේදිකාවට යන්න වාහනයෙන් බහිද්දී එම පාර දෙපස සිටි කාන්තාවන් සිය දිගු කොණ්ඩය පාරට අතුරා ඇයට ඔවුන්ගේ කොණ්ඩය මතින් පිය නඟන ලෙස ඉල්ලා සිටියේය. මැතිනිය එයට කැමැති නොවීය. එහෙත් ‍ දොරේඅප්පා ඇයගේ කනට කර කීවේ ඔවුන්ගේ ගෞරවනීය ආචාරය පිළිගන්නා ලෙසය. උතුරේ කාන්තාවන් මැතිනියට එතරම් ආදරය කළේ ශ්‍රී ල.නි.ප.යේ දේශීය ආර්ථික ප්‍රතිපත්ති නිසාය. එසේම සාමාන්‍යයෙන් උතුරේ දමිළ ජනතාව වාමවාදීය. ඒ නිසාම ඔවුහු මැතිනියගේ වාමවාදී ශ්‍රී ල.නි.පයට කැමැත්තක් දැක්වූහ. එකල ප්‍රභාකරන් ඊළාම් යුද්ධයට කොල්ලො කුරුට්ටන් එකතු කරමින් සිටියේය. ඔහු මැතිනියගේ ආණ්ඩුවට එරෙහිව උතුරේ අනෙකුත් දමිළ පක්‍ෂ එකතු කරමින් උතුරේ ජනයා උසි ගැන්වූයේය. ඒත් ‍දොරේඅප්පා  බණ්ඩාරනායක මැතිනියට දුන්න ඉහළ පිළිගැනීම ප්‍රභාකරන්ගේ වෛරයට හේතු විය. ඔහු උතුරේ ශ්‍රී ල.නි.ප.

බල කඳවුරක් හදන බව ප්‍රභාට ඉවෙන් දැනිණි. ප්‍රභාකරන් ‍දොරේඅප්පා  ඝාතනය කරන්න තීරණය කළේ ශ්‍රී ල.නි.පයට උතුරේ යළි හිස ඔසවන්න නොදෙන්නය. උතුරේ ශ්‍රී ල.නි.ප.යේ ගමනක අවසානය ‍දොරේඅප්පා  විය. එහෙත් 1982 ජනාධිපතිවරණයේදීත් උතුරේ ජනයා ශ්‍රී ල.නි.ප. අපේක්‍ෂක හෙක්ටර් කොබ්බෑකඩුවට ඡන්දය පාවිච්චි කළහ. ඒ යළි මැතිනියගේ ආර්ථික ප්‍රතිපත්තිය ක්‍රියාත්මක කරවාගෙන දේශීය ගොවියා රජකර වන්නටය. 1983 යුද්ධයට පසු මැතිනිය සහ ශ්‍රී ල.නි.ප.ය දැඩි යුදවාදී ප්‍රතිපත්තියක් අනුගමනය කළ හෙයින් උතුරේ ජනයා සහ ශ්‍රී ල.නි.ප.ය අෑත් විය. මේ තත්ත්වය වෙනස් කළේ චන්ද්‍රිකාය. ඇය 1994 සාමය ගෙන එන්න පොරොන්දු වූ නිසා උතුරේ ජනයා ඇයට පක්‍ෂව ඡන්දය පාවිච්චි කළහ. එකල උතුරේ චන්ද්‍රිකා රැල්ලක් තිබිණි. ඒත් ඇයද යුද්ධයට තල්ලු කරන්න ප්‍රභාකරන් සමත් වීම නිසා උතුරේ ජනයාට ඇය එපා විය. චන්ද්‍රිකාට පසු ශ්‍රී ල.නි.ප.යෙන් ජනාධිපති ධුරයට පත් මහින්ද සහ ඔහුගේ දේශප්‍රේමී හවුල නිසා උතුරේ ජනතාවට ශ්‍රී ල.නි.ප. තිත්ත විය. 2015 ජනාධිපතිවරණයේදී උතුරේ ජනයා මහින්දව පරාජය කොට මෛත්‍රිව දිනෙව්වේ එහෙයිනි.


