Header Ads

විජේතුංගයි චන්ද්‍රිකයි රනිල්ට කළ දේම මෛත්‍රිත් කරයිද - උපුල් ජෝශප් ප්‍රනාන්දු

රාජිත සේනාරත්න මෛත්‍රි - රනිල් දීගයට කපුකම් කළ අයගෙන් නොම්මර එකේ කපුවෙකි. ඔහු මේ සතියේ බේරුවලදී කියා තිබුණේ තමා මෛත්‍රි සහ රනිල් අතර මේ දිනවල පාලමක් හදන බවත්, ඒ පාලම කොන්ක්‍රීට් දමා ශක්තිමත් කරන බවත්ය. මේ අතර අර්ජුන රණතුංග කියා තිබුණේ මෛත්‍රි සහ රනිල් කොටවන කුමන්ත්‍රණයක් දියත් වී ඇති බවය.

'මේ කතාවල තේරුම කුමක්ද....?'
'මෛත්‍රි - රනිල් දීගය හබක්ද...?'
රනිල් ජනාධිපතිවරු තුන්දෙනෙක් යටතේ අගමැතිකම් කළ නායකයෙකි. පළමු වරට ඔහු අගමැති වූයේ ඩී.බී. විජේතුංග ජනාධිපති වූ විටදීය. ප්‍රේමදාස ඝාතනය වූ වේලාවේ ඩී.බී. ව ජනාධිපති ධුරයට පත් කරන්න රනිල් ලොකු වැඩ කොටසක් කළේය. එසේම වැඩ බලන ජනාධිපති ලෙස දිවුරුම් දුන් ඩී.බී. පාර්ලිමේන්තු ඡන්දයෙන් ජනාධිපති ධුරයට පත් කරන්නත් රනිල් බැහැල ගේම ගැහුවේය. ඒත් වැඩි දවසක් ගියේ නැත. එජාපය තුළ රනිල්ගේ දේශපාලන හතුරෙක් වූ ගාමිණී දිසානායක ජනාධිපති මන්දිරයට රිංගන්න පටන් ගත්තේය. ගාමිණී ඇතුළු එජාපය කඩාගෙන ගිය ප්‍ර.එ.ජා.පෙ. කණ්ඩායම යළි එජාපයට එකතු කර ගන්න ඩී.බී. ට වුවමනා විය. ගාමිණීව යළි එජාපයට එකතු කර ගන්නවාට රනිල් දැඩි සේ විරුද්ධ විය. ඔහු එවකට පක්‍ෂ ලේකම් සිරිසේන කුරේ සමඟ එක්වී ගාමිණී එජාපයට එක් වීමේ උත්සාහය කඩාකප්පල් කළේය. ගාමිණී එජාප සාමාජික කාඩ්පතක් ගෙන එජාපයට එක් විය යුතු යැයි කොන්දේසි දැම්මේය. එසේම ගාමිණී එජාපයට ඒමට ජාතික ලැයිස්තු මන්ත්‍රි ධුරයක් ඉල්ලුවේය. රනිල් සහ කුරේ ගාමිණීට ජාතික ලැයිස්තු මන්ත්‍රි ධුරයක් දෙන්න ඉල්ලා අස්වීමට කැමැත්ත පළ කළ ජාතික ලැයිස්තු මන්ත්‍රිවරුන් හමු වී ඔවුන්ට ඉල්ලා අස් නොවෙන ලෙසට බලපෑම් කළහ. ඒත් ගාමිණී කෙසේ හෝ එජාපය තුළට ඇවිත් පාර්ලිමේන්තුවට ඇතුළු වී ඇමැතිකමක්ද ගෙන විජේතුංගගේ දේශපාලන ගමන තීරණය කරන්නා බවට පත් විය. 1994 මහ මැතිවරණයේදී ගාමිණී අගමැති වෙන්න හීන මැවූ අතර මහ මැතිවරණ පරාජයට පසු විපක්‍ෂ නායක ධුරයට පත් වූයේ විජේතුංගගේ ආශීර්වාදය ඇතිව රනිල්ව විපක්‍ෂ නායක ඡන්දයෙන් පරාජය කරමින්ය. මේ විජේතුංග - ගාමිණී දීගය නිසා විජේතුංග - රනිල් දීගය හබක් වී රනිල්ට අගමැති ධුරයත් නැති විය.

යළි 2001 රනිල් අගමැති වන්නේ චන්ද්‍රිකා ජනාධිපති ධුරය දරද්දීය. ඒ වේලාවේ රනිල් චන්ද්‍රිකාගේ ආණ්ඩුව පරාජය කර අගමැති ධුරයට පත් වුවත් මුල් කාලයේ චන්ද්‍රිකා රනිල්ට ආණ්ඩුව කරගෙන යන්න ඉඩ දුන්නාය. රනිල්ගේ ආණ්ඩුව විනාශ කරන්න චන්ද්‍රිකාගේ ඔළුවට විස බීජ දමන්නේ මංගලය. මංගල ඒ සඳහා ජනාධිපති මන්දිරයට රිංගවන්නේ ජවිපෙය. ජවිපෙ රට පුරා රනිල්ගේ ආණ්ඩුවට එරෙහිව විරෝධතා දියත් කරන්න පොරොන්දු වන අතර විරෝධතා උණුසුම් වෙද්දී චන්ද්‍රිකා රනිල්ගේ ආණ්ඩුව විසුරුවන්න ඕනෑ කියන තැනට චන්ද්‍රිකාව එකඟ කර ගනු ලැබීය. රනිල්ගේ ආණ්ඩුව විනාශ කළ යුතුය යන විසබීජය චන්ද්‍රිකාගේ ඔළුවට දමන්න මංගල, අනුර සහ චන්ද්‍රිකාගේ විශ්වාසවන්ත කදිරගාමර්ද එක් කර ගනු ලැබීය. මේ වෙන කොටත් චන්ද්‍රිකා තමා පාර්ලිමේන්තුව විසුරුවන්නේ නැති බවට රනිල්ට පමණක් නොව ඉන්දියාව, ඇමෙරිකාව ඇතුළු ජාත්‍යන්තර ප්‍රජාවටත් සහතිකයක් දී තිබිණි. කතානායක ජෝෂප් මයිකල් පෙරේරාට ලිඛිත සහතිකයක් දී තිබිණි. චන්ද්‍රිකා එලෙස සහතික දුන්නේ ඇයට එරෙහිව දෝෂාභියෝගයක් ගෙන එන්නේ නැති බවට රනිල්ව එකඟ කර ගෙනය. එසේම ශ්‍රී ලනිපයෙන් මන්ත්‍රිවරු කඩන්නේ නැති බවටත් රනිල්ව එකඟ කරගෙනය.
ඉන්දියාව සහ ඇමෙරිකාව ඇතුළු බලවත් රටවල් හරහා ආ මෙම එකඟතාව නිසා රනිල් හිතුවේ චන්ද්‍රිකා තම ආණ්ඩුවට අත නොතියයි කියාය. 2002 පළාත් පාලන ඡන්දයෙන් ශ්‍රී ලනිපය අන්ත පරාජයක් ලබා තිබූ අතර පවත්වන්න නියමිතව තිබුණේ පළාත් සභා ඡන්දයය. පළාත් සභා ඡන්දය පැවැත්වුවහොත් ශ්‍රී ලනිපය යළිත් අන්ත පරාජයක් ලබන බව චන්ද්‍රිකා දැන සිටියාය. එය දැන පළාත් සභා ඡන්දය කල් දමන්න චන්ද්‍රිකා රනිල්ව එකඟ කර ගෙන තිබිණි. පළාත් සභා අහෝසි කරන්න පක්‍ෂ දෙකම එකට එක් වී ක්‍රියා කරමු කියා චන්ද්‍රිකා රනිල්ට ලණුවක්ද දී තිබිණි.