මෛත්‍රි ආවේ එ.ජා.ප. ප්‍රමුඛ යහපාලන සන්ධානයකිනි. එම සන්ධානය මෛත්‍රිගේ නායකත්වයෙන් උතුරට සාමය ගෙන එන්න පොරොන්දු විය. චන්ද්‍රිකාගේ සහ මහින්දගේ යුද්ධයෙන් හෙම්බත් වී සිටි දමිළ ජනයා යුදවාදී නොවූ එ.ජා.ප.ය ප්‍රමුඛ යහපාලන සන්ධානයට කැමැති විය. එම සන්ධානයෙන් ජනාධිපති වී ශ්‍රී ල.නි.ප. නායකත්වයට පත් මෛත්‍රිගේ පළමු ඉලක්කය වූයේ 1977ට පෙර උතුරේ ජනයා සහ ශ්‍රී ල.නි.ප.ය අතර තිබූ සුහදත්වය යළි ඇති කිරීමය. ඔහු ‍දොරේඅප්පා  ක්‍රීඩාංගණය යළි විවෘත කරමින් උතුරට දෑත් දිගු කළේ ශ්‍රී ල.නි.ප. නායකයා ලෙසය. ඒ ‍දොරේඅප්පා ගෙන් අවසන් වූ ගමන යළි පටන් ගන්නටය. ඒ වගේම ඔහු මහ බැංකු අධිපති ධුරයට රනිල්ගේද එකඟත්වයෙන් කුමාරස්වාමි පත් කළේ ශ්‍රී ල.නි.ප.ය වෙනස් වී ඇති බව දමිළ ජනයාට පෙන්වන්නටය. මේ වෙනස චන්ද්‍රිකාද 1994දී පෙන්වීය. ඒ ලක්‍ෂ්මන් කදිරගාමර් විදේශ ඇමැති ධුරයට පත් කිරීමෙනි. එකල දමිළ ජාතිකයෙක් විදේශ ඇමැති ධුරයට පත් කිරීම විශාල විප්ලවයක් විය. චන්ද්‍රිකා ශ්‍රී ල.නි.ප.ය සහ උතුරේ දමිළ ජනතාව අතර 1976 කැඩුණු පාලම හදන්න ගියේ කදිරගාමර් හරහාය.


කුමාරස්වාමිද කදිරගාමර් වැනි උගතෙකි. කුමාරස්වාමි පරපුර රටට කර ඇති සේවය අති විශාලය. ඔහුගේ සීයා ඉන්දියාවේ ශ්‍රී ලංකා මහ කොමසාරිස් ධුරය දැරුවේය. ඔහු එකල ලංකාව වෙනුවෙන් ඉන්දියාවේ ලොකු දූත මෙහෙවරක් කළේය. ඔහුගේ පියා එකල ප්‍රකටව හිටියේ ලොව වටා රවුම් ගහන රාජු කියාය. ප්‍රධාන පෙළේ අමාත්‍යාංශවල ලේකම් ධුරය දරපු ඔහු ලංකාවට ආධාර ගන්න, ලංකාවට ලොව දිනා දෙන්න ලොව වටා ගියේය. ඒ කාලයේ බලවත් ඇමැතිවරු නොව මෙවැනි ප්‍රවීණ ලේකම්වරුය.


සුද්දාගෙන් පසු ලංකාව දියුණු වූයේ සුද්දා හදපු මේ නිලධාරි තන්ත්‍රය නිසාය. ඒත් බණ්ඩාරනායකවරුන්ගේ ශ්‍රී ල.නි.ප.ය රට පාලනය කළ මෙම නිලධාරි තන්ත්‍රයේ දමිළ ආධිපත්‍යට බියවී දමිළ නිලධාරීන්ට රාජ්‍ය භාෂාව වූ සිංහලයෙන් වැඩ කිරීම අනිවාර්ය කරනු ලැබීය. සිංහල නොදත් කීර්තිමත් නිලධාරීහු රාජ්‍ය සේවයෙන් ඉවත් වූහ. ලී ක්වාන් යූ සිංගප්පූරුව හදන්න මොළ හොයමින් සිටියේ මේ කාලයේය. ලංකාවේ රාජ්‍ය සේවයෙන් ඉවත් වූ දමිළ මොළ ගෙන්වා ගෙන ලී ක්වාන් යූ වැඩ ගත්තේය. ඔහු සිංගප්පූරුව හැදුවේ එලෙසය.
"ලංකාවේ සුළුතරය වූ දමිළ ජනතාව බහුතරය වූ සිංහලයන්ට වඩා උගත්. දක්‍ෂයි. කම්මැළි නැහැ. සිංහල ජනතාව ඔවුන්ගේ උගත්කමට, දක්‍ෂකමට ඊර්ෂ්‍යා කළා. දමිළයන් සිටිනා උසස් තනතුරු ඔවුන්ට අවශ්‍ය වුණා. ලංකාවට වැරැදුණේ එතැනයි..."
මේ ලී ක්වාන් යූ සිය පොතෙහි සඳහන් කර ඇති කතාවකි. මෛත්‍රි සහ රනිල් කුමාරස්වාමිව මහ බැංකු අධිපති ධුරයට පත්කිරීමෙන් හදන්නේ ඒ වැරැදුණු තැන හදාගන්නට විය යුතුය. ලී ක්වාන් යූ ලංකාවට වැරැදුණු තැන ලිව්වේ තුන්වැනි ලෝකයෙන් පළමු ලෝකයට සිංගප්පූරුව ගෙන ගිය ගමන නම් වූ පොතෙනි. මෛත්‍රි සහ රනිල් හදන්නේත් කුමාරස්වාමිලා හරහා ලංකාව තෙවැනි ලෝකයෙන් පළමු ලෝකයට ගෙන යන්න විය යුතුය.

උපුල් ජෝෂප් ප්‍රනාන්දු
Different Themes
Written by lankateam

ඔබ අදහස් සහ අපට එවන්න.

0 comments

Popular Posts

Popular Posts