2004 පෙබරවාරි 04 නිදහස් දිනයේ චන්ද්‍රිකා නිදහස් උළෙලට ආවේ බොහොම ප්‍රීිතියෙන්ය. නිදහස් දින උළෙලට ආ රනිල් සමඟ ඇය විහිළු තහළු කරමින් සිනාසුණාය. මේ වෙන කොටත් චන්ද්‍රිකා පාර්ලිමේන්තුව විසුරුවන බවට මංගල සහ ජවිපෙට පොරොන්දු වී තිබිණි. ඒත් මංගලට සහ ජවිපෙට සැකයක්ද තිබිණි. නිදහස් දින උළෙල අවසන් වූ විගස අනුර ප්‍රකාශයක් කරමින් කීවේ මගේ අක්කා බෙල්ල කපන්නේ හිනා වෙවී කියාය. මගේ අක්කා වැඩියෙන් හිනා වීම භයානක යැයි කියාය.

එවකට රනිල්ගේ ආණ්ඩුවේ තීන්දු තීරණ ගත් එස්.බී., ජී.එල්. වැනි අය රනිල්ට අනතුරක් ඇති බව පෙන්වා දුන්හ. ඒත් රනිල් ඔවුන්ගේ කතා මායිම් කළේ නැත. එදින රනිල් බෙන්තොට නිවාඩු නිකේතනයට ගියේ සති අන්තය විවේකීව ගත කරන්නටය. ඒත් රනිල්ට දිගින් දිගටම දුරකතන ඇමැතුම් ලැබිණි. එස්.බී. ඒ වේලාවේ චන්ද්‍රිකාට එරෙහිව දෝෂාභියෝගයක් සකස් කරමින් තිබිණි. එයට අස්සන්ද එකතු කරමින් තිබිණි. එස්.බී. මෙය රනිල්ට කියන්න බය විය. එස්.බී. එය රනිල්ට දැනුම් දෙන වැඩේ භාර දුන්නේ වී.ජ.මු. ලොකු බණ්ඩාරටය. වී.ජ.මු. - රනිල්ට කතා කළේය. චන්ද්‍රිකා පාර්ලිමේන්තුව විසුරුවන ගැසට් පත්‍රයට අස්සන් කරන්න සූදානමින් සිටින බවත්, රජයේ මුද්‍රණාලයේ දැඩි ආරක්‍ෂාවක් තබා ගැසට් පත්‍රය මුද්‍රණයට සූදානම් වෙන බවත් ඔහු කීවේය. ඒත් රනිල් හිතුවේ චන්ද්‍රිකා ඉන්දියාවට, ඇමෙරිකාවට දුන්න වචනය කඩ කරන්නේ නැහැ කියාය. ටික වේලාවකින් කතානායක ජෝශප් මයිකල් කතා කර කීවේ චන්ද්‍රිකාට එරෙහිව දෝෂාභියෝගයක් එස්.බී. ලා අස්සන් කරන බවත්, චන්ද්‍රිකා පාර්ලිමේන්තුව විසුරුවා හැරීමේ අවදානමක් තියෙන නිසා තමා එය භාර ගත යුතු යැයි තමාට හිතෙන බවත්ය. රනිල් එස්.බී. ලාට ඉවසීම නැති බව කියමින් චන්ද්‍රිකා පාර්ලිමේන්තුව විසුරුවන්නේ නැති බව තමාට සහතික යැයි කීවේය. එස්.බී. දෝෂාභියෝගය අකුළා ගත්තේය. එදිනම මධ්‍යම රාත්‍රියේ රනිල්ගේ ‍ෙදාරට තට්ටු කළ ආරක්‍ෂක නිලධාරියා චන්ද්‍රිකා පාර්ලිමේන්තුව විසුරුවා ඇතැයි කීවේය. රනිල්ට දෙවැනි වරටත් අගමැති ධුරය අහිමි විය.

රනිල් තෙවැනි වරට අගමැති වුණේ මෛත්‍රිව ජනාධිපති කරලාය. රනිල් තමාව ජනාධිපති කරන්න කැප වූ හැටි 2015 සැප්තැම්බර් 6 එජාප සම්මේලනයේදී මෛත්‍රි රහසක් හෙළි කරමින් කීවේ මෙසේය.
"දෙවැනි සිද්ධිය ජනාධිපතිවරණ අවසන් ප්‍රචාරක දිනය වූ ජනවාරි 5දා. එදා මම මාතර, ගාල්ල, කළුතර, මොරටුව රැස්වීම් ඉවරකරලා ආවේ මරදාන රැස්වීමට. ඒත් ආරක්‍ෂක අංශ මාව ගෙනගියේ මගේ නිල නිවෙසට. මරදාන රැස්වීමට යන එකට ආරක්ෂක නිලධාරීන් තදින්ම විරුද්ධ වුණා. මගේ රියැදුරුත් යැව්වා. මම විතරයි නිවෙසේ හිටියේ. ඒ අවස්ථාවේ රනිල් වික්‍රමසිංහ මැතිතුමා මට කතාකර විමසුවා මරදානේ රැස්වීමට එන්නේ නැද්ද කියලා. මම කිව්වා එන්න විදියක් නෑ රියැදුරත් නෑ කියලා. කවුරුත් ඕන නැහැ ඔබතුමා ඔහොම ඉන්න මම එන්නම් කියලා එතුමා කීවා. ටික වෙලාවකින් එතුමා පැමිණ මාව මරදානේ රැස්වීමට කැඳවාගෙන ගොස් වේදිකාවේ ආරක්ෂක කුටියක මාව රැඳවූවා.

ඉන්පසු වික්‍රමසිංහ මැතිතුමා ජනතාවට දෑත් ඔසවා ආචාර කරමින් රැස්වීම් භූමිය වටේම ගියා. ආපසු වේදිකාවට ආපු එතුමාව මම එදා දැක්කේ අවුරුදු 20 - 25ක කොලු ගැටයෙක් විදියටයි. එතුමා මාව වේදිකාවේ තියල ජනතාව අතරට ගිහින් පෙන්නුවේ ඔබට අපේ රැස්වීමේ කිසි අනතුරක් නැහැ වගකීම මම භාර ගන්නවා කියන කාරණාවයි. අවුරුදු 20 - 25ක කොල්ලෙක් වගේ ඒ තරම් තරුණ විදියට එතුමා ඒ වෙලාවේ හැසිරුණේ."

දැන් මෛත්‍රි ජනාධිපති වී මේ නොවැම්බරයට වසර දෙකකි. රනිල් අගමැති වී ද වසර දෙකකි. දැන් මෛත්‍රිගේ පැජට් පාරේ ජනාධිපති මන්දිරයට ශ්‍රී ලනිප ප්‍රබලයන් රිංගන්නේ එදා විජේතුංගගේ කාලයේ ජනාධිපති මන්දිරයට ගාමිණීලා රිංගුවා වගේය. 2002 - 2003 චන්ද්‍රිකාගේ ජනාධිපති මන්දිරයට මංගලලා, ජවිපෙ රිංගුවා වගේය. තනි යූ.ඇන්.පී. ආණ්ඩුවක් හදමු කියා රනිල්ගේ අරලියගහ මන්දිරයටත් කට්ටිය රිංගයි. මහින්දගෙන් මන්ත්‍රිවරුන් ගෙන මෛත්‍රිව ඉවර කර ජනාධිපතිකම ගමු යැයි කියන අයත් අරලියගහ මන්දිරයේ අහුමුලුවල හැංගිමුත්තන් කෙළිති.
"රාජිත පාලම් හදන්න යන්නේ ඒකද...?"

"විජේතුංග, චන්ද්‍රිකා රනිල්ට ගහපු ගේම මෛත්‍රිත් ගහයිද...?"
ශ්‍රී ල.නි.ප. සම්මේලනයේ තේමා පාඨය ශ්‍රී ල.නි.ප.ය හොඳ අතටය.
"ඒ කියන්නේ රනිල්ගේ ග්‍රහයා නරක අතටද?"
ඒක දන්නේ මෛත්‍රි විතරමය.

උපුල් ජෝශප් ප්‍රනාන්දු

No comments

Powered by Blogger.